Свет
Судир пред прифатилиштето во Мелбурн: „Бегалците се добредојдени, Ѓоковиќ не е“

Австралиските медиуми пренесоа дека дошло до судир пред прифатилиштето во Мелбурн, каде што е сместен Новак Ѓоковиќ, кој вчера им се придружи на десетици мигранти.
Според информациите, австралиските власти со години ги држат внатре, откако им биле одбиени барањата за азил.
Затоа поддржувачите на мигрантите веќе подолго време протестираат пред трошниот хотел, пишувајќи на фасадата на зградата за нехуманите услови и односот кон оние кои се внатре.
По пристигнувањето на најдобриот светски тенисер во објектот во кој се сместени заборавените луѓе, местото го привлече вниманието ширум светот и донесе многу српски навивачи пред зградата, што ги налути приврзаниците на мигрантите.
Тие се појавија пред хотелот со транспаренти „Бегалците се добредојдени, Ѓоковиќ не е“, „Ѓоковиќ оде*и, пуштете ги бегалците“ и „Ќе ги заборавите ли нашите пријатели кога Ѓоковиќ ќе замине со својот приватен авион?“.
На ова се налутија српските навивачи кои на Божик особено посветено бдеат пред зградата во која е затворен нивниот идол и тргнаа кон оние кои ги носеа ваквите транспаренти. Поголема физичка пресметка била спречена од полицијата.
Ѓоковиќ вчера беше префрлен во карантин додека ја чека одлуката на судот на австралиската држава Викторија, по жалбата поднесена од неговите адвокати, поради одбивањето на барањето за виза.
Кејт Кели, новинарка на „Гардијан“, прва објави дека Ѓоковиќ е во карантин во хотелот „Парк Ројал“.
Меѓутоа, зад звучното име всушност стои трошна зграда во која се сместени мигранти кои велат дека со години се притворени.
It’s believed Djokovic is now here at the Park Royal hotel, where more than 46 refugees are being held indefinitely. pic.twitter.com/NYedL8NkBB
— Cait Kelly (@cait__kelly) January 6, 2022
На фасадата на хотелот стојат натписи: „Влези за бесплатно мачење“, „30 луѓе мачат веќе 3.089 дена“, „Ние не сме криминалци“, „Сите сме под 35 години“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Париз, Лондон и Берлин повикаа да престане хуманитарната катастрофа во Газа

Хуманитарната катастрофа во Појасот Газа мора веднаш да престане, повикаа вчера во заедничко соопштение Париз, Лондон и Берлин.
„Хуманитарната катастрофа на која сме сведоци во Газа мора веднаш да престане“, нагласија трите европски земји.
Тие на овој начин одговорија на алармот објавен од ОН и невладините организации дека постои ризик од непосреден и широко распространет глад во Газа. Трите европски престолнини ја повикуваат европската влада веднаш да ги укине ограничувањата за испорака на помош.
Франција, Велика Британија и Германија, исто така, потсетуваат дека Израел мора да ги почитува своите обврски според меѓународното хуманитарно право.
„Дојде моментот да се стави крај на војната во Газа“, додадоа тие и ги повикаа сите страни да го прекинат конфликтот со склучување на договор за моментално прекин на огнот.
Регион
Топлотниот бран ги затвори Акропол и археолошките локалитети во Атина

Поради топлотниот бран и високите температури што од почетокот на седмицава ја зафатија Грција, археолошките локалитети во Атина, како и Акропол и во текот на викендов ќе бидат затворени за туристи во периодот од 12 до 17 часот.
Новиот топлотен бран што ја зафати Грција, според најавите и прогнозите се очекува да трае до недела.
Вчера беше најтоплиот ден, просечната максимална температура достигна 37,6 степени Целзиусов, на Пелопонез измерени речиси 46 степени, а во многу делови од земјата надмина 42 степени.
Свет
Русија до Западот: Тврдоглаво игнорирате додека режимот во Киев се обидува да ја спаси кожата на Зеленски

„Тврдоглаво се обидувате да игнорирате како темелно корумпираниот режим во Киев се обидува да ја спаси кожата на украинскиот претседател Володимир Зеленски, доведувајќи ја во прашање иднината на својата земја. За тоа детално ќе разговараме на посебниот состанок што го побаравме за 31 јули, каде што предлагаме фокусирање на акциите што ја поткопуваат потрагата по дипломатски пат за решавање на украинскиот конфликт – вклучително и обидите да се попречи директниот руски-украински преговарачки процес во Истанбул“, изјави заменикот на рускиот амбасадор во ОН, Дмитриј Пољански, на седницата на Советот за безбедност, обраќајќи им се на претставниците на западните земји, пренесува ТАСС.
Според него, Русија подолго време и доследно предлага решавање на украинската криза по дипломатски пат.
„Но вас тоа не ве задоволува – сè додека сте подготвени да продолжите да се борите против Русија преку рацете на Украинците. А фактот што ги има сè помалку – воопшто не ве вознемирува“, предупреди рускиот дипломат.
Русија и Украина во мај и јуни одржаа две рунди преговори, по што следуваше размена на заробеници и предавање на телата на загинатите украински војници. Двете страни исто така разменија нацрти меморандуми за решавање на конфликтот.