Европа
Стотици луѓе во Џенова им оддадоа почит на загинатите во минатогодишниот пад на мостот
Денеска се одбележува првата годишнина од рушењето на мостот Понте Моранди во Џенова при што загинаа 43 лица.
Стотици луѓе, меѓу кои и градоначалникот на Џенова, Марко Бучи и италијанскиот премиер Џузепе Конте, се собраа во близина на локацијата за да им оддадат почит на сите оние што загинаа или беа повредени кога дел од 210 метри од мостот се сруши.
Во катастрофата загинаа вкупно 43 лица, а 29 лица беа повредени заедно со 600 луѓе кои живеат под мостот и чии домови биле уништени.
Мостот, кој беше пуштен во употреба во 1967 година, беше урнат во јуни, но истрагата за рушењето на мостот продолжува.
Минатиот месец италијанската финансиска полиција заплени документи од „Атлантија“, која е матична компанија на онаа одговорна за одржување на мостот, „Аутострада пер ла’ Италија“, пренесува „Фајненшл тајмс“.
Весникот објави дека „Атлантија“ побарала да се отворат „вонредни“ истраги за стабилноста на мостот секоја година, освен во 2009 и 2017 година, во десетте години пред падот.
Компанијата соопшти дека потрошила 9 милиони евра за одржување на мостот помеѓу 2015 и 2018 година.
Коалициската влада на популистичката партија Пет Sвезди и десничарската партија Лега предложија одземање на лиценцата на „Аутострада“ за работа на владини договори во Италија.
Двете компании се оградуваат од одговорност, велејќи дека извештаите не покажале никаква потреба од итно одржување на мостот.
Падот на мостот е еден од најголемите инфраструктурни инциденти во земјата, а според Паоло Клементе, директор за изтражување во италијанската Национална агенција за нови технологии, енергија и одржлив економски развој, и други мостови во земјата се на ризик.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Франција издаде налог за апсење на Башар ал-Асад
Француското правосудство вчера издаде налог за апсење на соборениот сириски лидер Башар ал-Асад под сомнение дека учествувал во воени злосторства, особено во врска со смртта на маж со француско-сириско потекло во 2017 година. Истражните судии го сомничат Асад за соучесништво во убиства и напади врз цивили.
Весникот „Ле Паризиен“ објави дека 59-годишен маж бил убиен кога неговата куќа, во јужниот сириски град Дара, била бомбардирана од хеликоптери на сириската армија во јуни 2017 година. Повикувајќи се на истражители, весникот наведува дека француското правосудство се сомнева дека Асад го наредил нападот и ги обезбедил потребните средства за него. Во тоа време владата на Асад се обидуваше да ја преземе контролата врз Дара од опозициските сили.
Во 2023 година француското правосудство издаде налог за апсење на Ал-Асад во врска со напади со хемиско оружје. Ова особено се однесува за тешките хемиски напади во регионот Источна Гута во близина на Дамаск во август 2013 година. Во нападот со нервен гас сарин загинаа стотици луѓе. Организациите за човекови права известуваат за повеќе од 1.000 смртни случаи.
Европа
Семејството се спаси, но не и 17-годишната девојка: заедно бегале од пожарот во турскиот хотел, а потоа таа исчезнала
Најмалку 76 лица загинаа во страотниот пожар што избувна во хотел во Турција среде ноќ, меѓу кои и една тинејџерка (17), чие цело семејство избега.
Стоматологот Мачит Каратасли и неговото семејство биле на одмор во хотел во ски-центар кога избувнал пожарот. Семејството кое беше зафатено во пожар додека спиеше, како и повеќето гости, среде голема паника успеало да побегне од хотелот. Меѓутоа, неговата ќерка Озум (17) не преживеала.
Според медиумите, семејството почнало да бега од пожарот, но во еден момент Озум истрчала во друга насока и исчезнала.
Семејството почнало да ја бара веднаш по несреќата, но за жал дошло до трагично откритие. Нивната ќерка не можела да го напушти хотелот и загинала во пожарот.
Турскиот министер за внатрешни работи Али Јерликаја синоќа изјави дека бројот на загинати во хотелот во ски-центарот Карталкаја се искачи на 76, а во врска со пожарот досега се приведени девет лица.
Пожарот што вчера рано наутро избувна на последните катови на хотелот „Гранд Картал“ од засега непозната причина траеше десетина часа, а во гаснењето учествуваа и пожарникари од околните градови, јавува Анадолија.
Турскиот претседател Реџеп Таип Ердоган објави дека среда, 22 јануари, е прогласен за ден на национална жалост за жртвите од пожарот.
Европа
12-годишно момче избодено до смрт во Британија, уапсен 14-годишник
Момче (12) починало откако било избодено со нож во Бирмингем, а 14-годишник е уапсен под сомнение за убиство, јавува „Скај Њуз“.
Британската полиција побара од јавноста какви било информации поврзани со смртта на 12-годишното момче, кое беше пронајдено со тешки повреди вчера околу 15 часот во близина на Скриберс Лејн во југоисточниот град Хол Грин.
Момчето било пренесено во болница, но починало од повредите. Семејството на жртвата е известено и е поддржано од специјалисти, велат од полицијата. Истрагата е во тек, а полицијата отвори портал на кој граѓаните доколку знаат нешто можат да ги контактираат.