Американскиот претседател Доналд Трамп размислува да воведе нови санкции врз Русија оваа недела бидејќи е сè повеќе фрустриран од континуираните напади на Русија врз Украина и бавниот напредок во мировните преговори, изјавија извори блиски до него за „Волстрит џурнал“.

Според еден извор, санкциите, веројатно, нема да вклучуваат нови мерки против банките, но се разгледуваат други опции за да се изврши притисок врз рускиот претседател Владимир Путин да се согласи на отстапки, вклучително и 30-дневен прекин на огнот поддржан од Украина, што Русија досега цврсто го отфрла.

Во неделата Трамп коментира за можноста за нови мерки велејќи дека апсолутно ги разгледува. „Тој убива многу луѓе“, рече Трамп за Путин. „Не знам што му е. Што му се случи, по ѓаволите?“, додаде тој.

Според истите извори, Трамп го губи трпението со мировниот процес и размислува целосно да го напушти доколку најновиот обид не успее, што би бил ненадеен пресврт на настаните за претседател, кој ја темелеше својата кампања на ветување дека ќе ја заврши војната уште на првиот ден од мандатот. Не е јасно што би се случило ако САД се повлечат од преговорите, ниту дали Трамп ќе продолжи да ѝ обезбедува воена помош на Украина.

„Претседателот Трамп е јасен – тој сака договор за мир преку преговори“, изјави портпаролката на Белата куќа, Каролина Ливит, во изјава за „Волстрит џурнал“. „Исто така е мудро да се држат сите опции отворени“.

И покрај многуте обиди, Трамп не успеа да изнуди поголеми отстапки од Путин во преговорите, а рускиот претседател дополнително ги засили воените операции. Неколку часа по коментарите на Трамп во неделата, Русија го почна својот најголем напад со беспилотни летала и ракети врз Украина досега. Русија ги опиша нападите како одмазда за украинските напади на нејзина територија.

Во понеделникот германскиот канцелар Фридрих Мерц изјави дека САД, Германија, Франција и Велика Британија повеќе нема да го ограничуваат опсегот на оружје што го испорачуваат на Украина, што значи дека Украина сега може да напаѓа и воени цели подлабоко во Русија. Досега, западните ракети можеа да се користат само против руски цели во одреден дострел. Администрацијата на претседателот Бајден претходно се спротивстави на укинување на овие ограничувања плашејќи се од ескалација на војната. Белата куќа не сакаше да ја коментира одлуката.

Ставовите на Трамп кон Путин се менуваа од почетокот на неговиот мандат. Иако повремено упатуваше остри критики и размислуваше за санкции, тој зборуваше и за можностите за намалување на трговските бариери и привлекување американски инвестиции во Русија. Но, во неделата тој беше необично суров: „Го познавам долго време, секогаш имавме добри односи, но сега испраќа ракети во градовите и убива луѓе, а тоа воопшто не ми се допаѓа“, рече тој. „Додека зборуваме, тој испраќа ракети кон Киев и други градови. Тоа воопшто не ми се допаѓа“.

„Се чини дека претседателот Трамп почнува да сфаќа кој е, всушност, Владимир Путин“, рече Вилијам Тејлор, поранешен американски амбасадор во Украина. „Прашањето е дали тој го мисли ова сериозно? Дали тоа ќе доведе до конкретни потези, до санкции?“ Тејлор додава: „Од неговите коментари се чини дека Трамп е блиску до заклучок – или веќе заклучил – дека Путин е пречка за мир“.