Унгарија е единствената земја од ЕУ која не ја поддржа иницијативата за обука на украински војници во Европа.

Таа нема да учествува во тоа, изјави шефот на унгарската дипломатија Петер Сијарто.

„Денеска беше донесена одлука Европската Унија да почне мисија за обука, односно претставници на земјите од Европската Унија ќе обучуваат војници на украинската армија. Би сакал да кажам дека Унгарија не гласаше за таа иницијатива. Ние нема да учествуваме во таа мисија“, рече Сијарто.

Тој објасни дека Унгарија е единствената земја од ЕУ која зазеде таков став, бидејќи не поддржува чекори кои водат кон ескалација на конфликтот, туку, напротив, се залага што поскоро да дојде до почеток на мировните преговори.

Дипломатот на крајот од седницата на министрите за надворешни работи на Европската Унија во Луксембург изјави дека Унгарија продолжува да инсистира да одбие да испорача оружје на Украина, за да не биде вовлечена во конфликтот.

Претходно, шефовите на надворешните работи на ЕУ конечно го одобрија доделувањето на шестата транша од воената помош за Киев во износ од 500 милиони евра, како и распоредување мисија за обука на украинската армија надвор од територијата на Украина.

На почетокот на март унгарскиот парламент донесе декрет со кој се забранува испорака на оружје за Украина од унгарска територија. Украинскиот претседател Владимир Зеленски изрази незадоволство што Унгарија е против продолжување на антируските санкции за енергетскиот сектор и не поддржува воведување зона на забранети летови над Украина, не го снабдува Киев со оружје и не дозволува негов транзит преку Унгарија.

Унгарскиот премиер Виктор Орбан изјави дека Будимпешта ги брани своите национални интереси и се држи само до својата страна.