Околу 1.100 вагони со жито чекаат во западна Украина за да ја поминат границата со Полска, но не можат да се движат поради долгите бирократски процедури и логистички проблеми, јавуваат трговците и претставници на украинската железничка компанија.

Кога на тоа ќе се додадат вагони натоварени со растително масло, руда, метали, хемикалии и јаглен, бројката се искачува на 24.190 вагони, покажуваат неодамна објавените податоци на украинската државна железничка компанија Укрзализница.

Приближно половина од овие вагони – 10.320, чекаат во близина на селото Изов, главниот железнички граничен премин со Полска, на пат кон полското пристаниште Гдањск.

Главниот проблем е што нема доволно работници или вагони кои би можеле да преработат и преземат толку голема количина стока, велат познавачите на индустријата и Владата.

Украина е еден од најголемите извозници на житарки во светот, а пред војната ги извезуваше речиси исклучиво преку Црното Море. Железницата беше во втор план, поради повисоките транспортни трошоци.

Сега Киев бара алтернатива, копнена рута за извоз, бидејќи руската инвазија ги блокираше нејзините главни пристаништа на југ, што го отежнува извозот на жито и други стоки, потсетуваат официјални лица и упатени во индустријата. Трговците посочуваат дека обидите ги попречуваат логистичките предизвици, но и бирократијата.

Украинската железничка мрежа користи руска пруга, широка околу 1,5 метар, што е околу 10 сантиметри поширока од пругата во поголемиот дел од Европа, па вагоните треба да се подигнуваат со кран, а шасијата да се менува рачно, објаснува шефот на украинската железничка компанија.

Алтернативно решение би било истовар на жито од украински во полски вагони, што може да потрае и до половина час по вагон.

Во моментов границата кај Изов ја минуваат и до 500 вагони дневно, посочува Ткачов, што со други зборови всушност значи наталожени тринеделни испораки. Има уште десетина премини, но многу немаат соодветна инфраструктура, објаснува тој.

Државната железница работи на зголемување на капацитетот, така што Полска, Романија, Унгарија и Словачка ќе можат да преминуваат 1.100 вагони жито дневно за три месеци, што би било речиси десеткратно зголемување од нивото во март, рече тој.

Во исто време, компанијата вработува нови работници, префрла актуелни работници од секторот за превоз на патници во секторот за товарен транспорт, купува опрема за прилагодување на вагоните и се обидува да ги ублажи другите проблеми, како што се царинските процедури, додаде Ткачев.

„Работиме на забрзување на постапката, на намалување на бројот и времетраењето на контролите на вагоните и на документацијата“, прецизира тој.

Владата во Киев не одговори на барањето на „Ројтерс“ да ги коментира информациите.

Украинскиот производител на храна „Астарта холдинг“ се очекува да испорача 25.000 метрички тони пченка на клиентите во Европа во април, но сè уште не го доби потребното одобрение од регулаторите на железницата, рече Јулија Берешченко, директор за односи со инвеститори и развој на бизнисот.

Од компанијата соопштија и дека имаат на залиха околу 150.000 тони неискористено жито, главно пченка. Во овој период од годината силосите треба да бидат речиси празни, нагласуваат тие.

Украина извести дека извозот на жито во март бил една десетина од нивото од истиот месец минатата година поради затворањето на пристаништата, додавајќи дека нарушувањето ги погодува луѓето во многу земји.

Агенциите за хуманитарна помош посочуваат дека земјите кои досега увезувале жито од Украина, вклучувајќи ги Кина, Египет, Турција и Индонезија, ќе мора да најдат алтернативни извори за снабдување бидејќи во спротивно ќе се соочат со недостиг на храна.