Свет
Столтенберг: НАТО ја зголеми поддршката за БиХ, Грузија и Молдавија
Генералниот секретар на НАТО, Јенс Столтенберг, денеска во Букурешт изјави дека министрите за надворешни работи на членките на Алијансата се согласиле да ја зголемат поддршката за Босна и Херцеговина, Грузија и Молдавија, како важни партнери кои се соочуваат со рускиот притисок.
На прес-конференцијата по третата и последна седница на Северноатлантскиот совет на дводневниот состанок во Букурешт, Столтенберг рече дека научената лекција од руската војна во Украина покажува дека е важно на време да се поддржат трите партнерски земји.
На третата седница, на која на министрите на членките на НАТО, Шведска и Финска им се придружија и шефовите на дипломатиите на Босна и Херцеговина, Грузија и Молдавија, стана збор за заеднички безбедносни грижи и начини за зајакнување на соработката, рече Столтенберг.
„Сојузниците се согласија да ја засилат поддршката за тие земји, вклучително и градење безбедносни капацитети, реформи и обука за подобрување на безбедносните и одбранбените институции“, рече Столтенберг.
Тој додаде дека Босна и Херцеговина е важна за стабилноста на Западен Балкан, потсетувајќи дека НАТО е присутен во регионот од 1990-тите и дека придонел за запирање на бруталната етничка војна.
Што се однесува до Грузија, Столтенберг рече дека сојузниците ја потврдиле поддршката за суверенитетот и територијалниот интегритет на таа земја, како и потребата од спроведување на демократски реформи.
Столтенберг изјави и дека денеска министрите се занимавале и со долгорочните предизвици што ги поставува Кина за интересите, вредностите и безбедноста на НАТО, како и за натамошното зајакнување на отпорноста на Алијансата.
„Министрите денеска разговараа за амбициозниот воен развој на Кина, нејзиниот технолошки напредок и се поголемите сајбер и хибридни активности“, рече Столтенберг.
Тој додаде дека војната во Украина „ја покажа опасната зависност“ на Западот од рускиот гас.
„Ова треба да не наведе да ја оцениме нашата зависност од други авторитарни режими, не само од Кина. Се разбира, ќе продолжиме да тргуваме и да соработуваме економски со Кина. Но, мора да бидеме свесни за нашите зависности, да ја намалиме нашата ранливост и да управуваме со ризиците“, рече Столтенберг.
Министрите на членките на НАТО, како и на Шведска и на Финска, чиј влез во алијансата се очекува наскоро, синоќа на работна вечера разговараа со шефот на украинската дипломатија Дмитро Кулеб за итните потреби на неговата земја и долгорочната поддршка за Киев, рече Столтенберг.
„Сојузниците јасно ставија до знаење дека нашата континуирана воена поддршка за Украина е од клучно значење, првенствено дополнителна противвоздушна одбрана. Сојузниците, исто така, најавија дополнителни придонеси за сеопфатниот пакет помош за Украина, вклучувајќи гориво и генератори“, рече тој.
Запрашан зошто на Украина не и е овозможен брз влез во НАТО, Столтенберг рече дека тоа е предуслов таа земја да опстане.
„Ние ѝ помагаме на Украина да преживее, со оружје, муниција, нафта и сè друго што е потребно за одбрана. Во исто време, даваме поддршка и за Украина во транзицијата од советска опрема во онаа што е во согласност со стандардите на НАТО. “, рече генералниот секретар на НАТО.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Орбан: Унгарија ќе ги зголеми трошоците за одбрана доколку војната во Украина продолжи
Унгарија ќе мора да ги зголеми трошоците за одбрана и следната година доколку војната во Украина продолжи до 2025 година, со што ќе се намали износот на расположливите средства за други трошоци, изјави денеска унгарскиот премиер Виктор Орбан.
Орбан изјави за државното радио дека доколку војната во Украина се пролонгира до 2025 година, нивоата на средства за одбрана на Унгарија за 2023 и 2024 година нема да бидат доволни и ќе мора да се зголемат, пренесува агенцијата МТИ. Орбан изјави дека е загрижен за иднината на Европа и дека унгарската влада нема да дозволи Унгарија да биде принудена да влезе во војна по трет пат, откако учествуваше во Првата и Втората светска војна.
Премиерот на Унгарија смета дека е потребно европско безбедносно решение во кое ќе биде вклучена Русија и дека американската воена индустрија најмногу профитирала од војната во Украина, откако САД испратија најголема воена помош во Киев.
„Нашето историско искуство со војната е дека можете само да изгубите. Колку сте поблиску до воената зона, толку е поголема цената што ја плаќате“, рече Орбан.
Унгарија значително ги зголеми одбранбените распределби минатата година на 2,43 отсто од БДП, што е над два отсто на кои се обврзаа членките на НАТО, наведува МТИ.
Европа
Шефот на британската дипломатија: Украина има право да го користи нашето оружје во Русија
Британскиот министер за надворешни работи Дејвид Камерон денеска вети три милијарди фунти (3,74 милијарди долари) годишна воена помош за Украина „колку што е потребно“ и додаде дека Лондон нема ништо против оружјето да се користи во Русија.
„Ќе даваме три милијарди фунти секоја година онолку колку што е потребно. Штотуку навистина исцрпивме се што можеме во однос на давање опрема“, изјави тој за Ројтерс во интервју за време на посетата на Киев, додавајќи дека пакетот помош е најголемиот од ОК до сега.
„Дел од таа (опрема) пристигнува во Украина денеска, додека јас сум тука“, рече тој.
Камерон рече дека Украина има право да користи оружје доставено од Лондон за да нападне цели во Русија и дека тоа зависи од Киев.
„Украина го има тоа право. Исто како што Русија напаѓа внатре во Украина, сосема е разбирливо зошто Украина чувствува потреба да се осигура дека е способна да се одбрани“, изјави Камерон за Ројтерс.
Камерон, кој го предводеше Обединетото Кралство од 2010 до 2016 година како премиер и се врати на политичкиот фронт пред само неколку месеци, се состана со украинскиот министер за надворешни работи Дмитро Кулебa и претседателот Володимир Зеленски во неговата втора посета на Киев како министер за надворешни работи.
Свет
(Видео) Над 30 лица загинаа во поплавите во Бразил, 60 лица се водат како исчезнати
Повеќе од 30 лица загинаа во поплавите во јужен Бразил, 60 лица се водат како исчезнати, додека околу 15.000 жители се евакуирани.
Хидроелектрична брана во бразилската држава Рио Гранде до Сул се урна поради поплавите предизвикани од обилните дождови неколку дена, а најмалку 500.000 луѓе останаа без струја и чиста вода, јавува Би-би-си.
Во акцијата за пребарување и спасување беа вклучени и хеликоптери, а во некои населби жителите се качија на покривите на нивните поплавени домови.
Бразилскиот претседател Луис Инасио Лула да Силва го посети поплавениот регион и вети помош од Владата на Бразил.
Гувернерот на државата Рио Гранде до Сул, Едуардо Леите побара итна помош за луѓето во поплавените подрачја, а владата на таа држава прогласи вонредна состојба.
Метеоролозите најавија дека врнежите ќе продолжат во тој регион.
Повеќе од 30 луѓе загинаа минатата година во циклон во Рио Гранде до Сул.