Американскиот претседател Доналд Трамп, како што беше претходно најавено, во понеделникот го потпишал новиот извршен указ за влегувања на странски државјани на територијата на САД, кој е изменет за разлика од првиот кој предизвика контроверзии и беше суспендиран од сојузниот суд, и во кој се изземени државјаните на Ирак.

Новиот имиграционен указ на американскиот претседател стапува на сила на 16-ти март, и според извори од Белата куќа, тоа се случило „ова утро“ по американско време, а церемонијата на потпишувањето на претседателскиот указ минала без присуство на медиумите.

Според документот, повторно на 90 дена се воведува забрана за влез на граѓаните од Судан, Сирија, Сомалија, Иран, Либија и Јемен. Во новиот указ на Доналд Трамп исклучок се оние државјани на овие земји на кои им издадени американски визи претходно. Исто така, промена е што од оваа листа се исклучени државјаните од Ирак, коишто како што претходно толкуваа извори од Белата куќа за Reuters „бидејќи ирачката влада вовела дополнителни мерки за контрола на имиграциската процедура и поради заедничката борба против џихадистичката организација Исламска држава. Илјадници Ирачани се бореа рамо до рамо со Американците или логистички им помагале во тоа“.

Според новиот документ на Трамп. „жителите на споменатите шест земји кои се наоѓале надвор од САД и во 17 часот на 27-ми јануари и во моментот на стапувањето на сила на сегашниот декрет немале важечка виза, го немаат правото да влезат во САД во времетраењето“ на новите прописи.

Во соопштението на Белата куќа, исто така, се истакнува дека лицата коишто имаат важечки визи може да ги посетата САД, но како и претходно, тие мора да се усогласат со сите постојни процедури за странците.

„Ова не е забрана за муслиманите во никаква форма. Станува збор за привремено суспендирање на влезот на граѓаните од шесте земји, коишто се сметаат за несигурни земји или за спонзори на тероризмот“, пренесуваат агенциите од специјалниот брифинг на неименуван функционер во администрацијата на претседателот Трамп.

Покрај тоа, Белата куќа повторно привремено ја суспендира програмата за бегалци. Во текот на следните 120 дена, властите ќе спроведуваат анализа и процена на сегашните постапки за проверка на оваа категорија лица со цел да се заштитат американските граѓани од оние кои може да ја загрозат нивната безбедност, се додава во документот.

„Со новиот извршен указ се отстранува разликата од забрана за разместување на бегалците за 120 дена, којашто за бегалците од Сирија важеше трајно, и неограничената забрана и сите се ставаат во истата категорија од 120 дена“, додал претставникот на Белата куќа.

Претседателот Доналд Трамп се одлучи на новата верзија на својот претходен указ од истата област кој предизвика протести во САД и негодувања и критики во светот, бидејќи смета дека ќе ги избегне долгите судски процедури за негово евентуално оспорување.

На 27-ми јануари претседателот Доналд Трамп го потпиша извршниот указ 13769 „За заштита на земјата од влез на странски терористи“, со кој во рок од 90 дена се суспендираше издавањето визи за државјаните на седум муслимански држави: Иран, Ирак, Јемен, Либија, Сирија, Сомалија и Судан. Указот, исто така, им наложува на Стејт департментот и на Министерството за национална безбедност да го суспендираат распоредувањето на бегалците по сојузните држави на 120 дена, како и на неодреден рок се суспендира прифаќањето бегалци од Сирија. Исто така, значително е намалена квотата за прифаќање на барателите на азил во САД во фискалната 2017 година, која таму започнува во октомври 2016 година, на не повеќе од 50.000, од претходно планираните 110.000.

Сојузниот судија од Сиетл, Џејмс Робарт на 3-ти февруари го блокираше овој указ на Трамп со што тој не важеше на целата територија на САД. Потоа на 5-ти февруари, Окружниот апелационен суд во Сиетл одби, на барање на американското министерство за правосудство, да донесе итна мерка со којашто ќе биде суспендирана одлуката на федералниот судија Робарт, а којашто се однесува на целата територија на САД за привремено поништување на привремениот извршен указ на претседателот Трамп. Овој апелациониот суд го установил рокот за министерството за правосудство за одговор на тужителот кој истекува за приговорот на тужениот. Тој требало да биде даден до понеделник.

Пресудата којашто следеше по рочиштето, не го решава правниот спор, туку се однесува на прашањето дали указот на Трамп треба да биде суспендиран за време на судската постапка.

Владата може да побара целиот Апелационен суд на САД за деветтиот округ, кој има 29 активни судии и е надлежен за државите и териториите на западот од Соединетите држави, да ја преиспита одлуката или директно да вложи жалба до Врховниот суд, кој најверојатно и ќе го одреди крајниот исход од судскиот спор.

Тројцата споменати судии оцениле дека и привремената повторна примена на забраната би можела да предизвика штета. Во пресудата наведуваат дека увидуваат спротиставени интереси на националната безбедност и на слободата на движење, но дека владата на САД не понудила „никакви докази“ за загриженост по националната безбедност кои би ја оправдале забраната за граѓаните од споменатите седум земји. Додаваат дека владата не изнела ниеден доказ дека кое и да е лице од тие земји сторило терористички напад во САД.

Министерството за правосудство на САД оцени претходно дека одлуката на судијата Робарт нанесува моментална штета на американската јавност и го оневозможува спроведувањето на извршна уредба, а исто така ги доведува во прашање национално-безбедносните процени на претседателот за ризикот кој претставува влегување во земјата на одредени групи и е најдобриот начин за намалување на тој ризик.

Министерството за правосудство не објави кога ќе ја поднесе самата жалба на деветтиот окружен апелационен суд на одлуката на судијата Робарт. Во поднесокот на министерството за правосудство Трамп е наведен како еден од подносителите во својство на претседател, заедно со секретарот за внатрешна безбедност Џон Кели и државниот секретар Рекс Тилерсон. /крај/мф/сн