Свет
Стејт департментот издаде глобално предупредување за Американците

По нападите на САД врз Иран, на граѓаните на САД ширум светот им се препорачува зголемена претпазливост.
Стејт департментот издаде глобално предупредување поради потенцијална закана за граѓаните и интересите на САД надвор од САД.
„Постои можност за протести против граѓаните и интересите на САД во странство. Стејт департментот им советува на граѓаните на САД ширум светот да бидат претпазливи“, се вели во предупредувањето.
Иран вети дека ќе продолжи да се брани, еден ден откако САД му се придружија на Израел во најголемата западна воена акција против земјата од Исламската револуција во 1979 година, и покрај повиците за воздржаност и враќање на дипломатијата од целиот свет.
Комерцијалните сателитски снимки покажаа дека американскиот напад во саботата врз подземната нуклеарна централа Фордоу во Иран сериозно го оштети или уништи длабоко закопаното место и центрифугите за збогатување ураниум, но точниот обем на штетата на местото не е утврден, велат експертите.
Во своите последни коментари на социјалните медиуми за американските напади, Трамп рече дека „е нанесена монументална штета на сите нуклеарни постројки во Иран“.
„Најлошата штета се случи многу под нивото на земјата. На целта!!!“ напиша тој на својата платформа Truth Social.
Трамп претходно го повика Иран да се воздржи од каква било одмазда и рече дека „мора да склучи мир сега“ или „идните напади ќе бидат многу поголеми и многу полесни“.
САД лансираа 75 прецизни водени ракети, вклучувајќи бомби за уништување бункери и повеќе од дваесетина ракети Томахавк, врз три ирански нуклеарни постројки, изјави за новинарите претседателот на Здружениот штаб на вооружените сили, генерал Ден Кејн.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелски војници забележани во градот Газа

Палестински очевидци тврдат дека во градот Газа забележани се израелски војници.
Според нив израелските војници биле забележани во населбата Сабра, во близина на зграда во која порано се наоѓало училиште.
Израелските војници наводно се заблежани во градот Газа откако израелскиот премиер Бенјамин Нетанјаху одобри план за преземање на градот, во кој живеат околу еден милион луѓе.
Израелската армија не ги коментираше палестинските наводи, истакнувајќи оти не ги открива позициите на своите војници.
Претходно Израел соопшти дека планира да евакуира околу еден милион жители од градот пред офанзивата, која се очекува да почне најрано во септември.
Свет
Зеленски вели дека постои вистинска можност да заврши војната во Украина

Претседателот на Украина, Володимир Зеленски синоќа најави дека следните денови ќе бидат готови безбедносните гаранции за неговата земја.
Тој, по телефонскиот разговор со премиерот на Холандија, Дик Шуф, на платформата Икс објави дека „во моментот тимови на Украина, САД и европските партнери работат на решение“.
Според Зеленски постои „вистинска можност да се заврши оваа војна“, додавајќи дека Украина е „подготвена за конструктивни чекори што можат да доведат до вистинскиот мир“.
– Русија од своја страна не покажува намера за мир и продолжува да ги гранатира нашите градови. Сите сигнали што доаѓаат од Москва овие денови ги толкуваме на ист начин. Ни треба притисок за промена на нивниот став, како и состанок на највисоко ниво за да се разговара за сите прашања, посочи Зеленски.
Свет
Северна Кореја тестираше нови ракети

Северна Кореја вчера истрела два нови противвоздушни проектили за уништување на различни воздушни цели, меѓу кои дронови и крстосувачки ракети. Тестирањето на новото оружје го надгледуваше севернокорејскиот лидер Ким Џонг-ун.
Како што јави Корејската централна новинска агенција (КЦНА) новото оружје има „супериорна борбена способност“ и користи „единствена технологија“.
Тестирањето на ново оружје се одвива во време на зголемени тензии со Јужна Кореја. Официјален Сеул вчера соопшти дека на 19 август јужнокорејски војници отвориле предупредувачки оган кон припадници на севернокорејската армија, кои накратко навлегле во Демилитаризираната зона.
Исто така во регионот се одржува заедничка воена вежба помеѓу Јужна Кореја и САД, а за утре е предвидена средба на американскиот претседател Доналд Трамп со новоизбраниот јужнокорејски претседател Ли Џае-мунг.