Дебатата за миграцијата во Германија повторно се разгоре денеска откако авион со 138 лица кои побегнаа од Авганистан и беа класифицирани како ранливи, слета во Германија, јавува ДВ.

Конзервативната ЦДУ, чиј лидер Фридрих Мерц е кандидат за нов канцелар, ја обвини коалицијата во заминување дека пред промената на власта ги забрзала таканаречените летови за прием на бегалци, што според нив ја зајакнува поддршката за екстремната десница.

Сепак, властите посочуваат дека сите патници од овој лет веќе добиле одобрение за влез во земјата, а застапниците го потсетуваат Берлин на неговата хуманитарна обврска кон луѓето кои сега се во опасност во Авганистан, бидејќи работеле за германската армија или институции пред талибанското преземање на Кабул.

Според податоците, меѓу патниците имало 45 деца и млади лица, а од останатите возрасни 76 се жени и 62 мажи. Се наведува дека сите патници се од различни програми и дека имаат законски обврзувачка гаранција за прифаќање. Авионот, изнајмен од федералната влада, полетал од Исламабад, Пакистан.

„Во овие случаи има конкретни, претходни гаранции од Германија“, потенцираше портпаролот на МВР, додавајќи дека безбедноста е приоритет, па секој поединец е темелно проверен пред да влезе.

Три вакви летови слетале во Германија во февруари и март, а од Авганистан годинава пристигнале вкупно 461 лице. Меѓу пристигнатите има поранешни вработени во германските институции и нивни роднини, како и Авганистанци прогонувани од талибанците, меѓу кои и поранешни адвокати и новинари. Според податоците на Министерството за надворешни работи, околу 2.600 особено ранливи лица од Авганистан во моментов чекаат во Пакистан да влезат во Германија, јави ДВ.

Новата коалиција на ЦДУ/ЦСУ и СПД планира да ги укине доброволните федерални програми за прифаќање и нема намера да започнува нови. Експертот за внатрешни работи на ЦДУ, Александар Тром, рече дека таквите програми ќе бидат укинати „колку што е можно повеќе“. Поранешниот претседател на Бундестагот Бербел Бас (СПД) не ја отфрли можноста Германија сепак да прима бегалци од Авганистан, во зависност од правните прашања и договорите со партнерите.

Претставникот на Зелените, Константин фон Ноц, ги бранеше летовите, нагласувајќи дека сите патници поминале строги безбедносни проверки и имаат законски обврзувачка гаранција од Германија и дека откажувањето на програмата би значело „свесно прекршување на ветувањето и отфрлање на човештвото“.

Фридрих Мерц најави построги мерки против нередовните пристигнувања и зголемени депортации, откако АфД стана втората најсилна партија во парламентот на бранот антиимигрантски чувства.

Американскиот претседател Доналд Трамп и италијанскaта премиерка Џорџа Мелони се сретнаа денеска во Вашингтон, каде што ја истакнаа важноста од зајакнување на односите меѓу САД и Италија и најавија склучување на нов трговски договор пред средбата, пишува Би-Би-Си.

Трамп нагласи дека „сто проценти ќе има трговски договор“ и ја пофали Мелони како „одличен премиер и вистински светски лидер“. Мелони изрази уверување дека е можно да се постигне договор, нагласувајќи ја важноста од искрен дијалог и заедничко зајакнување на двете земји.

Главна тема на разговорот била трговската политика, а Мелони најавила дека ќе се обиде да спречи трговска војна меѓу САД и ЕУ и ќе го покани Трамп на средба со европските лидери во Италија.

Трамп рече дека САД немаат причина да се грижат за односите на нивните сојузници со Кина и најави можност да склучат „многу добар договор“ и со Пекинг.

Средбата меѓу Мелони и Трамп се смета за клучен момент за идните односи меѓу САД и Европа, особено во светло на најавените американски царини за европските производи.

Полицијата во Германија извршила претрес во куќата на тинејџер осомничен дека произведувал и чувал  исклучително отровна и смртоносна биолошка супстанца која се користи како воен агенс, пишува Си-Ен-Ен.

Според полицијата, 16-годишникот е осомничен дека произвел неколку ампули во импровизирана лабораторија на таванот на семејна куќа во Цајтајн, општина во сојузната покраина Саксонија во источна Германија.

Канцеларијата за криминални истраги на Саксонија започна истрага во соработка со државното правобранителство во Дрезден поради можно прекршување на германскиот Закон за воено оружје, кој го регулира производството и трговијата со супстанции кои се сметаат за воено оружје.

Полицијата соопшти дека во четвртокот во раните утрински часови почнала со претрес во домот на осомничениот со цел „да ги обезбеди сите отровни материи и други докази“. Инспекторите се уште не нашле докази за намерите на осомничениот во врска со тие отрови, соопшти полицијата.

Според досегашните сознанија од истрагата, нема законски основи за приведување на осомничениот согласно германскиот Закон за кривична постапка, а предвид е земен и Законот за малолетници, се наведува во соопштението.