Свет
Унгарија не дозволува распоредување на трупите на НАТО на своја територија

Среде тензиите меѓу Украина и Русија, се појави првата земја што не сака да биде домаќин на трупите на НАТО.
Унгарија нема да дозволи распоредување дополнителни сили на нејзина територија, бидејќи националната армија е способна да обезбеди национална безбедност во екот на тензиите околу Украина, изјави министерот за надворешни работи Петер Сијарто.
„ Не, ние не се согласивме со тоа и нема да се согласиме, бидејќи веќе имаме војници на НАТО на територијата на земјата, а тоа се унгарската армија и унгарските вооружени сили, кои се способни да ја гарантираат безбедноста на земјата. Значи, не ни требаат дополнителни војници на територијата на Унгарија“, изјави Сијарто за „Еуроњуз“.
Претходно овој месец, портпаролот на американското Министерство за одбрана Џон Кирби изјави дека Вашингтон привремено ќе распореди дополнителни американски војници во Источна Европа поради украинската криза.
Поточно, ескадрила од 1.000 членови ќе биде преместена од Германија во Романија за да им се придружи на 900-те американски војници кои се веќе присутни во земјата.
Првите 100 американски војници веќе пристигнаа во Романија. Во Полска треба да бидат стационирани уште 1.700 војници, објави „Спутник“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Маж на возраст од околу 40 години загина на концерт на „Оејсис“, полицијата бара сведоци

Маж на возраст од околу 40 години загина откако падна од височина за време на концерт на „Оејсис“ на лондонскиот стадион Вембли, соопшти Метрополитенската полиција, а пренесе Би-Би-Си.
Полицајци и медицински лица на стадионот Вембли реагирале на дојава за повреден маж околу 22:19 часот. Мажот бил „пронајден со повреди кои соодветствуваат на пад“ и бил прогласен за мртов на самото место, соопшти портпаролот на полицијата.
Во изјава од стадионот Вембли се наведува дека на повредениот маж му била укажана помош од страна на медицинските лица, полицијата и лондонската итна помош.
„И покрај нивните напори, посетителот на концертот за жал почина. Сочуствуваме со неговото семејство, кое е информирано и му се дава поддршка од специјално обучени полициски службеници“, се наведува во соопштението.
„Оејсис“ во својата изјава соопшти дека се „шокирани и нажалостени“ од веста за смртта на обожавателот.
Најверојатно, мажот паднал од горниот кат.
Полицијата изјави дека стадионот бил преполн и дека „веруваат оти најверојатно имало повеќе луѓе кои биле сведоци на инцидентот или свесно или несвесно го снимиле со мобилен телефон“.
Метрополитенската полиција ги замоли сите што имаат информации да се јават на бројот 101.
Бендот ја започна својата турнеја по повод повторното обединување. Саботниот концерт беше дел од седум распродадени концерти на стадионот Вембли, кој има капацитет од 90.000 луѓе на три ката.
Следните концерти на бендот ќе се одржат во Единбург на 8., 9. и 12. август, по што следува турнеја низ Ирска, Канада, САД и Мексико, пред повторно да се вратат на Вембли на 27. и 28. септември.
Свет
Двегодишно девојче најдено живо во куфер во автобус на Нов Зеланд

Двегодишно девојче е пронајдено живо во куфер што се наоѓал во багажниот простор на автобус на Нов Зеланд, пренесува „Скај њуз“. Според полицијата, детето било во прегреана состојба при пронаоѓањето, но немало видливи повреди.
Инцидентот се случил во неделата за време на застанување во местото Каивaка, околу сто километри северно од Окленд. Возачот на автобусот забележал движење во куферот откако една патничка побарала пристап до багажниот простор. Кога го отворил сомнителниот куфер, следувал шок – внатре се наоѓало девојчето.
Главниот детектив, Сајмон Харисон изјави дека девојчето било „многу загреано, но физички изгледало неповредено“. Веднаш било пренесено во болница, каде било задржано за детални прегледи.
Полицијата уапсила 27-годишна жена, чиј идентитет не е објавен, под сомнение за занемарување и злоупотреба на дете. Не е соопштено колку долго девојчето било во куферот, ниту на која делница се движел автобусот.
Жената треба да се појави пред суд во понеделник, а случајот е пријавен и до надлежните служби за заштита на деца.
Компанијата Entrada Travel Group, која управува со националната автобуска линија InterCity, потврди дека инцидентот се случил во еден од нивните автобуси. „Полицијата беше повикана да реагира и го истражува случајот. Никој не беше повреден за време на инцидентот“, се наведува во соопштението на компанијата.
За среќниот исход заслуга има возачот на автобусот, кој доби пофалби од детективот Харисон, кој истакна дека „забележал дека нешто не е во ред и веднаш презел мерки, спречувајќи многу полоша завршница“.
Регион
Поранешниот хрватски премиер, Иво Санадер, излезе од затвор

Иво Санадер, поранешен лидер на ХДЗ и премиер на Хрватска, е ослободен од затвор пред да ја отслужи целата казна. Санадер беше условно ослободен од затворот Липовица откако отслужи две третини од казната, објавија хрватските медиуми.
Како што објасни адвокатот Драган Црнковиќ, исполнети се сите законски услови за поранешниот премиер да биде ослободен. Тој рече дека покрај неговата возраст, една од причините наведени во барањето за ослободување е неговата здравствена состојба, но тоа не се главните причини, забележува тој, туку и фактот дека тој го почитува член 59 од Кривичниот законик. Тој истакнува дека на 15 август 2023 година отслужил половина од казната.
Ќе биде должен да се јавува во полиција секој месец и нема да му биде дозволено да го менува местото на живеење и привременото живеалиште.
На прашањето на новинарите дали тоа значи дека ќе има ограничено движење, тој одговори негативно.
„Не знам, може да го запали автомобилот, да оди во Сплит. Само ако има намера трајно да го промени местото на живеење и живеалиштето, мора да добие дозвола“, објасни адвокатот Црнковиќ.
Фото: ЕПА