Европа
Украина: Севернокорејците се вратија во Курск, напаѓаа 16 часа без престан
Руската армија повторно ангажираше единици на севернокорејската армија во напади врз украинските позиции во областа Курск, соопшти прес-службата на 47-та механизирана украинска бригада.
Единиците на 47. механизирана бригада, заедно со соседните единици, велат дека успешно го спречиле масовниот напад на нивните позиции во областа Курск. Според извештајот на бригадата, непријателот користел нова тактика за напад, за разлика од претходните напади со оклопни возила. Овој пат нападите беа извршени исклучиво од пешадија.
Како што информираат Украинците, нападот започнал со подготовки во доцните вечерни часови, а непријателот заземал позиции пред полноќ. Самиот напад започнал точно на полноќ и траел 16 часа. Непријателските сили нападнале во неколку бранови користејќи масивни групи пешадија, кои се обиделе да ја пробијат украинската одбрана од повеќе правци истовремено.
Украинските одбранбени сили користеле артилерија, беспилотни летала и оклопни возила, вклучително и американски Бредли, за да го одбијат нападот. Особено беше истакната употребата на артилерија со касетна муниција.
„Непријателот напредуваше низ полиња и отворени области користејќи колички влечени за транспорт на војници, кои беа истоварени во тесните шумски предели за да се скријат под дрвјата“, соопшти прес-службата на 47. механизирана бригада.
Според соопштението, Севернокорејците претрпеле големи загуби во овој напад. Militarnyi претходно објави дека севернокорејската војска повторно почнала да учествува во нападите на украинските позиции во областа Курск, потврдувајќи го присуството на странски воени сили на страната на Русија.
Според украинскиот претседател Володимир Зеленски, борбите во Русија, особено во регионот Курск, се од клучно значење бидејќи го запреле прераспоредувањето на околу 60.000 руски војници.
„Поради борбите во Курск, овие сили не беа префрлени во Покровск и другите области на Доњецката област, што е важно за продолжување на одбраната на овие клучни точки“, истакна украинскиот претседател.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Орбан: Европејците сакаат да започнат војна, ние не сакаме да се бориме
Унгарскиот премиер Виктор Орбан најави започнување на антивоена кампања, која ќе биде придружена со мировни собири низ цела Унгарија.
„Опасноста од ширење на војната е поголема од кога било. Европејците сакаат да започнат војна. И ние сме Европејци, но не сакаме да се бориме“, рече Орбан во видео порака емитувана од телевизискиот канал М1.
„Почнуваме антивоена кампања“, рече тој, додавајќи дека заедно со поддржувачите на мирот ќе одржи „серија антивоени акции“ низ целата земја. Според него, акциите ќе започнат на 15 ноември од градот Ѓер во северозападна Унгарија.
„Да му покажеме на целиот свет дека Унгарија не сака војна“, им се обрати Орбан на своите сонародници.
Тој потсети дека на 23 октомври во Будимпешта се одржаа Марш на мирот и антивоен митинг, на кој, според организаторите, се собраа 80.000 луѓе. „Мировниот марш беше фантастичен успех. Многумина од нас се изјаснија против војната и за мир. Ви благодариме на сите што бевте таму“, рече Орбан.
Се огласи и унгарскиот министер за надворешни работи Петер Сијарто, кој рече дека дефинитивно ќе се приклучи на антивоената кампања и ќе присуствува на митингот во Ѓер.
фото: принтскрин
Европа
Белгиски министер: Ќе ја срамниме Москва со земја ако го нападнат Брисел
Белгискиот министер за одбрана, Тео Франкен, тврди дека НАТО ќе ја „срамни со земја Москва“ доколку Русија некогаш го нападне Брисел. Во опширно интервју, Франкен се осврна на низа итни стратешки прашања, вклучувајќи ја војната во Украина, европската одбрана и нуклеарното одвраќање, објави „The Brussels Times“.
Кога директно го прашаа дали се плаши дека рускиот претседател Владимир Путин може да започне конвенционален ракетен напад врз Брисел, неговиот одговор беше недвосмислен: „Не, бидејќи тогаш тој би го погодил срцето на НАТО, а потоа ние би ја срамниле Москва со земја“.
Франкен изрази силна поддршка за американското лидерство во рамките на НАТО и ја повтори својата доверба во Член 5, клаузулата за заемна одбрана што е основа на Алијансата.
На прашањето дали американскиот претседател Доналд Трамп би го почитувал Член 5, Франкен одговори потврдно. „Секако дека би го сторил тоа. Во Европа има многу предрасуди против американската влада. Зошто не би го почитувал Член 5?“

Франкен рече дека е повеќе загрижен за употребата на хибридно војување од страна на Русија отколку за заканата од конвенционален напад. „Крстосувачки проектил врз Брисел? Јасно е дека тоа би го активирало Член 5, без разлика која дефиниција ја користите. Путин нема да го стори тоа“, рече тој.
„Повеќе сум склон кон сценарио со сива зона: ‘мали зелени луѓе’ кои го поттикнуваат рускојазичното малцинство во Естонија против „нацистичкиот режим“. Пред да се свестите, тие анексираа дел од Естонија“, објасни министерот.
Министерот за одбрана не покажа ентузијазам за идејата за заедничка европска армија. Тој ги критикуваше поголемите европски земји за „максимизирање на сопствените пазари“ и праша како земјите кои во моментов не можат ниту да соработуваат во набавката на одбранбена опрема би можеле да ги интегрираат своите национални армии.
„Секој што верува во европска армија продава магла“, рече тој. „За среќа, го имаме НАТО, кој повторно ја докажа својата ефикасност со воздушната одбрана во Полска и Естонија“.
фото: принтскрин
Европа
(Видео) Руски дрон се упати кон новинарска екипа, украински војник го собори со пушка
Во украинскиот град Константинивка руски ФПВ-дрон се обиде да нападне новинарска екипа, но бргу беше запрен од портпаролот на 24. бригада, објави украинската војска.
Инцидентот се случил додека новинар на холандскиот весник „Хет Недерландс Дагблад“ ги снимал урнатините на црквата „Успение на Пресвета Богородица“, оштетена во претходните руски напади.
Додека екипата ја документирала штетата, руски дрон одеднаш се упатил кон нив. Портпаролот на 24. бригада, Олег Петрасјук, ја забележал заканата и пукал од својата пушка. По неколку истрели, тој успеал да го собори дронот.
Целиот инцидент е снимен и на видео, кое го прикажува моментот кога Петрасјук го забележува и го соборува дронот до оштетената црква.
фото: принтскрин

