Свет
Турција со борбени авиони нападна цели на Курдистанската работничка партија во Ирак
По бомбашкиот напад на главниот град на Турција, целите на Курдистанската работничка партија (ПКК) се уништени во воздушни напади на северот на Ирак, соопшти Министерството за внатрешни работи на Турција.
Турција објави дека со борбени авиони извршила напади врз курдски цели во северен Ирак по бомбашкиот напад врз зградата на владата во Анкара.
Турското Министерство за внатрешни работи соопшти дека околу 20 цели на забранетата Курдистанска работничка партија (ПКК) биле уништени во воздушниот напад, вклучувајќи засолништа и магацини.
Турската војска ги засили воздушните напади врз северните ирачки бази на ПКК, се вели во соопштението.
Нападите се случија неколку часа откако бомбаш самоубиец активира експлозив во близина на зградата на Министерството за внатрешни работи во Анкара, при што беа ранети двајца полицајци. Вториот напаѓач е убиен во престрелка со полицијата.
Новинска агенција блиска до ПКК соопшти дека групата ја презела одговорноста за самоубиствениот напад.
Во соопштението за печатот на новинската агенција АНФ се наведува дека нападот го извршила екипа поврзана со групата „Баталјонот на бесмртните“.
Турција, Соединетите Американски Држави и Европската Унија ја сметаат групата ПКК за терористичка организација.
Според турската државна агенција „Анадолија“, двајцата напаѓачи заплениле возило од ветеринар во централната провинција Кајсери, град што се наоѓа на 260 километри југоисточно од Анкара.
На снимката од надзорните камери се гледа како возилото застанува пред главниот влез на МВР, еден од патниците бргу оди кон зградата пред експлозијата, а другиот останал на улицата.
Едниот напаѓач загинал во експлозија, а другиот бил неутрализиран или убиен од властите, изјави министерот за внатрешни работи.
Нападот се случи неколку часа пред првата седница на парламентот по летниот одмор, на која требаше да се обрати претседателот Реџеп Таип Ердоган, кој рече дека експлозијата е „последниот обид“ за тероризирање на Турците.
„Оние што ги загрозуваат мирот и безбедноста на граѓаните потфрлија во намерата и никогаш нема да го направат“, рече тој.
ПКК и ИСИЛ во минатото извршија вакви напади во туристичките области и центрите на градовите во Турција. За време на серијата крвави инциденти во 2015 и 2016 година, Курдите, ИСИЛ и други групи ја презедоа одговорноста или беа обвинети за неколку напади во големите турски градови.
Новинарката на „Ал џезира“, Синем Косеоглу, која известува од Истанбул, рече дека по нападот, мерките за безбедност околу парламентот и зградите на Министерството за внатрешни работи се зголемени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Рјабков: Русија нема доверба во НАТО
Геополитичките проекти со НАТО сега се невозможни, Москва нема доверба во Алијансата и кај нас предизвикува политичка и емотивна одбивност, изјави денеска рускиот заменик министер за надворешни работи Сергеј Рјабков.
„Геополитички дизајн од секаков вид со НАТО е невозможен. НАТО не е пандан способен за преговори, тоа е групација во која не само што немаме ни најмала доверба, туку ни предизвикува политички и, дури би рекол, емотивна одбивност“, рече Рјабков во интервју за ТАСС.
Тој посочи дека Русија ќе работи со оние „кои се подготвени да преговараат на еднаква основа“.
„Големиот евроазиски простор, концептите на евроазиската безбедност, се она што доаѓа во центарот на вниманието на архитектонските проекти во однос на политиката и геополитиката. Според нас, тоа е она на што пред се треба да се фокусираме“, посочи Рјабков.
Свет
Ирански командант: Три европски земји ќе одговараат за помошта кон Израел
Командантот на силите Кудс, Есмаил Кани изјави дека трите европски земји кои ги распоредија своите воени авиони за да го одбранат Израел од одмаздничката операција организирана од Иран ќе одговараат.
– Франција, Германија и Велика Британија не треба да мислат дека распоредувањето на авионите таа ноќ е крај на проблемот. Да, таа ноќ заврши, но ќе одговорат во догледно време – изјави бригадниот генерал Есмаил Кани.
Според него, Соединетите Американски Држави и целата западна воена алијанса на НАТО придонеле со сите свои воени капацитети за одбрана на Израел од иранската операција „Вистинско ветување“, пренесува иранската агенција „Тасним“.
– Седум или осум поморски групи се распоредени во Црното Море за да се спречи (иранската) операција – рече тој, додавајќи дека во таа операција се вклучени и повеќе од 200 авиони.
Кани оцени дека Иран ја покажа својата сила, непоколебливост и моќ на целиот свет при нападот на територијата на Израел.
– Победата на операцијата „Вистинско ветување“ не е ограничена само на бројот на ракети и беспилотни летала кои стигнаа до окупираните територии – рече Кани и ги повика земјите од регионот да учат од, како што наведе, „неспособноста на САД да го заштитат израелскиот режим за време на иранската операција“ и да не се потпираат на Вашингтон.
На 13 април Техеран истрела повеќе од 300 беспилотни летала и проектили кон Израел, како одговор на нападот врз иранскиот конзулат во сирискиот главен град Дамаск на 1 април, кога беа убиени седум членови на Иранската револуционерна гарда.
Иран тврди дека нападот „Вистинско ветување“ предизвикал голема штета на израелските воени бази.
Регион
Изгласана новата влада на Хрватска: Пленковиќ по трет пат стана премиер
Пратениците во хрватскиот Сабор вечерва гласаа за доверба на новата влада на премиерот Андреј Пленковиќ. За доверба на Владата гласаа 79 пратеници, против беа 61 пратеник, а еден беше воздржан.
Претседателот и членовите на Владата потоа дадоа заклетва пред пратениците, со што Андреј Пленковиќ го започна третиот последователен мандат како премиер.
Во Собранието денеска беше претставена четиригодишната програма на новата Влада, која се заснова на „успешна, витална, праведна, одржлива и суверена Хрватска“.
Во новиот мандат, владата на Пленковиќ најавува просечна нето плата од 1.600 евра, минимална бруто плата од 1.250 евра, како и отворање на 125.000 нови работни места.
До крајот на мандатот на новата влада, пензиите треба да се зголемат за најмалку 30 отсто, со што просечната пензија би изнесувала најмалку 750 евра.
Новата влада наместо досегашните 16 ќе има 18 министерства и седум потпретседатели.