Свет
Утре нова рунда американско-руски преговори

Соединетите Американски Држави и Русија утре во Истанбул ќе одржат нова рунда разговори, потврди портпаролот на Кремљ, Дмитриј Песков, а пренесува „Киев индипендент“.
Во преговорите ќе бидат вклучени и претставници на министерствата за надворешни работи на двете земји. Песков не прецизира за кои теми ќе разговараат руската и американската делегација.
Разговорите доаѓаат откако американскиот претседател Доналд Трамп повторно ја поведе иницијативата за прекин на огнот во Украина и покрај тоа што Русија продолжува да ги бомбардира украинските градови со беспилотни летала и проектили.
Претходните, две јавни средби меѓу руски и американски претставници се одржаа во март во Саудиска Арабија. Претходно овој месец, рускиот преговарач Кирил Дмитриев пристигна во Вашингтон за да разговара со американски официјални претставници во име на рускиот претседател Владимир Путин и се состана со Стив Виткоф, специјалниот пратеник на претседателот Трамп за Блискиот Исток, во Белата куќа.
Украинскиот претседател Володимир Зеленски на 3 април призна дека американските и руските официјални лица воделе приватни разговори за можноста за целосен прекин на огнот во Украина. Киев со недели изразува подготвеност за 30-дневен прекин на огнот, како што е предложено од Вашингтон, под услов Русија да ги прифати истите услови.
Сепак, Русија досега го отфрли таквиот договор согласувајќи се само на делумни прекини на огнот поврзани со енергетската инфраструктура и Црното Море во замена за обновениот пристап до меѓународните пазари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русија ја осудува острата ескалација на тензиите меѓу Израел и Иран

„Русија е загрижена и ја осудува острата ескалација на тензиите“, изјави портпаролот на Кремљ, Дмитриј Песков, пренесува руски „Интерфакс“.
Тој изјави дека рускиот претседател Владимир Путин добива онлајн-извештаи за настаните што се случуваат меѓу Израел и Иран.
„Претседателот Путин добива извештаи во реално време од руското Министерство за одбрана, Службата за надворешно разузнавање и од Министерството за надворешни работи за настаните во регионот“, рече Песков.
Според него, руското Министерство за надворешни работи, по наредба на претседателот на Русија, набргу ќе издаде детаљно соопштение за ситуацијата меѓу Израел и Иран, „кое потоа ќе биде дистрибуирано до Обединетите нации“.
Свет
Израел ги скри патничките авиони на тајна локација надвор од земјата

Израелските авиокомпании „Ел Ал“, „Аркија“ и „Исраир“ ги преместија своите авиони надвор од земјата на непозната локација, како подготовка за можен ирански напад врз аеродромот „Бен Гурион“, јавува дописникот на „Скај њуз“ од Блискиот Исток.
Авионите беа транспортирани без патници, како дел од однапред подготвени безбедносни протоколи во случај на понатамошна ескалација и напади врз клучна инфраструктура.
Ноќеска Израел изврши голем воздушен напад врз повеќе цели во Иран. Според израелски воени извори, погодени се објекти поврзани со нуклеарната програма на Иран и воени локации, вклучувајќи го и клучниот комплекс за збогатување ураниум во Натанц.
Свет
Германија ја зајакнува заштитата на еврејските и израелските институции по нападот врз Иран

Германскиот канцелар Фридрих Мерц изјави дека Израел има право да го брани своето постоење, а по израелските напади врз Иран, наредил зголемена заштита на еврејските и израелските објекти во Германија.
Утрово телефонски разговараше со израелскиот премиер Бенјамин Нетанјаху и свика состанок на кабинетот за безбедност во Берлин, објави германската влада.
Мерц нагласи дека целта останува да се спречи Иран да развива нуклеарно оружје и го обвини Техеран дека продолжува да ги крши своите обврски од Договорот за неширење на нуклеарно оружје и дека претставува сериозна закана за регионот, особено за Израел.
Тој ги повика двете страни да се воздржат од потези што би можеле дополнително да го ескалираат конфликтот и да го дестабилизираат Блискиот Исток.
Синоќа Израел изврши воздушен напад врз повеќе цели во Иран како дел од операцијата „Стоечки лав“. Според израелски воени извори, погодени се објекти поврзани со нуклеарната програма на Иран и воени локации, вклучувајќи го и клучниот комплекс за збогатување на ураниум во Натанц. МААЕ потврди дека Натанц е меѓу нападнатите локации и е во контакт со иранските власти за следење на нивото на зрачење.
Израелскиот премиер Бенјамин Нетанјаху изјави дека целта на операцијата е да се „неутрализира егзистенцијална закана“, истакнувајќи дека Иран со години развива нуклеарни капацитети и отворено се заканува дека ќе го уништи Израел. Иран го затвори својот воздушен простор, а израелската војска го подигна нивото на тревога за можен одговор, вклучително и лансирање беспилотни летала и ракети од Иран и територии контролирани од проирански групи.