Американското куче што беше рането додека трагаше по лидерот на Исламската држава, Абу Бакр ал-Багдади, повторно е на должност. Генерал Марк Мили изјавил дека кучето има огромна заслуга за пронаоѓањето на Ал-Багдади во тунелот под неговото засолниште.

Мили рекол дека кучето е полесно повредено, но дека засега закрепнува и дека се вратило на должност.

Кога американските воени сили тргнаа по Ал-Багдади ноќта во саботата, тој активирал експлозив со кој се убил и себеси и своите три деца и го ранил американското воено куче. Воени претставници рекле дека деталите за кучето се тајни, вклучително и името и расата, но претседателот Доналд Трамп објави фотографија од кучето, тоа е од расата белгиски овчар (малино).

Трамп на „Твитер“ напиша дека кучето со тим специјалци учествувало во потрагата по Ал-Багдади во тунелот, кој бил ископан во североисточна Сирија.

„Ја отстранивме ознаката тајно за фотографијата од прекрасното куче, кое заврши одлична работа во фаќањето и убиството на лидерот на Исламската држава“, напиша Трамп.

Американската војска обично користи белгиски малино-овчари да ги водат и штитат трупите во потрага по непријателски сили и експлозиви. Расата е призната во војската поради својата интелигенција и способност да биде агресивен на команда, рекол претседателот на Здружението на воени кучиња на САД, Рон Ањело.