Свет
Украинците го отстранија српот и чеканот од највисоката статуа во Европа

Советскиот национален грб е отстранет од споменикот на Татковината што се издига над украинскиот главен град Киев.
На снимката се гледаат работници кои го отстрануваат симболот што го држи женска фигура – знак на татковината, јавува Би-Би-Си. Тие ќе бидат заменети со грб со трозабец – државниот симбол на Украина, кој ги симболизира старите словенски племиња кои некогаш живееле на територијата на таа земја.
Работата треба да биде завршена до 32-годишнината од Декларацијата за независност на Украина на 24 август. Фигурата е висока 62 метри, што ја прави највисоката статуа во Европа и речиси 16 метри повисока од Статуата на слободата во Њујорк. Целиот споменик, вклучувајќи ја и основата, е висок 102 метри и тежок речиси 500 тони.
Во 1981 година, уште во советско време, музејскиот комплекс со статуата беше официјално отворен по повод Денот на победата над хитлерова Германија. Во анкетата спроведена минатата година, во времето на сеопфатната руска инвазија, мнозинство Украинци гласаа за отстранување на советската симболика од обележјето на Киев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп ја најави посетата на Нетанјаху

Американскиот претседател Доналд Трамп изјави дека израелскиот премиер Бенјамин Нетанјаху би можел да го посети веќе следната недела, бидејќи Израел ги засили нападите во опколениот Појас Газа.
Трамп рече дека разговарал со Нетанјаху по телефон вчера и дека по тој повик верува дека израелскиот лидер „ќе дојде во нашата земја некаде во не толку далечна иднина, можеби следната недела“.
Нетанјаху во моментов се соочува со налог за апсење од Меѓународниот кривичен суд за воени злосторства и злосторства против човештвото извршени од неговите сили во Газа.
Тој вчера ја посети Унгарија, што е негова прва посета на европска земја откако Меѓународниот кривичен суд издаде потерници за него и поранешниот министер за одбрана Јоав Галант во ноември минатата година.
Групите за човекови права, вклучително и Амнести интернешенел и Хјуман рајтс воч, ја повикаа Унгарија да го уапси Нетанјаху и да го предаде на Меѓународниот кривичен суд. Сепак, Унгарија одлучи да се повлече од Меѓународниот кривичен суд.
Свет
Маск објави фотографија од високо чуваното седиште на ЦИА, предизвикувајќи лавина коментари

Илон Маск уште еднаш предизвика лавина реакции откако на социјалните мрежи објави фотографија од внатрешноста на седиштето на ЦИА, локација која вообичаено е строго забранета за јавноста.
На фотографијата се гледа како Маск стои во големото лоби на зградата на ЦИА во Вирџинија, на познатиот гранитен печат на Агенцијата од 16 метри.
Во неговото друштво има едно лице, што дополнително го зголеми чувството на мистерија околу објавата.
Маск не приложи никаков коментар или објаснување на објавата, што веднаш предизвика бројни теории на заговор и прашања од корисниците на Интернет. „Зошто ви е дозволено да бидете во зградата на ЦИА? напиша еден корисник. „Не знаев дека сте разузнавач или член на Конгресот. Како сте воопшто таму?“, додаде уште еден.
Имаше и такви кои се шегуваа.
„Не е првпат странец да влезе меѓу нив“. Некој рече дека фотографијата го потсетува на филмот Man in Black и објави и сцена од филмот.
— Elon Musk (@elonmusk) April 2, 2025
Инаку, според официјалните правила на ЦИА, пристап до седиштето им е дозволен само на вработените во Агенцијата, додека јавните посети се строго забранети. Ниту музејот на ЦИА не е отворен за јавноста.
Исто така, мобилните телефони, фотоапаратите или какви било дигитални уреди не смеат да влезат во седиштето, а оние што ќе ги донесат мора да ги остават во возилото или да ги предадат на обезбедувањето на влезот.
Свет
Канадскиот премиер: Царините на Трамп се трагедија

Канадскиот премиер Марк Карни најави ограничен сет на контрамерки против американските царини, нарекувајќи ги протекционистичките потези на американскиот претседател Доналд Трамп трагедија за светската трговија.
Карни рече дека канадската влада ќе го имитира американскиот пристап и ќе воведе царини од 25 отсто за сите возила увезени од САД кои не спаѓаат во трговскиот договор меѓу САД, Мексико и Канада.
Новата мерка ќе се применува за увезена стока во вредност од 35,6 милијарди канадски долари (околу 22,8 милијарди евра), изјави владиниот портпарол.
Карни на прес-конференцијата рече и дека новите тарифи нема да важат за автоделови и нема да влијаат на деловите од Мексико.
„Со оглед на очекуваната штета за сопствениот народ, американската администрација на крајот треба да го смени правецот на својата политика. Но, не сакам да давам лажна надеж“, рече Карни, додавајќи дека би можело да помине многу време пред САД да го променат својот пристап.
Карни рече дека претходно најавените канадски царини ќе останат на сила.