Свет
Сурфер во Австралија нападнат од ајкула, се трага по телото

Полицијата во Јужна Австралија трага по телото на маж за кој се верува дека е убиен во напад на ајкула. 55-годишен маж утринава сурфал во близина на плажата Гранитес, јужно од заливот Стрики, кога очевидци виделе дека го нападнала ајкула.
Ова е трет сериозен напад на ајкула во државата оваа година. Уште еден сурфер беше убиен во мај на околу 120 километри од заливот Стрики, а третиот претрпе нефатален напад претходно овој месец. Не е јасно каков тип на ајкула бил вклучен во нападот, но очевидци за локалните медиуми изјавиле дека била долга повеќе од четири метри.
Фил Мекевој, кој живее во заливот Стрики, рече дека утрово слушнал сирени. „Тогаш знаев дека нешто не е во ред и сирените некако се оддалечија кон делот од плажата каде што се сурфа“, рече тој. Според „9 њуз“, човекот што бил нападнат бил еден од шесте сурфери во водата во тоа време, но тој сурфал подалеку од другите.
Мекевој нагласи дека градот моментно забележува прилив на сурфери и смета дека сезоната на риболов може да има врска со можното зголемување на ајкулите во областа, пишува Би-би-си.
Водите во близина на западниот брег на Јужна Австралија се добро познати по присуството на ајкули и научниците предупредија дека зголемувањето на забележаните ајкули не мора да значи зголемување на нивната популација. Плажата Гранитес е на околу 700 километри од Аделаида, главниот град на државата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Белорусија испраќа рекордни количини бензин во Русија

Белорускиот железнички извоз на бензин во Русија се зголеми за четири пати во септември во однос на претходниот месец, бидејќи Москва се справува со недостиг на гориво предизвикан од украинските напади врз нејзината енергетска инфраструктура, објавија извори од индустријата синоќа, објави „Ројтерс“.
Неколку руски региони беа принудени да воведат мерки за штедење и привремено да ги замрзнат цените на горивата во последните недели. Причината е недостигот на популарни видови бензин предизвикан од напади со беспилотни летала насочени кон рафинерии и други енергетски објекти.
Како одговор, Москва, исто така, го ограничи извозот на бензин и дизел. Ова не е првпат Русија да се потпира на соседна Белорусија, таа, исто така, го зголеми увозот на гориво минатата година за да го покрие недостигот на пазарот.
Според извори, пратките на бензин со железница од белоруските рафинерии до рускиот домашен пазар минатиот месец достигнаа 49.000 метрички тони, што е еквивалентно на 14.500 барели дневно. Заедно со бензинот, испораките на дизел во септември изнесуваа 33.000 тони.
Свет
Киев бесен на Меркел: „Зборовите на поранешната канцеларка се неприфатливи“

Киев остро реагираше на тврдењата на поранешната германска канцеларка Ангела Меркел дека Полска и балтичките земји ги саботирале обидите за решавање на украинскиот конфликт во 2021 година, што, како што изјави таа, индиректно придонело за почетокот на „Новата светска војна“, објавува Политико.
Меркел во интервју изјави дека Франција и Германија потоа предложиле воспоставување нов формат за преговори со Русија, кој би ги заменил договорите од Минск, но Варшава и балтичките престолнини одбиле да ја поддржат иницијативата.
Таа проценка предизвика негодување во Киев, каде што висок украински функционер, според Политико, рекол дека зборовите на поранешната канцеларка се „неприфатливи и, искрено, одвратни“.
Во истото интервју, поранешната германска канцеларка, исто така, оцени дека обвинувањето дека унгарскиот премиер Виктор Орбан е „тројански коњ“ на рускиот претседател Владимир Путин во рамките на Европската Унија е „глупост“, посочувајќи на потребата да се запрат меѓусебните обвинувања во рамките на ЕУ и да се обнови дипломатскиот дијалог.
Фото: принтскрин
Свет
Светската здравствена организација тестира смртоносен сируп против кашлица

Светската здравствена организација (СЗО) побара информации од Индија за тоа дали сирупот против кашлица поврзан со смртни случаи кај деца во земјата е извезен во други земји, соопшти денес агенцијата.
СЗО изјави за Ројтерс дека ќе разгледа издавање глобално предупредување за медицински производ во врска со сирупот Колдриф откако ќе добие официјални информации од Њу Делхи, објави Ројтерс.
Според информациите од локалните власти, најмалку 17 деца под петгодишна возраст починале во текот на изминатиот месец откако консумирале сируп што содржел високи концентрации на токсичното соединение диетилен гликол, речиси 500 пати над законската граница.
Фото: принтскрин