Научниците од Универзитетот во Атина кои ги следат земјотресите во близина на островот Санторини денеска објавија дека феноменот „постепено опаѓа“ речиси еден месец по почетокот на повеќекратните земјотреси.

Потресите, понекогаш регистрирани со само неколку минути, поттикнаа илјадници жители да ги напуштат градовите на Санторини, како и блиските острови Иос, Аморгос и Анафи, објави АП.

Училиштата на тие острови се затворени веќе четврта недела, а во сила се многу други ограничувања. Научниците сепак изјавија дека се охрабрени од најновите случувања.

„Сеизмичката активност продолжува да покажува постепен пад, како во однос на дневниот број на регистрирани земјотреси, така и во однос на максималните магнитуди“, соопшти Интердисциплинарниот комитет за управување со ризици и кризи при Универзитетот во Атина.

Активноста останува концентрирана во истата фокусна област без забележани нови микросеизмички скокови од 15 февруари, се вели во соопштението.

Комитетот објави дека меѓу 26 јануари и 22 февруари биле регистрирани повеќе од 20.000 земјотреси со јачина од еден или повеќе степени според Рихтеровата скала.

Повеќекратните земјотреси, кои се припишуваат на природните тектонски процеси, како и на движењето на магмата под морското дно, достигнаа јачина од 5,3 степени според Рихтеровата скала, но предизвикаа само мала материјална штета, пренесува Танјуг.

Градоначалникот на Санторини, Никос Зорзос, денеска изјави дека неколку илјади луѓе се вратиле на островот од крајот на минатата недела и ги повика властите да обезбедат поголема помош за справување со ризиците, вклучително и контрола на паѓањето на карпите и поставување и поправка на огради од ридот.

Францускиот претседател Емануел Макрон денеска изјави дека некои европски земји ќе бидат подготвени да имаат мировни сили во Украина како гаранција за безбедноста по потпишувањето на мировниот договор, иако тие нема да бидат испратени на линијата на фронтот.

Макрон, зборувајќи заедно со американскиот претседател Доналд Трамп во Белата куќа, рече дека мировниот договор може да дојде во втората фаза, по, како што рече, „примирје“, пренесе Ројтерс.

Макрон, исто така, рече „дека силата на повторното ангажирање на САД со Русија е извор на несигурност за рускиот претседател Владимир Путин“.

Тој посочи дека Франција е подготвена да обезбеди безбедносни гаранции за Украина, пренесува Танјуг.

Францускиот претседател Емануел Макрон синоќа пристигна во Вашингтон, а американскиот претседател Доналд Трамп го прими во Белата куќа.

Како што наведува телевизијата БФМ, станува збор за „итна мисија“, при која Макрон ќе се обиде да ја „омекне“ американската позиција кога е Украина во прашање, во момент кога Франција предупредува дека не треба да брза со набрзина склучен договор за прекин на огнот во таа земја.

Конфликтот во Украина може да заврши во следните неколку недели, изјави американскиот претседател Доналд Трамп за новинарите на прес-конференција со неговиот француски колега Емануел Макрон во Овалната соба.

– Мислам дека тоа може да се постигне во рок од неколку недели, рече Трамп.

Американскиот претседател Доналд Трамп, според светските медиуми одби да го нарече рускиот претседател Владимир Путин диктатор, како што изјави за Владимир Зеленски неколку дена претходно.

– Овие зборови не ги користам лесно, истакна тој.

Според него, договорот меѓу САД и Украина за ретките метали „се приближува до последната фаза“.

-Конечно, благодарение на овој договор ќе почнеме да ги враќаме вложените пари, објасни американскиот лидер.

Макрон, од своја страна, рече дека Париз и Лондон подготвиле план за безбедносни гаранции за Киев, кој може да вклучува и испраќање војници во Украина.

Според него, „трупите нема да мора да бидат лоцирани на линијата на фронтот“, туку ќе бидат „како гаранција“.

Покрај тоа, францускиот претседател се осврна и на конфискацијата на руските замрзнати средства.

-Можете да земате дивиденди од замрзнатите средства, но не и од самите средства. Ова е спротивно на меѓународното право и сакаме да го почитуваме, изјави Макрон за време на средбата со американскиот претседател Доналд Трамп во Вашингтон.