Американскиот државен секретар Марко Рубио денеска ја повика Кина да влијае на Иран да не го затвора Ормутскиот теснец по нападот на Вашингтон врз иранските нуклеарни локации.

Рубио го упати повикот до Кина на „Фокс њуз“, откако иранската „Прес ТВ“ објави дека иранскиот парламент одобрил затворање на Ормускиот теснец, низ кој тече околу 20 отсто од глобалната нафта и гас.

„Ја охрабрувам кинеската влада во Пекинг да ги повика на ова бидејќи тие во голема мера зависат од Ормускиот Теснец за нивната нафта“, рече Рубио, кој е и советник за национална безбедност.

„Ако го затворат, тоа ќе биде уште една страшна грешка. За нив е економско самоубиство ако го направат тоа. И ние ги задржуваме опциите за да се справиме, но и другите земји треба да го разгледаат прашањето бидејќи ќе им наштети на економиите многу повеќе од нашата“.

Рубио рече дека затворањето на теснецот ќе биде огромна ескалација што ќе бара одговор од САД и другите. Кинеската амбасада во Вашингтон се уште не се огласила.

Американските власти рекоа дека ги уништиле главните ирански нуклеарни локации. Нападите претставуваат ескалација на актуелниот конфликт на Блискиот Исток.

Техеран рече дека ќе се брани со сите потребни средства. Денес, Рубио го предупреди Техеран да не иницира одмазда, велејќи дека таквата акција би била најлошата грешка што некогаш ја направиле, и додаде дека САД се подготвени да разговараат со Иран.

По американските напади во неделата, Иран смета дека неговото знаење во нуклеарната технологија не може да биде уништено.

„Треба да се знае дека оваа индустрија има корени во нашата земја и дека корените на таа национална индустрија не можат да се уништат“, изјави Бехруз Камалванди, портпарол на Иранската организација за атомска енергија, пренесе агенцијата „Тасним“.

Тој додаде: „Се разбира дека претрпевме штета, но ова не е првпат индустријата да трпи штета“.

САД во раните утрински часови извршија напад врз три ирански нуклеарни постројки – Фордо, Натанц и Исфахан. Ова е најмоќниот напад врз иранската нуклеарна програма досега. Американскиот претседател Доналд Трамп изјави дека објектите се целосно уништени, додека Меѓународната агенција за атомска енергија објави дека нема зголемено ниво на радијација на погодените локации. Иран најави дека ќе се брани од агресијата на САД и го бомбардираше Израел со проектили.

Американскиот секретар за одбрана Пит Хегсет изјави дека американските воени напади врз иранските нуклеарни постројки се неверојатен и огромен успех што ги уништи нуклеарните амбиции на Техеран.

Во нападите беа употребени 14 бомби за уништување бункери, повеќе од дваесет ракети Томахавк и над 125 воени авиони.

Врвниот американски генерал Ден Кејн рече дека операцијата е наречена „Операција полноќен чекан“.

Оваа голема акција го турна Блискиот Исток уште поблиску до работ на новото големо жариште во регионот каде што конфликтите и војните во Газа и Либан траат повеќе од 20 месеци и каде што беше соборен сирискиот диктатор Ал Асад минатиот декември.

„Нуклеарните амбиции на Иран се уништени“, изјави Хегсет за новинарите на брифингот, додавајќи дека нападите не биле насочени кон иранските воени сили, цивили или промена на режимот.

„Оваа мисија не беше и не беше поврзана со промена на режимот“, изјави Хегсет за новинарите во Пентагон. „Претседателот одобри прецизна операција за неутрализирање на заканите за нашите национални интереси од иранската нуклеарна програма.

„Операцијата што ја планираше претседателот Трамп беше храбра и брилијантна. Кога овој претседател зборува, светот треба да слуша“, рече Хегсет.

Хегсет го предупреди Иран да не ги следи минатите закани за одмазда против САД и рече дека американските сили се подготвени да се одбранат и да преземат акција доколку е потребно.

Додека Пит Хегсет и генералот Кејн даваа изјави, американскиот потпретседател Џеј Ди Венс зборуваше за „Ен-би-си“.

Венс рече дека САД сакаат да почнат дипломатски процес со Иран. Тој посочи дека САД успешно ја смениле иранската програма за нуклеарно оружје и додаде дека претседателот Доналд Трамп сега сака да најде дипломатско решение.

„Ние не сакаме да го одолговлекуваме ова или да го шириме подалеку отколку што е веќе отидено предалеку. Сакаме да ставиме крај на нивната нуклеарна програма“, рече Венс, пренесе Ројтерс.

Тој додаде: „Сакаме да разговараме со Иранците за долгорочен договор“.

Во интервјуто тој исто така исткна дека не верува оти конфликтот со Иран ќе се претвори во долготрајна војна, дека САД немаат интерес да испратат дополнителни војници на Блискиот Исток и дека Америка не сака промена на режимот во Иран.

По разговорот за „Ен-би-си“, Венс даде изјава и за телевизијата „Еј-би-си“. Таму тој повтори дека американските воздушни напади значително ја уназадија иранската нуклеарна програма, но нагласи и дека САД не војуваат со Иран како земја.

„Не сакам да навлегувам во чувствително разузнавање, но знаеме дека минатата ноќ сериозно ја уназадивме иранската нуклеарна програма – без разлика дали се работи за години или повеќе“, објасни тој.

„Ние не сме во војна со Иран – ние сме во војна со иранската нуклеарна програма. Мислам дека претседателот синоќа дејствуваше решително за да ја уништи таа програма“, заклучи тој.

Венс, осврнувајќи се на неодамнешните медиумски критики упатени кон тимот на Трамп, рече дека нападот покажува колку администрацијата е подготвена да ја заврши својата работа.

„Синоќешната операција е неверојатен доказ за вештината на американските пилоти и другите членови на војската – од генералот Кејн и генералот Курила надолу“, напиша Венс на платформата „Икс“.

„И додека медиумите немилосрдно го напаѓаат главниот тим на претседателот и се обидуваат да шират лажни поделби, синоќешниот напад немаше да биде возможен без совршената координација и дискреција на тимот за национална безбедност на претседателот. Јас сум неверојатно горд на нив, а знам дека и претседателот е исто така“, додаде тој.