Свет
Уапсени родителите на тинејџерот кој изврши масакр во училиште во Мичиген

Џејмс и Џенифер Крамбли, родители на 15-годишниот Итан кој уби четворица ученици и рани седум други во масовно пукање во средно училиште во сојузната држава Мичиген, се уапсени откако нивниот автомобил бил забележан во Детроит, пренесува „Вашингтон пост“.
Тие се обвинети по четири точки од обвинението, а четири дена пред крвопролевањето Џејмс Крамбли, заедно со неговиот син, купил пиштол со кој Итан го изврши масакрот.
Возило кое одговара на описот на црниот автомобил Киа Селтос, управуван од брачниот пар Крамбли, е пронајдено во Детроит, на шеесетина километри од Оксфорд, местото на смртоносното пукање, соопштила полицијата.
Полицијата ги уапсила Џејмс и Џенифер, кои се товарат за убиство од небрежност, а нивното возило го забележал сопственикот на локалната компанија. Пријавено е дека жената побегнала пеш откако полицијата добила дојава за сомнителен автомобил. Двојката ќе биде пренесена во затворот во округот Окленд.
По обвинувањата за убиство од небрежност, обвинителката на округот Оукленд, Карен Мекдоналд, споделила застрашувачки нови детали за однесувањето на родителите на Итан.
На денот на пукањето, Џејмс и Џенифер Крамбли биле поканети на разговор во училиштето поради загрижувачкото однесување на нивниот син. Имено, наставничката на бирото на Итан пронашла цртеж со пиштол, раскрварена личност и порака „Помогни ми“.
Крембли се спротивставиле на идејата нивниот син да го напушти училиштето, па наместо тоа, Итан се вратил на час со својот ранец во кој го скрил пиштолот, кој претходно никој не го прегледал. Неполни три часа подоцна била повикана брза помош поради пукање во училиштето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Обвинетиот за убиството на Сара во Италија пронајден мртов во затвор

Стефано Аргентино (27), кој беше во затвор поради обвинение за убиство на студентката Сара Кампанеле (22) во Италија, е пронајден мртов во затворот во Месина.
Младиот човек, кој беше обвинет дека ја избодел Сара до смрт на 31 март оваа година, наводно извршил самоубиство. Тој бил пронајден обесен.
Според италијанските медиуми, Аргентино и претходно покажувал суицидни намери и поради тоа бил ставен под строг надзор. Сепак, неодамна бил вратен во ќелија со двајца цимери и повторно почнал да јаде, што било протолкувано како знак дека неговата состојба се стабилизирала.
Според извори од синдикатот на затворската полиција, тој бил отстранет од надзорот пред 15 дена.
Самоубиството се случило околу 17 часот, откако младиот човек се оддалечил од своите цимери. Обидите за спасување не биле успешни.
Првото судење за убиството на Сара Кампанеле, кое го шокираше италијанското јавно мислење, е закажано за 10 септември.
Сара Кампанеле, колешка на Аргентино од факултет, беше избодена. Тој беше уапсен истата вечер откако ја уби. Карабињерите го следеле и го уапсиле, а тој го признал убиството.
Изјавил пред обвинителите дека ѝ пришол на денот на злосторството за да ја праша за операцијата што ја имала и зошто не му одговорила на пораката што ѝ ја испратил во јануари. Сара, која Аргентино ја следел две години, штотуку излегла од предавање и сфатила дека е следена.
Свет
Зеленски ги објави петте приоритети за украинската одбрана – 50 отсто домашно оружје на фронтот

Претседателот на Украина, Володимир Зеленски, ги претстави петте клучни приоритети на Министерството за одбрана, меѓу кои се зголемување на учеството на домашно оружје на фронтот, дигитализација, намалување на бирократијата, како и решавање на персоналните прашања во украинските вооружени сили.
„Во регионот Суми беше поднесен извештај од министерот за одбрана Денис Шмихал за реформата на министерството. Првиот приоритет се однесува на максимален број нарачки од украинските производители, со цел 50 проценти од оружјето на фронтот да биде од наша продукција“, истакна Зеленски во своето синоќешно видео-обраќање.
Тој исто така ја нагласи потребата од развој на дигитални услуги и сите системи, вклучително и системот „Делта“. Според зборовите на Зеленски, неопходно е и намалување на бирократијата и воспоставување јасна комуникација со бригадите и единиците во врска со нивните потреби.
„На петтото место е целиот комплекс прашања поврзани со персоналот. Сите сме запознаени со овој проблем. Министерството за одбрана, заедно со армијата, мора да го реши тоа“, порача тој, пренесе агенцијата Укринформ.
Претседателот на Украина, за време на посетата на регионот Суми, одржа состанок со врховниот командант на армијата, Олександр Сирски, министерот за одбрана Шмихал и командантот на воздухопловните сили, Олег Апостол. Зеленски, по повод годишнината од почетокот на операцијата во регионот Курск, се сретна во Суми и со војниците од 225. јуришен полк, пренесе украинската агенција.
Свет
Обид за ангажирање платен убиец: Маж планирал атентат врз Орбан

Спречен е маж поради наводно планирање заговор за атентат врз унгарскиот премиер Виктор Орбан, објави синоќа Националното истражно биро на земјата.
Унгарската полиција соопшти дека мажот се регистрирал на веб-страница хостирана на сервер во странство со цел да пронајде лице кое е подготвено да го убие Орбан за парична награда, објави МТИ.
Тој наводно објавил на веб-страница во јули 2025 година дека е подготвен да плати за „најдобриот платен убиец“ подготвен да го убие унгарскиот премиер Виктор Орбан, се вели во соопштението на Националното истражно биро.
Човекот кој беше идентификуван со помош на Унгарските антитерористички сили (ТЕК) по апсењето, го призна злосторството за кое е обвинет.