Претседателот на САД, Доналд Трамп, наводно му поставил ултиматум на венецуелскиот претседател Николас Мадуро веднаш да се откаже од власта, но Мадуро одбил, барајќи „глобална амнестија“ за себе и неговите сојузници, објави денес „Мајами Хералд“, повикувајќи се на неименувани извори.

„Можете да се спасите себеси и вашите најблиски, но мора да ја напуштите земјата сега“, наводно му рекол Трамп на Мадуро за време на телефонскиот разговор минатата недела, нудејќи безбеден излез за Мадуро, неговата сопруга и син „само ако Мадуро се согласи веднаш да поднесе оставка“.

Мадуро наводно одбил и упатил низа контрабарања, вклучувајќи имунитет од гонење во целиот свет и дозвола за откажување од политичка контрола, но задржување на контролата врз вооружените сили, според написите.

„Мајами Хералд“ објави дека немало понатамошен директен контакт меѓу Трамп и Мадуро, иако Мадуро наводно побарал втор повик минатиот викенд откако Трамп го прогласи воздушниот простор на Венецуела за „целосно затворен“.

Американскиот весник наведува дека разговорите биле посредувани од Бразил, Катар и Турција.

Трамп вчера потврди дека разговарал со Мадуро по телефон, но не даде никакви детали.

„Не сакам да коментирам ништо, но одговорот е да. Не би рекол дека поминало добро или лошо. Тоа беше телефонски разговор“, рече Трамп, според медиумите во регионот.

Фото: ЕПА

Полицијата во Хонг Конг уапси 13 лица како дел од истрагата за пожар во станбен комплекс во кој загинаа најмалку 151 лице, објави кинеската државна новинска агенција „Ксинхуа“, повикувајќи се на локалните власти.

Во извештајот се наведува дека седум од 20 примероци од материјалот на зградата, кои беа собрани од изгорените облакодери, не ги исполнуваа стандардите за отпорност на пожар.

„Ксинхуа“ додава дека полицијата продолжува да ја истражува несреќата.

Пожар зафати осум облакодери во Хонг Конг во средата, 26 ноември.

Фото: ЕПА

Белоруското Министерство за надворешни работи денес го повика литванскиот вршител на должноста амбасадор во таа земја, Ерикас Вилканецкас, и поднесе протестна нота откога дронот полета од Литванија, прелета над Белорусија и Полска и се врати во Литванија.

Во соопштението на Министерството се наведува дека Минск ги смета ваквите дејства за намерна провокација не само против Белорусија туку и против Полска, објавува агенцијата „Белта“.

„Ваквите дејства претставуваат закана за безбедноста на Република Белорусија и се директно кршење на меѓународното право, вклучително и Чикашката конвенција за меѓународно цивилно воздухопловство“, се вели во соопштението.

Дронот наводно прелетал во воздушниот простор на Белорусија во неделата, 30 ноември.

Фото: ЕПА