Европа
Украина: Русите ги фатија севернокорејските војници кои побегнаа од својата позиција во Курск

Руските власти заробија 18 севернокорејски војници, кои ги напуштија своите позиции во руската област Курск, изјави денеска за „Киев индипендент“ извор од украинската воена разузнавачка служба.
Да потсетиме дека Киев неодамна објави дека Северна Кореја се подготвува да распореди околу 11.000 војници на почетокот на ноември за да ѝ помогне на Русија во војната против Украина додавајќи дека некои веќе пристигнале.
Осумнаесет војници ги напуштија своите позиции во руските региони во близина на украинската граница, објави украинскиот јавен радиодифузен сервис „Суспилне“ пред една недела цитирајќи неименувани разузнавачки претставници.
Други украински медиуми, повикувајќи се на извор од воено разузнавање, објавија дека 40-ина севернокорејски војници пристигнале во Русија за да разменат знаење со нивните руски колеги.
По обуката, 18 Севернокорејци беа оставени во шума во областа Курск неколку дена без храна и инструкции, што доведе до тоа да ја напуштат својата позиција за да ја најдат руската команда на 14 октомври.
Два дена подоцна руските власти ги пронајдоа и ги приведоа исчезнатите војници на приближно 60 километри од нивната првобитна позиција, јавуваат украинските медиуми.
Јужна Кореја го потврди трансферот на севернокорејски воен персонал во Русија. Претседателот на Комитетот за разузнавање на САД, Мајкл Р. Тарнер, рече дека таквиот чекор мора да претставува „црвена линија за Соединетите Америкснски Држави и НАТО“ повикувајќи на итна акција.
Видеото објавено од украинските власти во петокот наводно покажува севернокорејски војници во руски воен камп како примаат опрема и се подготвуваат да се распоредат против украинските сили.
Русија и Северна Кореја ја продлабочија својата соработка за време на сеопфатната војна против Украина, при што Москва доби обемни пакети артилериски гранати и балистички ракети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Лавров: Шефовите на делегациите беа во контакт, очекувам преговорите со Украина да продолжат

Рускиот министер за надворешни работи Сергеј Лавров денес изјави дека Москва очекува преговорите меѓу Русија и Украина да продолжат, но дека мора да се признаат „нови територијални реалности“ и да се формираат нови системи за безбедносни гаранции.
„За мирот да биде одржлив, новите територијални реалности мора да се признаат и формализираат во меѓународното право“, рече Лавров во интервју за индонезискиот весник „Компас“.
Индиректно реферирајќи на континуираното противење на Москва на приклучувањето на Украина кон НАТО, Лавров рече дека „на Украина треба да ѝ се гарантира неутрален, неврзан и ненуклеарен статус“.
Украина вели дека не е до Русија да одлучува во што Киев може, а што не може да се приклучи, додека НАТО вели дека Русија не може да има вето врз членството во алијансата, која беше основана во 1949 година за да се спротивстави на заканата што ја претставуваше Советскиот Сојуз.
Лавров рече дека шефовите на руската и украинската делегација биле во директен контакт и дека очекува разговорите да продолжат.
фото: принтскрин
Европа
(Видео) Големо невреме во Трст: поплавени улици, водата ги носеше автомобилите

Големо невреме со грмотевици го погоди Трст вчера вечер, околу 19 часот. За само неколку минути, наврнаа приближно 40 милиметри дожд на квадратен метар.
На многу улици, водата ги крена капаците на шахтите или однесе канти за ѓубре. Поројот однесе и возила, објави Индекс.хр.
Flooding in Trieste in northeast Italy this evening…🌊pic.twitter.com/dtH3w1Pvbh
— Volcaholic 🌋 (@volcaholic1) September 2, 2025
Интернет и телефонските врски биле во прекин подолго време. Електричната енергија беше во прекин на некои улици во центарот на градот. Противпожарната служба имаше десетици интервенции поради луѓе заглавени во лифтови, автомобили заглавени во вода и поплавени подруми и куќи.
Severe flooding in Trieste, Italy today. (Sep 02)
📹Revoltella via Laura_Mlb7 pic.twitter.com/BdPP2w8ODZ
— Weather Monitor (@WeatherMonitors) September 2, 2025
Потпорен ѕид се урна, оштетувајќи автомобил. Инцидентот се случил кратко по 21 часот, кога жителите во областа слушнале силен тресок.
Во тој момент никој не поминувал покрај ѕидот. Имало материјална штета, но луѓето што живеат во блиските згради биле во страв. Пожарникарите веднаш пристигнале на местото на настанот за да го обезбедат местото и да спречат понатамошни уривања.
фото: принтскрин
Европа
Фицо по средбата со Путин: Имам неколку пораки за Зеленски

Словачкиот премиер Роберт Фицо изјави дека по средбата со рускиот претседател Владимир Путин во Кина, имал „неколку заклучоци и пораки“ што сакал да му ги пренесе на украинскиот претседател Володимир Зеленски.
Тој рече дека неговата средба со Путин траела еден час и главно била за војната во Украина. Словачкиот премиер истакна дека за време на средбата, Путин го информирал за разговорите со американскиот претседател Доналд Трамп во Алјаска и за „перспективите за завршување“ на војната.
„Извлеков неколку заклучоци и пораки од овој важен разговор што имам намера да му ги пренесам на украинскиот претседател Зеленски в петок“, нагласи Фицо.
Тој исто така рече дека очекува многу повици од други европски лидери.
Фицо пристигна во Кина за да присуствува на најголемата воена парада во историјата на земјата.
Откако се врати на функцијата во 2023 година, Фицо ја прекина воената помош за Украина од словачките воени резерви и ги доведе во прашање европските санкции кон Русија. Фицо, исто така, во минатото вети дека ќе го блокира влезот на Украина во НАТО. Членството во НАТО бара согласност од сите земји-членки.
Путин и Фицо последен пат се сретнаа во Москва во мај за време на прославите на Денот на победата во Русија. Додека односите меѓу Братислава и Москва продолжуваат да се продлабочуваат, европските сојузници продолжуваат да ги критикуваат Фицо и унгарскиот премиер Виктор Орбан за нивниот пристап кон Русија.
фото: принтскрин