Членовите на бандата „Варф Џереми“ убиле најмалку 207 луѓе во пристанишниот кварт Сите Солеил на главниот град на Хаити претходно овој месец, се вели во извештајот на Обединетите нации, ревидирајќи го бројот на загинати од првичната проценка од 187.

Во новиот извештај за масакрот, Канцеларијата на Високиот комесаријат за човекови права на ОН соопшти дека најмалку 134 мажи и 73 жени, главно постари жители обвинети за вештерство, биле убиени за помалку од една недела масовни егзекуции, киднапирања и рации од страна на 300 припадници на бандата Варф Џереми.

Водачот на бандата Монел „Микано“ Феликс ги наредил нападите откако на неговото дете му се слошило, обвинувајќи ги локалните жители дека ја предизвикуваат болеста преку вуду. Многу жртви беа киднапирани од вуду храмови и верски церемонии, соопштија ОН.

Убиствата ја шокираа карипската нација, која е опфатена со влошени конфликти меѓу бандите, влошување на недостигот на храна, а нејзините соседи ја одложуваат долго ветената безбедносна помош.

Авион на „Бритиш ервејс“ кој летал од Лондон до Шарм ел Шеик принудно слетал на аеродромот во Венеција откако четири лица се пожалиле дека им е лошо, јавија денеска италијанските медиуми.

Веднаш по слетувањето на авионот, на пистата пристигнало амбулантно возило кое се погрижило за еден патник и три стјуардеси, а пожарникарите ја блокирале областа околу авионот, објави Tgcom24.

Патникот и стјуардесите имале поблаги невролошки симптоми, а состојбата на тревога набрзо била укината бидејќи по лекарски преглед било констатирано дека не се работи за посериозна клиничка слика.

Во исто време било утврдено дека во авионот нема загадувачки материи.

Сите четири жени, британски државјани, одбиле да бидат однесени во болница на дополнително испитување.

Поради ваквата ситуација дошло до мало нарушување на авиосообраќајот на аеродромот во Венеција, според медиумите.

Илјадници жени се собраа денеска во североисточниот сириски град Камишли за да побараат новите исламистички владетели во Дамаск да ги почитуваат правата на жените и да ги осудат воените дејствија поддржани од Турција во северните региони на земјата кои се под контрола на Курдите.

„Бараме права на жените од новата држава, на жените не смее да им се одземат правата во овој систем“, рече Савсан Хусеин, активистка за правата на жените.

Курдската милиција, која ја предводи вооружената група Сириски демократски сили (SDF), поддржана од САД, е главната сила во областа. Но, рамнотежата на силите во Сирија се промени откако исламистичката група Хајат Тахрир ал-Шам (ХТС) навлезе во Дамаск и го собори Башар ал Асад од власт пред две недели, инсталирајќи нова администрација, шпишуваат светските медиуми.

Курдските групи во Сирија прифаќаат идеологија која ги нагласува социјализмот и феминизмот – за разлика од конзервативните сунитски исламистички ставови на ХТС, поранешен огранок на Ал Каеда.

Постои широко распространет страв меѓу Сиријците дека новата администрација во Дамаск ќе се приклони кон тврдокорното исламистичко владеење и ќе ги маргинализира малцинствата и жените во јавниот живот.

Портпаролот на сириската преодна влада, Обаида Арноут, минатата недела изјави дека „биолошката и физиолошката природа“ на жените ги прави непогодни за одредени владини работни места. Поради неговата изјава, жените во Дамаск веќе протестираа.