Претседателот на Украина, Володимир Зеленски и претседателката на Европската комисија Урсула фон дер Лајен се потпишаа на украинското знаме пред почетокот на самитот ЕУ-Украина во Киев.

Во петок во Киев ќе се одржи самитот ЕУ-Украина, а во главниот град на Украина почнаа да пристигнуваат највисоките претставници на Брисел.

Премиерот Денис Шмихал изјави дека Украина поставила, како што рече, „амбициозна цел“ за влез во ЕУ за две години.

Но, група земји-членки предупредија дека на Киев треба јасно да му се стави до знаење дека тоа нема да биде можно.

Минатиот јуни Украина го доби статусот на кандидат за членство во ЕУ со рекордна брзина, што, како што тогаш изјави украинскиот претседател Володимир Зеленски, беше единствен и историски момент.

Иако тоа е првиот чекор кон членството, процесот обично трае многу години, а некои земји во моментов се во мирување, вклучително и земјите од Западен Балкан, пишува „Би-би-си“.

Во пресрет на самитот, Зеленски рече дека тоа ќе биде недела на евроинтеграции, а Киев ги очекува одлуките на партнерите од ЕУ во согласност со напредокот постигнат и покрај големата војна со Русија.

Сепак, малкумина во Брисел ја гледаат целта од две години како реална цел, со загриженост дека славните пораки од некои високи личности од ЕУ може да доведат до разочарување.

„Тоа не и’ треба на Украина“, рече еден дипломат од ЕУ.

Друг зборуваше за притисоците што доаѓаат од земји како Полска, за да се забрза процесот.

„Најмало отстапување од линијата се критикува дека е на погрешната страна на војната. Сè што мириса на критика на Украина речиси се смета за ерес или соработка со Русите“, додаде тој.

Нацрт соопштението на ЕУ, што ќе биде објавено по самитот, го повторува ветувањето дека иднината на Украина е во ЕУ и ги признава „значајните напори“ направени во последните месеци за исполнување на целите за поддршка на нејзиниот кандидатски статус и спроведување на реформите.

Но, извори за Би-Би-Си изјавија дека дел од изјавата е променета затоа што е премногу „напредна“.

Се наведува дека Франција, Германија, Италија и земјите од Бенелукс – Белгија, Луксембург и Холандија – предупредија на премногу оптимистичкиот тон.

Од идните членки на ЕУ се бара да се усогласат со правилата, законите и стандардите.

Реформските напори на Украина добија пофалби, но допрва треба да има јавна проценка на ЕУ за напредокот.

Нов бран антикорупциски рации беше спроведен во средата пред самитот, при што официјални лица објавија слики од претрес на домот на еден од најбогатите луѓе во земјата, Игор Коломојски.

Шмихал на каналот Телеграм рече дека Украина планира да ги спроведе сите седум препораки на Европската комисија, кои вклучуваат дополнителни мерки против корупцијата, заострување на законите против перење пари и прекумерно влијание на богатите олигарси во Украина.

Целта на самитот е ЕУ да покаже солидарност со Украина, истакнувајќи ја историската природа на одржување на таква средба во воена зона и испраќање политички сигнал до Русија дека поддршката за Киев не слабее.

Најавите ќе вклучуваат удвојување на мисијата на украинската воена обука на 30.000 војници и 25 милиони евра за помош за расчистување на нагазни мини на териториите ослободени од Украина.

Вестите за напредокот на Украина кон членството се очекуваат на пролет, а поформална проценка ќе следи подоцна во текот на годината.

Високи функционери велат дека идното членство на Украина не е доведено во прашање, но никој не е подготвен да даде точна временска рамка.