Американскиот претседател Доналд Трамp изјави во понеделникот дека Соединетите држави и нивните сојузници ќе го победат радикалниот исламски тероризам.

Велејќи дека „силно“ го поддржува НАТО, американскиот претседател Доналд Трамп уште еднаш ја истакна потребата сите негови членки „во целост“ да ги извршуваат своите финансиски обврски, „што многу меѓу нив не го сторија“.

Во говорот во воздухопловната база Мекдил, во Тампа на Флорида, која е центарот на борбата против џихадистичката групација Исламска држава, Трамп вети дека никогаш нема да дозволи таа организација „да фати корени“ на американска територија.

„Денеска им испраќаме единствена порака на тие ескадрони на смртта и разорувањата: Америка и нејзините сојузници ќе ве победат“, истакна Трамп во базата каде што е седиштето на американската воена команда за Блискиот исток (CENTCOM) и главниот штаб на американските специјални сили.

Трамп на крајот од јануари потпиша указ со кој на воените команданти им даде рок до крајот на февруари да подготват план за „сеопфатна стратегија за победа над Исламската држава“.

Според податоците на CENTCOM, изведени се речиси 18.000 воздушни удари во Сирија и во Ирак од почетокот на меѓународната коалиција предводена од САД против исламската држава во август 2014 година.

„Исламската држава води геноцидна кампања, вршејќи злосторства ширум светот“, додаде Трамп најавувајќи „историски“ вложувања во американските вооружени сили, без да наведе други поединости.

„Радикалните исламски терористи се решителни во намерата да удрат врз нашата земја, како што тоа го сторија во текот на нападите од 11-ти септември (2001 година) и како што тоа го правеа од Бостон преку Сан Бернандино до Орландо и ширум Европа“, рече Трамп.

Велејќи дека медиумите „ниту ги споменаа“ некои од нападите, уште еднаш ги нападна „нечесните гласила“ коишто, како што рече, „не сакаат за тоа да говорат“. „Имаат свои причини“, додаде американскиот претседател,.

Во предизборната кампања Трамп ги поврзи таквите напади со отворањето на границите, ветувајќи веднаш по париските напади од 13-ти ноември 2015 година кога беа убиени 130 луѓе, дека ќе им забрани на муслиманите влез во САД.

Иако главните насоки на стратегијата на Трамп против Исламската држава допрва треба да бидат одредени, американскиот претседател веќе му нареди на својот министер за одбраната, пензионираниот марински генерал Џејмс Матис, да „пронајде нови партнери за коалицијата“, што се смета за сигнализирање кон Русија.

Москва и самата истакна дека Владимир Путин и Доналд Трамп сакаат вистинска соработка против Исламската држава во Сирија“, по нивниот неодамнешен телефонски разговор./крај/мф/сн