Свет
Трамп: На САД им треба Гренланд за да им се спротивстават на Русија и Кина

„Гренланд е прекрасно место. Ни треба за меѓународна безбедност. И сигурен сум дека Данска ќе се согласи. Тоа ги чини многу пари да го одржат, да го заштитат“, рече 47. американски претседател и продолжи:
„Гренланд е потребен не за нас, туку за меѓународна безбедност. Имате руски бродови насекаде, имате кинески бродови насекаде, воени бродови, а тие – Данска – не може да го одржат тоа“.
Трамп изјави дека САД треба да ја преземат контролата врз Гренланд нарекувајќи го американското стекнување на огромниот арктички остров апсолутна неопходност и одбивајќи да ја исклучи употребата на воена сила.
Неговите коментари поттикнаа итни состаноци во Копенхаген и остра осуда од данските и гренландските лидери, кои рекоа дека островот не е на продажба. Додека глобалните сили се обидуваат да го прошират своето влијание и присуство на Арктикот, Гренланд, богат со минерали и дом на американската воена база, стана многу баран поради неговата безбедносна и трговска важност.
Трамп не го спомна Гренланд во своето инаугуративно обраќање и покрај тоа што вети дека ќе го обнови Панамскиот Канал, уште една од неговите сегашни територијални опсесии, според светските агенции.
„Луѓето на Гренланд не се задоволни со Данска, знаете, мислам дека тие се задоволни со нас. Имавме претставници, мојот син и претставниците отидоа таму пред две недели, и тие нè сакаат. Па ќе видиме што ќе се случи“, додаде Трамп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Ројтерс: Луѓето на Трамп го предупредија Катар и неговите сојузници неколку часа пред израелскиот напад

Американскиот Стејт департмент однапред информирал неколку регионални сојузници на Блискиот Исток за планираниот израелски напад врз Иран, неколку часа пред почетокот на операцијата, тврдат тројца извори запознаени со ситуацијата, пренесува Ројтерс.
Во дипломатската нота испратена во четвртокот попладне, Стејт департментот потврдил дека израелскиот напад ќе се случи доцна во ноќта. Катар бил меѓу земјите кои го добиле предупредувањето.
Во пораката се наведува дека Вашингтон не учествувал во израелската операција ниту дал каква било поддршка. Се истакнува и дека претседателот Доналд Трамп јасно ја изразил својата желба за мир во регионот, но и цврстиот став дека на Техеран не смее да му се дозволи да развива нуклеарно оружје.
За потсетување, Израел започна бран воздушни напади низ Иран ноќта меѓу четвртокот кон петокот, тврдејќи дека погодил нуклеарни локации, ракетни фабрики и високи воени команданти, што може да биде долготрајна операција чија цел е да се спречи Иран да развие атомска бомба.
Стејт департментот не одговори веднаш на барањето за коментар.
Свет
Најмалку 86 загинати и 341 ранети во израелските воздушни напади

Најмалку 86 лица загинаа, а 341 беа ранети во израелските воздушни напади во петокот, објави иранската новинска агенција Фарс, цитирана од „Анадолија“.
Во главниот град Техеран загинаа 78 лица, а 329 беа ранети. Најмалку уште осум лица ги загубија животите, а 12 се ранети во нападите на Табриз, град во северозападниот дел на Иран.
Израел започна сеопфатна воена операција против Иран, во која учествуваа 200 борбени авиони. Целите беа иранската нуклеарна програма и можностите за лансирање ракети со долг дострел.
Во нападите загинаа високи воени функционери и научници кои работеа на нуклеарната програма.
Премиерот Бенјамин Нетанјаху рече дека целната воена операција ќе продолжи се додека е потребно.
Иран вети строга казна и побара итен состанок на Советот за безбедност на Обединетите нации.
Американскиот претседател Доналд Трамп на социјалната мрежа „Вистина“ објави дека му дал на Иран „можност за договор“ и го повика да ја искористи сега, „пред да биде предоцна“.
Оваа ескалација фрла сомнеж за иднината на нуклеарните преговори меѓу Техеран и Вашингтон, кои се водат со посредство на Оман. Шестата рунда индиректни преговори, закажана за в недела, сега најверојатно ќе биде откажана, велат извори запознаени со ситуацијата.
Свет
Новиот командант на Иранската револуционерна гарда: „Наскоро ќе се отворат портите на пеколот“

Новоименуваниот командант на иранската револуционерна гарда, Мохамад Пакпур, се закани со жестока одмазда за израелските напади во кои беше убиен неговиот претходник, Хосеин Салами.
„Како одмазда за крвта на нашите убиени команданти, научници и граѓани, портите на пеколот наскоро ќе се отворат за овој режим кој убива деца“, рече Пакпур во изјавата што ја пренесе иранската државна новинска агенција ИРНА.