Свет
Израелската заложничка која го преживеа киднапирањето од Хамас: „Кога се вратив, ме силуваше познат тренер“

Една од израелските заложници киднапирани од Хамас тврди дека била дрогирана и силувана од познат личен тренер откако се вратила дома, објавува „Тајмс“. Мајката на Миа Шем вели дека нејзината ќерка е во полоша ментална и физичка состојба по нападот отколку кога била во заробеништво.
Миа Шем (23) изјави за главната израелска телевизиска станица Канал 12 дека инцидентот се случил во нејзиниот дом. „Ова беше мојот најголем страв во животот. Пред заробеништвото, за време на заробеништвото – и се случи по заробеништвото, дома, на местото што треба да биде најбезбедно за мене“, рекла таа.
„Дојдов да ја раскажам приказната каква што е, а тоа е дека бев злоставувана. Минатиот месец поминав низ настан што ме натера да се заклучам во куќата, да влезам во екстремни ментални состојби и повторно да останам повредена“, рече таа.
Осомничениот, инфлуенсер и личен тренер во триесеттите години, чие име не е објавено, беше уапсен во март за наводниот напад. Според Канал 12, тој обучил бројни познати личности, вклучувајќи го и поранешниот премиер.
Пред нападот, Шем тренираше три пати во своето фитнес студио во Тел Авив, недалеку од нејзиниот дом. Тој негираше сексуален напад, но наводно признал дека влегол во нејзината гардероба неколку пати додека таа се пресоблекувала. Израелската полиција објави дека мажот е ослободен поради недостаток на докази. Истрагата е сè уште во тек.
Шем беше заробена од Хамас на 7 октомври 2023 година, на музичкиот фестивал „Нова“, долж границата со Газа, каде што повеќе од 300 луѓе беа убиени додека славеа во зори. Откако била ослободена во размена на заложници во ноември, таа рекла дека еден милитант ја допрел несоодветно, но застанал откако таа вреснала.
Француско-израелската државјанка, која имала 21 година во времето на киднапирањето, беше првата заложничка што се појави жива по нападот, во видео објавено од Хамас како доказ дека е жива, а на снимката се гледа со повредената рака преврзана по импровизирана операција.
Таа ретко дава интервјуа, а последен пат беше фотографирана јавно на забавата на Елтон Џон по повод Оскарот минатата година. Таа рекла дека тренерот ѝ пристапил со предлог да ја запознае со холивудски продуцент кој ќе ја сними нејзината приказна за заробеништво.
„Пишувам книга и поради сè низ што поминав, има многу луѓе кои сакаат да ја земат мојата приказна и да направат нешто од неа, па затоа ми звучеше сосема нормално“, рече таа, додавајќи дека тренерот се појавил без продуцентот.
„Не се сеќавав на ништо од моментот кога влезе“, рекла таа, додавајќи дека сфатила дека била дрогирана откако почнала да се сеќава на моментите од нападот. „Моето тело се сеќава. Моето тело го почувствува тоа. Моето тело знае дека сум поминала низ нешто.“
„Кога бев повредена во заробеништво, преживеав“, рече Шем. „Последното нешто што ми требаше беше ваков настан. Ми треба момент на мир за да се обидам да си го средам животот барем за секунда, дури и не сум почнала да се справувам со она што ми се случи во заробеништво.“
Нејзината мајка Керен Шем во едно интервју изјави: „Кога се видовме по тој настан, таа не престануваше да плаче. Беше скршена и плачеше неутешно. Поминав низ тешки ситуации со неа, ја познавам мојата ќерка, но тогаш таа беше целосно скршено суштество. Мојата ќерка се врати од заробеништво во ужасна физичка и ментална состојба, но не како што е сега.“
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Воз во Русија налета на експлозив поставен под шините

Во рускиот Белгородски регион воз налета на експлозивна направа, предизвикувајќи експлозија, објави гувернерот Вјачеслав Гладков на својот канал Телеграм.
„Според прелиминарните информации, возот налетал на експлозивна направа поставена под шините“, напиша тој.
Повредени нема, но оштетена е контактната мрежа на железничката пруга.
Железничкиот сообраќај е привремено во прекин. Сите служби за итни случаи се на терен.
Свет
Трамп бара имиња на странските студенти кои студираат на „Харвард“: Сакаме да знаеме од каде се

Американскиот претседател, Доналд Трамп, изјави дека неговата администрација сака имиња и земји на сите странци кои студираат на Харвард, сугерирајќи дека странските земји, особено оние кои се непријателски настроени кон САД, треба да придонесат за финансирање на образованието на нивните студенти.
„Зошто Харвард не соопшти дека речиси 31 отсто од нивните студенти се од странски земји, и додека некои од нив воопшто не се пријателски расположени кон Соединетите држави, тие не плаќаат ништо за образованието на своите студенти, ниту пак имаат намера да го направат тоа“, напиша Трамп на „Тру соушал“.
Тој истакна дека неговата администрација сака да знае кои се и од каде се странските студенти и додаде дека Харвард „не е многу отворен“.
„Ги сакаме тие имиња и земји“, рече Трамп.
Според податоците на Харвард, во оваа учебна година 27 отсто од студентите доаѓаат од странство, а најмногу се од Кина, Канада, Индија, Јужна Кореја и Велика Британија.
Во учебната 2024-2025 година на Харвард беа запишани 6.793 студенти на додипломски и магистерски студии од 147 земји.
Странските студенти немаат право на какво било федерално финансирање, според делот за финансиска помош на веб-страницата на Харвард, додавајќи дека колеџот има свои пари за стипендии, кои се достапни за странски студенти.
Свет
Малта ќе ја признае Палестина следниот месец

Премиерот на Малта, Роберт Абела, денеска најави дека Малта ќе ја признае државата Палестина следниот месец.
Соопштението дојде за време на политички настан на кој Абела ги покрена локалните и глобалните прашања, со посебен фокус на хуманитарната криза во Газа, пренесува „Малта тудеј“.
„Не можеме да ги затвориме очите пред оваа човечка трагедија која секој ден се влошува“, весникот го цитираше малтешкиот премиер Абела осврнувајќи се на израелското бомбардирање на Газа, во кое загинаа речиси 54.000 Палестинци.
Абела рече дека овој потег е морална одговорност и дека Палестина ќе биде признаена по конференцијата на 20 јуни.