Свет
Трамп повторно одрекува дека има некакви врски со Русија
Американскиот претседател Доналд Трамп во средата повторно негираше какви и да се врски со Русија, по оставката на неговиот советник за национална безбедност Мајкл Флин обвинет дека лажел за неговите врски со Москва, нарекувајќи го овој случај „апсурден“.
Таа приказна „за поврзаноста со Русија е апсурдна, тоа е само обида да се прикријат грешките сторени во губитничката кампања на Хилари Клиттон“ реагираше американскиот претседател Доналд Трамп во низата пораки на Twitter објавени во средата претпладнето.
Мајкл Флин, поранешен висок воен челник, е осомничен за неколку телефонски разговори со рускиот амбасадор во Вашингтон, Сергеј Кислјак, пред Трамп да ја преземе претседателската должност и поради начините на коишто за тоа го известил потпретседателот Мајк Пенс.
„Медиумите кои шират лажни информации дивеат со своите теории на заговор и слепата омраза“, истакна американскиот претседател на социјалната мрежа во прв ред алудирајќи на телевизиите CNN и MSNBC кои важат за ткн либерални а за кои наведува дека „не може да се гледаат“. Но ја пофали конзервативната телевизиска мрежа Fox News.
Трамп притоа ги обвинува американските разузнавачки агенции дека ги откривале во јавноста тие информации, отворено повикувајќи го Националната агенција за безбедност (NSA) и сојузната полиција Федералното биро за истраги (FBI): „Разузнавачката заедница (NSA FBI?) незаконски му предала информации на лошите @NYTimes и @WashingtonPost”, напиша претседателот на САД.
Од друга страна, пак, Доналд Трамп му честиташе на новинарот на агенцијата Bloomberg кој напиша „NSA и FBI (…) не би требало да се мешаат во нашите политики“.
Белат куќа два дена одговара за оставката на Мајкл Флин, но и натаму противниците на Трамп поставуваат прашања за наводни некакви минати или сегашни врски на Трамп со Русија. Флин беше главен во екипата блиски соработници за надворешна политика на Трамп и еден од столбовите на неговата предизборна кампања./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сирија го призна Косово
Претседателката на Косово, Вјоса Османи, објави дека Сирија ја признала независноста на Република Косово, пренесува Анадолу.
Османи, која е во официјална посета на Ријад, изјави дека со поддршка на саудискиот престолонаследник Мохамед бин Салман, е постигнат договор со кој Сириската Арапска Република ја признава Република Косово.
Османи му се заблагодари на сирискиот претседател Ахмед ал-Шарија за одлуката за признавање на Косово, како и за неговата поддршка за Косово.
„Народот на Косово и Сирија многу страдаше и жртвуваше за да постигне слобода. Затоа, ова меѓусебно признавање денес не е само признавање на државниот суверенитет, туку и признание на жртвите на многу генерации за слободен живот“, рече Османи.
Таа, исто така, му се заблагодари на саудискиот престолонаследник „што го овозможи овој историски чин меѓу двете земји“. Со признавањето од Сирија, сега 120 земји ширум светот го признаа Косово.
Свет
Боинг ја одложува испораката на авиони, се соочува со казна од 5 милијарди долари
Авиокомпанијата Боинг објави дека производството на долгоочекуваниот авион 777X се одложува до 2027 година, што ќе ја чини дури 5 милијарди долари казни за доцнење на испораките. Причината се сè построгите регулаторни пречки што мора да ги надмине, пишува Би-Би-Си.
Одложувањето доаѓа во време на растечка побарувачка за меѓународни патувања, додека Боинг се обидува да го промовира својот најнов модел како наследник на легендарните 747 и 777. И покрај проблемите со довербата на компанијата по низа инциденти, вклучувајќи го и оној во кој вратата на авионот паднала од лет, Боинг соопшти дека приходите во трите месеци што завршија во септември се зголемиле за 30 проценти на 23,27 милијарди долари во споредба со истиот период минатата година.
Главниот извршен директор Кели Ортберг изјави дека компанијата работи на „враќање на довербата кај сите наши засегнати страни“.
Тој изрази разочарување поради доцнењето на 777X, но додаде дека авионот „се покажал добро на тестирањето во летот“. Тој нагласи дека Боинг работи на „стабилизирање на нашите операции за да можат перформансите на нашата компанија целосно да се опорават“.
Свет
Протекоа американски разузнавачки проценки: Путин е порешителен од кога било да ја продолжи војната во Украина
Според најновата проценка на американските разузнавачки служби, рускиот претседател Владимир Путин е порешителен од кога било да ја продолжи војната во Украина и да постигне победа на бојното поле.
Анализата, која беше презентирана пред членовите на Конгресот овој месец, наведува дека разузнавачките агенции не гледаат знаци дека Русија е подготвена за компромис, и покрај напорите на американскиот претседател Доналд Трамп да посредува во мировните преговори, објавува NBC News.
Оваа проценка е во согласност со ставовите на американските и западните разузнавачки служби од почетокот на руската инвазија во февруари 2022 година.
Сепак, високи американски претставници сега веруваат дека Путин е потврдоглав во своите ставови од кога било. Соочен со масовни загуби на војници и економски проблеми дома, Путин, според проценките на разузнавачките служби, е посветен на освојување на украинска територија со цел да ги оправда огромните човечки и финансиски жртви на војната.
Во јасен знак на растечка фрустрација, претседателот Трамп минатата недела го откажа планираниот состанок со Путин во Будимпешта и воведе казнени мерки против Москва првпат откако ја презеде функцијата во јануари. Новите санкции се насочени кон две големи руски нафтени компании.
„Само почувствував дека е време“, им рече Трамп на новинарите, опишувајќи ги новите санкции како „огромни“. Тој додаде дека „чекал долго време“ да ги воведе, но се надева дека „нема да потрае долго“. „Се надеваме дека војната ќе се реши“, рече тој.
Белата куќа одби да коментира за проценката на разузнавањето, осврнувајќи се на јавните изјави на Трамп. „Како што изјави претседателот, ова се огромни санкции против нивните две големи нафтени компании за кои се надева дека ќе помогнат во завршувањето на војната“, рече еден функционер.
„Тој јасно стави до знаење дека е време да се запре убивањето и да се постигне договор за завршување на војната. Соединетите Држави ќе продолжат да се залагаат за мирно решавање на војната, а трајниот мир зависи од подготвеноста на Русија да преговара со добра волја.“
Трамп долго време ветуваше дека ќе посредува за крај на војната и за време на кампањата тврдеше дека ќе обезбеди мир во рок од 24 часа по враќањето во Белата куќа. Сепак, неговите претходни напори да ја убеди Русија да прекине со огнот и да седне на преговарачка маса не вродија со плод.
Неговата реторика се промени во последните месеци, а фрустрацијата и нетрпението кон Путин стануваат сè поочигледни.
„Секој пат кога разговарам со Владимир, водиме добри разговори, а потоа тие не водат никаде. Тие едноставно не водат никаде“, рече Трамп минатата недела.

