Свет
Столтенберг: НАТО почнува да ја планира својата поголема улога во помагањето на Украина

Членките на НАТО се согласија да продолжат да ја планираат својата поголема улога на Алијансата во координацијата на безбедносната помош за Украина, која може да смета на тоа сега и долгорочно, изјави генералниот секретар на Алијансата, Јенс Столтенберг.
„Сојузниците денеска се согласија да почнат со планирање за поголема улога на НАТО во координацијата на безбедносната помош и обука“, рече Столтенберг на прес-конференција по првиот ден од состанокот на министрите за надворешни работи на земјите-членки на НАТО.
„Денес не е донесена конечна одлука во каква форма ќе биде, деталите ќе бидат разработени во наредните недели. Но, не се сомневајте, Украина може да се потпре на поддршката на НАТО сега и долгорочно“, додаде првиот човек на НАТО.
Главна тема на министерскиот состанок е предлогот на Столтенберг за пакет од 100 милијарди евра за следните пет години за да се обезбеди сигурна помош за Украина во случај на одредени политички промени. Според дипломатски извори, со тоа би се избегнала опасноста помошта за Украина да биде доведена во прашање во случај Доналд Трамп да се врати во Белата куќа.
Самиот Столтенберг не сака јавно да потврди дека станува збор за тој конкретен предлог или за цифрата што се споменува. Досега помош за Украина се даваше преку т.н Контакт групи кои обединуваат околу 50 земји под водство на САД, а сега се предлага тоа да се направи во рамките на НАТО.
Генералниот секретар вели дека очекува консензус за ова до самитот на НАТО, кој ќе се одржи во јули во Вашингтон. Сите одлуки во НАТО се носат со консензус, а барем досега нема.
Портпаролот на унгарската влада Золтан Ковач објави на X дека министерот за надворешни работи Петер Сијарто изјавил дека „Унгарија нема да поддржи ниту еден предлог што би можел да го доближи НАТО до војна или да го претвори од одбранбена во офанзивна коалиција“.
Столтенберг рече дека посигурната и посилна помош на НАТО нема да го промени нејзиниот карактер како одбранбен сојуз и дека за ова прашање разговарал со унгарскиот премиер Виктор Орбан.
„Не разговараме за борбеното присуство на НАТО во Украина, ние разговараме за тоа како можеме да ја координираме и да испорачаме помошта на Украина однадвор, како што тоа го прават сега сојузниците“, рече Столтенберг, одговарајќи на новинарско прашање.
Утре на министрите за надворешни работи на НАТО ќе им се придружи шефот на украинската дипломатија Дмитро Кулеба на состанокот на Советот НАТО-Украина.
Министрите ќе разговараат и за безбедносните предизвици во јужното соседство, вклучително и заканите од тероризмот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Лукашенко: Би му ги отворил очите на Трамп

Претседателот на Белорусија, Александар Лукашенко, изјави дека средбата со Доналд Трамп би била „исклучително корисна“ за американскиот лидер, бидејќи, како што вели тој, би му ги „отворила очите“ за клучните глобални прашања, првенствено за односите меѓу САД и Русија и ситуацијата во Украина.
„За разлика од сите што трчаат околу него, јас би му ги отворил очите за многу работи. Вклучувајќи ги односите меѓу САД и Русија, особено за конфликтот во Украина. И, секако, за позицијата на Белорусија“, рече Лукашенко во интервју за „Тајм“, чие снимање го објави агенцијата БелТА.
Белорускиот претседател откри и дека се пошегувал на средбата со американските претставници дека „на Американците им недостасува диктатор“. „Ми одговорија дека имаат доволно свои. Реков дека размислувам за себе – би имал многу да му кажам на нивниот претседател“, додаде Лукашенко.
Изјавата дојде откако Лукашенко се сретна во Минск со специјалниот претставник на американскиот претседател, Кит Келог, кој стана највисокиот американски функционер што ја посети Белорусија во последните години.
Во интервју за „Тајм“, Лукашенко ја поддржа „цврстата политика на Трамп кон Европа“, наведувајќи го како пример извозот на украинско жито. Според него, Трамп сакал да транспортира жито од Одеса преку Полска и да го испрати до европските пристаништа, но не му е дозволено да го стори тоа бидејќи се плаши од појавувањето на тоа жито на европскиот пазар.
Белорускиот лидер изрази подготвеност да организира трилатерална средба меѓу Владимир Путин, Доналд Трамп и Володимир Зеленски во Минск, со оценка дека двајцата претседатели ќе бидат задоволни од изборот на белоруската престолнина како преговарачка платформа.
Тој, исто така, го пофали потпретседателот на САД, Венс, нарекувајќи го „пристоен човек“ кој би можел да стане нов американски лидер, додавајќи дека се надева дека ќе ја продолжи политиката на Трамп кон ЕУ.
Лукашенко ги повика Американците да го „покренат“ Трамп за да го охрабри Зеленски барем да се согласи на „воздушно примирје“, предупредувајќи дека светските односи драстично ќе се променат во следната деценија и дека решенијата треба да се бараат врз основа на сегашната реалност.
Фото: принтскрин
Регион
Вучиќ: Суштината на обоената револуција е Србија да биде најслаба во регионот, а јас да клекнам пред сите

Српскиот претседател Александар Вучиќ денес изјави дека суштината на обоената револуција е дека Србија мора да биде послаба во споредба со сите во регионот, како и тоа тој да биде неспособен претседател, кој би клекнал пред сите што не ѝ посакуваат добро на Србија, пренесуваат медиумите во соседството.
„Тоа е суштината на обоената револуција. Србија мора да биде скромна и секогаш мора да биде послаба од Хрватска и од сите други во регионот за да може да бидат задоволни“, рече Вучиќ во Палатата на Србија одговарајќи на новинарско прашање.
Вучиќ рече дека денес не е случај Србија да е најслаба во регионот, иако е посиромашна од другите, туку дека, од друга страна, напредува побргу од другите, што никому не му одговара.
„Тоа е една од причините зошто го прават тоа бидејќи би сакале да имаат некомпетентен претседател, кој би клекнал на колена пред сите оние што не ѝ посакуваат добро на Србија“, рече Вучиќ.
Тој ги обвини луѓето, за кои тврди дека се водачи на блокади, дека ја мразат Србија и ѝ посакуваат најлошо на својата земја наведувајќи дека поради нив, земјата е во тешка ситуација бидејќи „ја намалиле стапката на раст, го уништиле туризмот, како и многу економски гранки“.
„Дури и меѓу блокадите има такви што ја сакаат Србија, но не може да се одвојат од овие водачи – новинари, професори и политичари. Тоа е еден од проблемите“, рече Вучиќ, пренесува „Бета“.
Регион
Поради силни ветрови, во прекин фериботскиот сообраќај во Грција

Фериботскиот сообраќај во Егејското Море во Грција денес беше прекинат поради силни ветрови, кои достигнаа брзина од 60 километри на час, поради што илјадници туристи не можеа да одат до своите планирани дестинации.
Забраната за пловидба, која ќе биде во сила денес најмалку до 13 часот по локално време, важи во сите поголеми пристаништа во Атика, а само фериботите на неколку линии во областа Аргосароникос сè уште пловат, објавува „Јуроњуз“.
Пристанишните власти чекаат ветерот да стивне за да може да се укине забраната за пловидба.
Пловењето кон островите Киклади беше прекинато во пристаништето Рафина иако екскурзиите до Мармарис на островот Кос продолжија според планот.
Фериботите не сообраќаат од Пиреја, а пловидбата во пристаништето Лаврио е прекината во правец на Китнос и Агиос Маринас и Неа Стира.
Илјадници патници не можеа да го почнат своето патување утрово поради прекин на пловидбата и чекаат да одат на своите дестинации.
Грчката крајбрежна стража им советува на патниците да се консултираат со компанијата чиј ферибот треба да ги превезува кога ќе бидат можни нови поаѓања, како и да ги избегнуваат пристаништата на кои се појавил сообраќаен метеж.
Метеоролошката служба прогнозира дека силните ветрови ќе траат најмалку до недела, што би можело да влијае на фериботскиот сообраќај.
Поради оваа причина, властите им препорачаа на туристите да стапат во контакт со локалните пристанишни власти и компании пред да заминат.