Европа
Украинскиот врховен командант: Бев во близина на Покровск, борбите се исклучително тешки

Врховниот командант на вооружените сили на Украина, Олександр Сирски, рече дека поминал неколку дена на источниот фронт кај Покровск и ги опиша борбите како „исклучително тешки“.
Во последните месеци, со големи напори, Русија полека, но постојано навлегува во стратешки важниот град Покровск во источниот украински регион Доњецк.
„Борбата е исклучително тешка. Непријателот прави се за да продолжи да се движи и да напредува, обидувајќи се да ја пробие нашата одбрана“, напиша Сирски на Фејсбук.
Најжестоките борби, додаде тој, се водат во областа Красни Јар, на околу 10 километри од Покровск. Тој, исто така, рече дека источните предградија на Хродивка, на помалку од девет километри од стратешката рута што ја поврзува Костјантинивка, се под силни напади.
Украинскиот претседател Володимир Зеленски изјави дека ситуацијата во Покровск е „исклучително тешка“, дека Киев дополнително ќе ги зајакне своите позиции и дека се размислува за „конкретни одбранбени акции“. Покровск се наоѓа на клучна сообраќајница што ја користи украинската армија за снабдување на други загрозени пунктови што ги држат Украинците, како што се градовите Часив Јар и Костијантинивка.
Покровск е патен и железнички центар и град со предвоено население од 60.000 луѓе, од кои десетици илјади остануваат иако се во тек големи евакуации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.
Европа
Зеленски: Подготвени сме да разговараме за територија, но само под еден услов

Украинскиот претседател Володимир Зеленски изјави денес дека Украина ќе биде подготвена да разговара за територијални прашања како дел од мировните преговори, но само откако Русија ќе се согласи на целосен и безусловен прекин на огнот.
„Целосно и безусловно примирје отвора можност да се разговара за сè“, изјави Зеленски пред новинарите во Киев.
Тој ја коментираше и изјавата на американскиот претседател Доналд Трамп, кој во интервју за „Тајм“ изјави дека „Крим ќе остане со Русија“.
„Она што го кажува претседателот Трамп е вистина. Се согласувам со него дека денес немаме доволно оружје за да ја вратиме контролата врз Кримскиот Полуостров“, рече Зеленски.
Да потсетиме дека украинските претставници претходно решително ја отфрлија можноста за какви било територијални отстапки во замена за мир со Русија.