Свет
Транснистрија побара од Русија да го зголеми бројот на мировници
Властите на молдавскиот отцепен регион Транснистрија (непризнатата Приднестровка Молдавска Република) бараат од Русија да го зголеми бројот на мировници, пренесува „Анадолија“.
Леонид Манаков, шеф на канцеларијата на Транснистрија во Русија, вели дека ова е оправдано со оглед на зголемувањето на безбедносните ризици.
„Мировниците се главниот безбедносен фактор на (бреговите на) Днестар и претставуваат главна пречка за Украина и Молдавија. Сè додека руската мировна мисија продолжува, Молдавија не може да крои никакви воени планови и подготовки против Приднестровие“, вели тој.
Според Манаков, зголемувањето на бројот на руските мировници е законски можно и дека таквата опција е оправдана во случај на провокации и терористички закани, но и на сметка на Русите што живеат во Транснистрија.
„Русија уште во 1995 година со еднострана одлука, што не беше договорена на ниво на заедничката комисија за контрола, го намали бројот на сопствениот контингент на два мотострелачки баталјона иако првично имаше шест. Во моментот во безбедносната зона во Транснистрија постојано се ангажирани најмногу 450 руски мировници. Нивниот редовен број, пропишан со документите на комисијата, би требало да изнесува 3.100“, истакна Манаков во интервју за РИА.
Отцепениот регион Транснистрија, во кој 60 отсто од жителите се Руси и Украинци, е меѓународно признат како дел од Молдавија, но е под контрола на проруските сепаратисти по двегодишниот конфликт и неуспешниот обид на молдавските власти да го решат проблемот со сила во 1990-1992 година.
Руските мировни сили се таму од 1992 година – кога заврши активната фаза на воениот конфликт во регионот – како дел од заедничката комисија за контрола, заеднички сили во регионот составени од руски, молдавски и транснистриски мировници.
Во Транснистрија, која бараше отцепување од Молдавија уште пред распадот на СССР плашејќи се дека Молдавија ќе ѝ се придружи на Романија во бранот национализам, е распоредена и оперативна група руски војници, која ги чува оружјето и муницијата и помага во спроведувањето на мировната мисија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Загинаа две лица, а пет се водат како исчезнати по судар на чамец и крузер во Дунав кај Будимпешта
Две лица го загубија животот доцна синоќа, а пет се водат за исчезнати во судар на мал моторен чамец и крузер на реката Дунав северно од Будимпешта, соопшти денеска унгарската полиција.
Телата на возрасен маж и жена се пронајдени северно од главниот град, а властите се уште трагаат по пет исчезнати лица.
Сома Чечи, портпарол на полицијата во Будимпешта, на прес-конференција рече дека, според досегашните сознанија, во чамецот имало вкупно осум возрасни лица и потврди дека две лица загинале, а пет се водат како исчезнати. Тројца мажи и две жени моментално се бараат со глисери и дронови, јавуваат унгарските медиуми.
Полицијата соопшти и дека во градот Комаром бил запрен поголем брод, а од увидот било откриено дека му е оштетен страничниот дел. Се врши увид и во тек е истрага за опасноста по водениот пат и смртта на неколку лица.
Регион
По обидот за атентат словачкиот премиер Фицо е надвор од животна опасност
Словачкиот премиер Роберт Фицо е надвор од животна опасност по обидот за атентат, изјави денеска министерот за одбрана и вицепремиер Роберт Калинак за словачката новинска агенција ТАСР.
Состојбата на Фицо се подобрува, а лекарската комисија утре треба да одлучи дали тој ќе биде префрлен. Фицо моментално се опоравува во универзитетската болница во Банска Бистрица.
Фицо беше тешко повреден на 15 мај, по седницата на Владата во градот Хандлова, кога 71-годишниот писател Јурај Цинтула, од непосредна близина неколку пати пукаше со пиштол во него. Специјалниот кривичен суд во словачкиот град Пезинок, со силно полициско обезбедување вчера му одреди притвор на Цинтула.
Свет
Девојка од Чикаго на 17 години стана доктор на науки
Дороти Џин Тилман од Чикаго стана најмладата личност, на 17 години, што успеа да се здобие со докторска диплома за интегрирано бихевиорално здравје во Аризона.
„Ова е прекрасна прослава и се надеваме дека Дороти Џин ќе инспирира повеќе студенти. Но, ова е нешто многу ретко и уникатно“, вели вонредниот професор Лесли Менсон.
Кога повеќето ученици се обидуваат да се адаптираат во средно училиште, Дороти веќе беше запишана на колеџот во Лејк Каунти во северен Илиноис, каде што дипломира психологија.
Во 2018 година таа дипломира на отсекот хуманитарни науки на колеџот „Екселсиор“ во Њујорк. Две години подоцна, магистрира на колеџот „Јунити“ во Мејн пред да биде примена на Програмата за бихевиорално управување.
Поголемиот дел од нејзиното образование го реализира на далечина, преку онлајн настава.
Како што вели таа, најголема заслуга за целото нејзино образование има нејзината баба, како и нејзината мајка, на која е благодарна за помошта и насочувањето. Секако, целиот образовен процес не бил без жртва.
„Немав секојдневна училишна работа, немав училишно фотографирање или работи кои создаваат единство меѓу врсниците “, вели таа.