Трошоците за обнова на украинската економија по завршувањето на војната се проценуваат на 524 милијарди долари, објавија денеска Светската банка, Обединетите нации, Европската комисија и владата во Киев.

Најтешко погодени сектори се домувањето, транспортот, енергетиката, трговијата и образованието, пишува „Ројтерс“.

Украинската влада, со поддршка од донатори, одвои речиси 7,4 милијарди долари за приоритетни потреби оваа година, но сè уште ѝ недостигаат речиси 10 милијарди долари.

Директната штета од руските напади достигна 176 милијарди долари, што е за 24 милијарди долари повеќе од пред една година.

Околу 13 отсто од станбениот фонд на Украина е оштетен или уништен погодувајќи повеќе од 2,5 милиона луѓе.

Во текот на изминатата година евидентирани се 70 отсто повеќе штети на енергетските постројки.

Беше наведено дека за реконструкција на станбениот сектор ќе бидат потребни речиси 84 милијарди евра, а само чистењето на урнатините ќе чини речиси 13 милијарди.

Потрагата по авионот на „Малезија ерлајнс“, кој исчезна со 239 луѓе во 2014 година, продолжи по речиси 11 години.

Патничкиот авион исчезна на несреќниот лет „MH370“ на 8 март 2014 година додека летал од главниот град на Малезија, Куала Лумпур, за Пекинг.

Исчезнувањето на „боингот 777“ без трага претставува една од најголемите мистерии во историјата на авијацијата.

Денес, 11 години подоцна, компанијата „Оушн инфинити“ почна нова потрага во Индискиот Океан во близина на брегот на Перт.

Австралискиот медиум „9 њуз“ објави дека бродот „армада 7806“ во текот на викендот пристигнал на дестинацијата за пребарување, која се наоѓа на речиси 1.500 километри од брегот на Перт.

Потрагата ќе опфати површина од 15.000 квадратни километри во следните шест недели.

Малезискиот министер за транспорт, Ентони Лок, во декември минатата година потврди дека „Оушн инфинити“ ќе почне потрага според договорот што го поврзува плаќањето исклучиво со пронаоѓање на остатоците од авионот.

Доколку ги пронајде остатоците, на компанијата ќе ѝ бидат исплатени 70 милиони долари, во спротивно нема да добие надомест за пребарувањето.

Кремљ го поздрави, како што рече, балансирниот став на САД за гласањето на Вашингтон во ОН, заедно со Москва, против резолуцијата за Украина подготвена од Киев и Европејците, со која се осудува рускиот напад врз земјата.

„Забележуваме дека САД усвојуваат многу побалансирана позиција, која реално се концентрира на напорите насочени кон решавање на украинскиот конфликт“, изјави за новинарите портпаролот на рускиот претседател, Дмитриј Песков.

„Го поздравуваме тоа. Оваа балансирана позиција сведочи за вистинската желба да се придонесе за решение“, додаде Песков.

Тој рече дека не гледа никакви знаци на рамнотежа меѓу Европејците, кои ја поддржаа резолуцијата за Украина, со која се осудува Москва, гласајќи против САД.

„Можно е по контактот меѓу Европејците и Американците, на еден или друг начин, Европа да гравитира кон поголема рамнотежа“, рече Песков.

Вчера, на третата годишнина од почетокот на руската инвазија на Украина ОН гласаа за три резолуции за земјата во две нејзини тела – Генералното собрание и Советот за безбедност – во гласањето што сигнализира пресврт на американската позиција по ова прашање.

Генералното собрание вчера усвои две резолуции, едната подготвена од Украина и европските земји, за кои САД гласаа против заедно со Русија и 16 други земји, и другата предложена од САД, но која беше ставена на гласање со многубројни амандмани за да вклучи осуда на Русија за конфликтот, а САД беа воздржани.

Потоа, САД го доставија својот оригинален текст на резолуцијата до 15-члениот Совет за безбедност на ОН, во кој се повикува на брз мир во Украина, без упатување на нејзиниот територијален интегритет или осуда на Русија, и беше изгласана од САД и Русија, а четири земји од ЕУ и Велика Британија беа воздржани. Ниту Франција ниту Велика Британија, две од петте постојани членки на Советот за безбедност (другите две се САД, Русија и Кина), не стави вето.