Свет
Уапсен шведски политичар под сомнение за шверц на мигранти
Шведскиот политичар роден во Сирија, Рашад Аласаад, кој ја претставуваше владејачката Социјалдемократска партија во градот Јунгби во округот Кроноберг во Шведска, е уапсен под сомнение дека шверцувал мигранти, пренесува весникот „Експресен“.
Во средата десетта полицајци во цивил влегле во домот на Аласаад и го уапсиле, објави весникот „Експресен“.
„Лицето е приведено на испрашување. Сомнежот е трговија со луѓе“, изјави портпаролот на полицијата, Ева-Гун Вестфорд.
Тарифата за шверц на Аласаад се движела меѓу 2.000 и 3.000 американски долари. Тој исто така признал дека парите се главната причина што стојат зад неговата шема, чиј обем допрва треба да се утврди.
Претходно, „Експресен“ откри дека Аласаад, кој влегол во локалниот совет по изборите во 2018 година, се понудил да шверцува луѓе во Шведска во замена за пари. На средба со репортер на „Експресен“ во грчкиот пристаништен град Ханија, на островот Крит, која била снимена со скриена камера, тој се пошегувал дека веќе шверцувал голем број луѓе. По добиените сознанија, граничната полиција почнала прелиминарна истрага за трговија со луѓе.
Кога се соочил со доказите, Аласаад признал за ценовникот за шверц според кој наплаќал 20.000 шведски круни (2.120 долари) за дете и 30.000 круни (3.180 долари) за возрасен. Според „Експресен“, Аласаад објавувал реклами на „Фејсбук“ под лажно име нудејќи шверц на мигранти од Грција во Шведска со помош на позајмени пасоши.
„Само тие што се во Грција. На продажба се сириски пасоши со шведски дозволи за престој. Само за оние што изгледаат како носители на пасоши“, напишал тој на „Фејсбук“.
Аласаад рече дека и самиот дошол во Шведска користејќи ја рутата на шверцерите од Истанбул на крајот на 2013 година, а потоа признал дека им помогнал на многу мигранти да стигнат во Шведска, без да го прецизира нивниот број.
„Да, јас го извлеков целото мое семејство. Извлеков многу луѓе. Воопшто не е тешко. Ќе ви кажам и зошто го правам тоа. Да бидам искрен, главната причина се парите. Сакам пари“, вели Аласаад.
Во пролетта 2018 година, кога Аласаад се најде на гласачкото ливче на социјалдемократите, локалниот претседател на партијата, Магнус Карлсон, го опишала како добра мешавина на млади луѓе од други култури. По откривањето, тој се повлече од функцијата. Аласаад претходно работел во повеќе владини агенции, вклучувајќи ги Заводот за социјално осигурување, Шведската даночна агенција и Државниот пензиски фонд.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп вели дека Украина не изразила никаква благодарност за напорите на САД
Американскиот претседател Доналд Трамп денеска изјави дека Украина не изразила никаква благодарност за напорите на САД.
-„Лидерството“ на Украина изрази нулта благодарност за нашите напори, а Европа продолжува да купува нафта од Русија. САД продолжуваат да продаваат огромни количини оружје на НАТО, за дистрибуција во Украина (измамникот Џо даде сè, бесплатно, вклучително и „големи“ пари), напиша Трамп на платформата „Truth social“.
Тој ја даде изјавата додека високи функционери од САД, Украина и советниците за национална безбедност на Франција, Велика Британија и Германија разговараат за нацрт-планот на САД за завршување на војната во Украина во Женева.
-Војната меѓу Русија и Украина е насилна и ужасна војна која, со силно и вистинско американско и украинско лидерство, никогаш немаше да се случи. Започна долго пред да го земам мојот втор мандат, за време на администрацијата на заспаниот Џо Бајден, и само се влоши, рече Трамп.
„Доколку претседателските избори во 2020 година не беа наместени и украдени, немаше да има војна меѓу Украина и Русија…Наследив војна што никогаш не требаше да се случи, војна што е губитничка за сите, особено за милионите луѓе што толку непотребно загинаа, заклучи Трамп.
Свет
Зеленски: Мировниот план на САД може да вклучува елементи од клучно значење за Украина
Предлогот на САД за запирање на војната во Украина може да вклучува делови што се засноваат на украинските перспективи и се од клучно значење за украинските национални интереси, изјави денеска претседателот на земјата, Володимир Зеленски.
„Веќе имаме кратка информација од членовите на делегацијата за резултатите од првиот состанок и првите преговори“, напиша Зеленски на „Х“ за разговорите со ЕУ и САД во Женева.
-Работата продолжува за постигнување на главната цел што ја очекува нашиот народ: да се стави крај на крвопролевањето и војната, додаде тој.
Во исто време, американскиот претседател Доналд Трамп изјави дека украинските власти не изразиле никаква благодарност за напорите на САД по ова прашање, а Европа продолжува да купува нафта од Русија.
Свет
Фон дер Лајен: ЕУ мора да игра централна улога во обезбедувањето мир во Украина
Претседателката на Европската комисија (ЕК), Урсула фон дер Лајен, денеска изјави дека ЕУ мора да игра „централна улога“ во обезбедувањето мир во Украина и дека ова е еден од главните елементи за „праведен и траен мир и суверенитет на Украина“.
Делегација од Украина, европски безбедносни претставници и американска делегација предводена од државниот секретар Марко Рубио денеска се среќаваат во Женева за да разговараат за неодамна протечениот предлог на САД за прекин на војната во Украина.
Во соопштение објавено на веб-страницата на ЕК, фон дер Лајен изјави дека одржливиот мировен план, покрај запирањето на војната, не смее „да сее семе на иден конфликт“.
Таа додаде дека „границите не можат да се менуваат со сила“ и го отфрли ограничувањето на персоналот во украинската армија, што е една од точките на протечениот мировен план.
-Не може да има ограничувања на украинските вооружени сили што би ја направиле земјата ранлива на идни напади и со тоа би ја поткопале европската безбедност, се вели во соопштението.
Фон дер Лајен изјави дека „Украина мора да има слобода и суверено право да ја избере својата судбина“ и дека избрала „европска судбина“, додавајќи дека ЕУ ќе продолжи да работи со Украина, коалицијата на земји што ја поддржуваат Украина и САД за да се постигне „вистински напредок кон мирот“.
Таа изјави дека „клучен елемент“ на мировниот договор мора да биде и „враќањето на секое украинско дете киднапирано од Русија“.

