Свет
Трамп: Лос Анџелес би бил срамнет со земја без гардата; Шефот на полицијата во Лос Анџелес: Она што го видов беше одвратно
Протестите во Лос Анџелес траат со денови, а прво избувнаа поради рации и депортации на мигранти. Протестите станаа насилни, а американскиот претседател Доналд Трамп ја испрати Националната гарда во градот без согласност на државата, според светските агенции.
Трамп повторно се огласи на Truth Social и рече дека одлуката за испраќање на Националната гарда во Лос Анџелес била неопходна и правилна.
„Донесовме одлична одлука кога ја испративме Националната гарда за да се справи со насилните, поттикнати немири во Калифорнија. Да не го сторевме тоа, Лос Анџелес ќе беше целосно уништен.
Крајно некомпетентниот „гувернер“, Гевин Њускам, и „градоначалничката“, Карен Бас, треба да ми кажат: „Ви благодарам претседателу Трамп, вие сте прекрасни. Ние не сме ништо без вас господине“.
„Наместо тоа, тие избраа да ги лажат луѓето од Калифорнија и Америка тврдејќи дека не сме потребни и дека ова биле „мирни протести“. Еден поглед на фотографиите и снимките од насилството и уништувањето е доволен за да стане сè јасно. Секогаш ќе направиме што е потребно за да ги заштитиме нашите граѓани, за да можеме заедно повторно да ја направиме Америка голема“.
Началникот на полицијата на Лос Анџелес, Џим Мекдонел, рече дека нивото на насилство во градот по антиимиграциските протести е „одвратно“ и предупреди дека ситуацијата се влошува со секој изминат ден.
„Видов насилство кое е одвратно. Беше лошо од самиот почеток, но она што се случуваше во последните денови станува полошо и поопасно“, рече Мекдонел.
Мекдонел рече дека полицијата ги прилагодила своите тактики за да ги изведе одговорните пред лицето на правдата и им се заблагодари на сите полицајци и партнерски агенции за нивната работа.
Тој додаде дека верува оти насилните луѓе немаат никаква врска со граѓаните кои мирно протестираат против федералните политики за имиграција во текот на денот. „Кога гледам кој го предизвикува насилството, ова не се истите луѓе што ги гледаме преку ден, кои легитимно ги изразуваат своите ставови“, рече Мекдонел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Комбе излета од автопат во Србија: едно дете загина, седум се повредени
Едно дете загина, а седум други се повредени, како и возачот на комбе, во тешка сообраќајна несреќа што се случи околу 3:30 часот наутро на автопатот Нови Сад-Белград, објавија регионалните медиуми во среда.
Детето родено во 2009 година почина на местото на настанот од повредите здобиени во несреќата, објави Радио телевизија Србија (РТС).
Седум други деца, родени помеѓу 2009 и 2012 година, се здобиле со тешки повреди и се пренесени во Детската болница во Нови Сад.
Возачот, исто така, е тешко повреден
Возачот на комбето, маж роден во 1982 година, исто така е тешко повреден и е пренесен во Ургентниот центар на Клиничкиот центар на Војводина.
Несреќата се случила кога комбето во кое се превезувале децата излетало од патот, пробило ограда и паднало во канал, објави Радио телевизија Војводина (РТВ).
фото: архива
Свет
(Фото) Трамп доби златна круна во Јужна Кореја
На претседателот на САД, Доналд Трамп, денес во Националниот музеј во Гјонгџу му беше врачен Големиот орден на Мугунгва и златна круна на кралството Сила од страна на јужнокорејскиот претседател Ли Џае-Мјунг.
Претседателот Трамп доби реплика од историската златна круна во Јужна Кореја, најновиот во низата импресивни подароци што ги добил за време на неговата посета на Азија.

Трамп рече дека подарокот е „многу посебен“.
Симбол на света власт и апсолутна моќ
Репликата е базирана на златната круна на древното кралство Сила, кое го симболизирало „светата власт и апсолутната моќ“ на кралевите и владејачката класа, според Националниот музеј на Кореја.

Златните круни од кралството Сила прикажуваат дрво со гранки што се шират нагоре, за кое музејот вели дека „значи небесен мандат на кралот“.
фото: принтскрин
Свет
Во Холандија почнаа парламентарните избори
Во Холандија утрово почнаа парламентарните избори, избирачките места се отворија во 7:30 часот и ќе бидат отворени до 21:00, по што ќе започне пребројувањето на гласовите и објавувањето на првите резултати, јави холандскиот јавен сервис „НОС“.
Право на глас имаат околу 13,5 милиони граѓани, а гласањето се одвива на 27 партии со 1.166 кандидати за 150 пратенички места.
Некои избирачки места беа отворени уште од полноќ. На поголемите железнички станици има и мобилни пунктови за гласање.
Анкетите покажуваат дека трката е исклучително тесна, а крајнодесничарската Партија за слобода (PVV) на Герт Вилдерс има шанса за силен резултат, иако повеќето партии не сакаат коалиција со него. Поддршка имаат и левите и десноцентристичките партии.
По распадот на претходната четирипартиска влада, парламентот брои дури 15 партии, па аналитичарите предупредуваат дека формирањето нова влада може да трае со месеци.

