Свет
Трамп: Третата светска војна не е толку далеку

Американскиот претседател Доналд Трамп изјави дека третата светска војна не е толку далеку, но е убеден дека неговото претседателствување ќе спречи тоа да се случи.
Тој исто така предупреди на растечките конфликти на Блискиот Исток и во Украина и ја нагласи важноста од брза акција за да се спречи ескалација на глобалните конфликти.
„Во целиот свет дејствувам бргу за да ги прекинам војните, да ги решам конфликтите и да го вратам мирот на планетата, сакам мир и не сакам да гледам како луѓето се убиваат“, рече Трамп.
Зборувајќи за војната во Украина и за ситуацијата на Блискиот Исток, Трамп рече дека ќе стави крај.
„Погледнете ги, толку многу смртни случаи на Блискиот Исток и војната што се случува меѓу Русија и Украина. Ќе ја прекинеме. Нема корист од трета светска војна и не сме толку далеку од тоа. Да ги имавме претседателот Џо Бајден и неговата администрација уште една година, ќе бевме во трета светска војна, а сега за време на мојот мандат тоа нема да се случи“, рече Трамп.
Тој исто така ѝ се заблагодари на Саудиска Арабија за организирањето на разговорите меѓу САД и Русија нарекувајќи ги голем чекор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Лавров: Помошта за Украина се дава врз основа на кражба на рускиoт имот и на штета на развојот

Прекумерната помош за Украина е обезбедена врз основа на кражба на суверени фондови и на сметка на меѓународната помош за развој, изјави денеска рускиот министер за надворешни работи, Сергеј Лавров.
Лавров, на состанокот на Советот на министрите за надворешни работи на Г20 во Јоханесбург, изјави дека помошта доделена на Украина на овој начин достигнала невидени размери, пренесе ТАСС.
По почетокот на рускиот напад врз Украина, Советот на Европската Унија одобри резолуција со која се обезбедува правна основа профитот од замрзнатите руски средства да се користи за воена помош за Украина, а во јуни минатата година лидерите на Г7 се согласија да му дадат на Киев заем од 50 милијарди долари (47,7 милијарди евра), делумно финансиран од каматите од замрзнатите руски средства.
„Минатата година на ноемврискиот самит на Г20 во Рио де Жанеиро беше констатирана сумата на воените трошоци во светот – 2,4 трилиона долари“, рече Лавров.
Рускиот министер за надворешни работи рече и дека „во овие услови, пред сѐ, благодарение на напорите на земјите од БРИКС и нивните истомисленици, Г20 продолжува да го одржува статусот на корисна платформа за развој на разни нивоа на државите“.
Лавров потсети дека во 2024 година лидерите на земјите од БРИКС едногласно и недвосмислено се залагаа, земјите од јужната хемисфера да добијат „вистинска потпора на влијание врз активностите на мултилатералните институции, особено Меѓународниот монетарен фонд и Светската банка, сразмерно на нивната тежина и да се осигурат дека нивните потреби се земаат предвид во Светската трговска организација“.
„Сега мораме да ги исполниме договорите, а Русија ќе направи сѐ за да биде полесно“, нагласи Лавров.
Свет
Порошенко до Зеленски: Престани да се однесуваш како да си на стадион

Поранешниот украински претседател Петро Порошенко се осврна на сѐ позатегнатите односи меѓу Доналд Трамп и Володимир Зеленски. Тој го повика својот наследник на чело на Украина да избере помек пристап во односите со САД.
Порошенко беше претседател од 2014 до 2019 година, а сега е лидер на опозицијата во парламентот. Тој останува политички ривал на Володимир Зеленски, кој убедливо го победи на изборите во 2019 година. Зборувајќи за растечките тензии меѓу Украина и САД, тој рече дека Зеленски треба да престане да се однесува како на стадион.
„Овој облик на борба не е во корист на Украина, без разлика колку се елоквентни аргументите. Разговорот со Трамп бара дипломатско мајсторство, трпение и смиреност за да не се реагира на секоја негова изјава. Подготвен сум да одам во Брисел или дури и во Вашингтон за да ја спасам ситуацијата“, додаде Порошенко.
Свет
Израел се очекува утре да ослободи 602 палестински затвореници во замена за 6 заложници

Израел се очекува утре да ослободи вкупно 602 палестински затвореници од израелските затвори откога палестинската милитантна група Хамас ослободи шест израелски заложници од Појасот Газа, соопшти денеска Канцеларијата за медиуми на палестинските затвореници (АСРА).
Во соопштението се наведува дека утре ќе бидат ослободени 50 палестински затвореници, кои беа осудени на доживотен затвор, 60 осудени на долги казни, 47, кои беа повторно уапсени откога беа ослободени во рамките на размената на затвореници во 2011 година, како и преостанатите 445 затвореници од Појасот Газа, кои беа уапсени по нападот на Хамас на југот на Израел на 7 октомври 2023 година, јави „Ал џезира“, пренесува „Танјуг“.
Размената на заложниците за палестинските затвореници се врши врз основа на трифазен договор за прекин на огнот меѓу Израел и Хамас во Појасот Газа, кој стапи во сила на 19 јануари.
Планирано е во првата фаза да бидат ослободени вкупно 33 заложници.