Свет
Фаучи: Вакцинирајте се дури и ако сте се опoравиле од Ковид-19

Водечкиот американски експерт за инфективни болести Ентони Фаучи ги советуваше Американците кои веќе имале коронавирус, или претпоставуваат дека го имале, да се вакцинираат веднаш штом вакцината е достапна.
Долгогодишниот директор на Националниот институт за алергија и заразни болести изјави дека нема причина да се верува оти вакцината може да им наштети на оние кои веќе имале Ковид-19.
„Не мислам дека тоа треба да биде причина за загриженост“, рече Фаучи, охрабрувајќи ги Американците да се вакцинираат кога вакцината ќе е подготвена.
Двата производитела, „Фајзер“ и „Модерна“ ги завршија клиничките испитувања и тврдат дека нивните вакцини имаат ефикасност поголема од 90 проценти. „Фајзер“ поднесе барање за регистрација на својата вакцина, што би можело да биде одобрено од Администрацијата за храна и лекови (ФДА) веќе во првата половина на декември.
„Конечната одлука ќе зависи од проценката на ФДА… но мислам дека е многу веројатно дека нема да има ограничувања за вакцинирање на оние кои имаат докази дека веќе биле заразени“, рече Фаучи.
Научниците сè уште не се сигурни колку долго трае имунитетот на луѓето кои се опоравиле од инфекцијата, а исто така не е познато колку долго ќе трае заштитата по вакцинирањето.
Многу епидемиолози веруваат дека за коронавирус најверојатно ќе треба редовни годишни вакцинации, како што е вакцината против сезонски грип, но сè уште не е познато дали вакцината ќе биде ефективна и толку долго.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел до Иран: Ако ги нападнете нашите градови, ќе возвратиме на рафинериите и лидерите на режимот

Израел му порача на Иран дека, во случај на напад на балистичка ракета врз израелски населби и цивилни цели, ќе одговори со гаѓање на иранските рафинерии и лидерите на режимот.
Како што изјави за „Канал 12“ висок израелски безбедносен функционер, Израел јасно му ставил до знаење на Техеран дека нема да толерира напади врз цивили и дека во тој случај цели ќе бидат стратешката инфраструктура и политичкото раководство на Иран.
Свет
Ројтерс: Луѓето на Трамп го предупредија Катар и неговите сојузници неколку часа пред израелскиот напад

Американскиот Стејт департмент однапред информирал неколку регионални сојузници на Блискиот Исток за планираниот израелски напад врз Иран, неколку часа пред почетокот на операцијата, тврдат тројца извори запознаени со ситуацијата, пренесува Ројтерс.
Во дипломатската нота испратена во четвртокот попладне, Стејт департментот потврдил дека израелскиот напад ќе се случи доцна во ноќта. Катар бил меѓу земјите кои го добиле предупредувањето.
Во пораката се наведува дека Вашингтон не учествувал во израелската операција ниту дал каква било поддршка. Се истакнува и дека претседателот Доналд Трамп јасно ја изразил својата желба за мир во регионот, но и цврстиот став дека на Техеран не смее да му се дозволи да развива нуклеарно оружје.
За потсетување, Израел започна бран воздушни напади низ Иран ноќта меѓу четвртокот кон петокот, тврдејќи дека погодил нуклеарни локации, ракетни фабрики и високи воени команданти, што може да биде долготрајна операција чија цел е да се спречи Иран да развие атомска бомба.
Стејт департментот не одговори веднаш на барањето за коментар.
Свет
Најмалку 86 загинати и 341 ранети во израелските воздушни напади

Најмалку 86 лица загинаа, а 341 беа ранети во израелските воздушни напади во петокот, објави иранската новинска агенција Фарс, цитирана од „Анадолија“.
Во главниот град Техеран загинаа 78 лица, а 329 беа ранети. Најмалку уште осум лица ги загубија животите, а 12 се ранети во нападите на Табриз, град во северозападниот дел на Иран.
Израел започна сеопфатна воена операција против Иран, во која учествуваа 200 борбени авиони. Целите беа иранската нуклеарна програма и можностите за лансирање ракети со долг дострел.
Во нападите загинаа високи воени функционери и научници кои работеа на нуклеарната програма.
Премиерот Бенјамин Нетанјаху рече дека целната воена операција ќе продолжи се додека е потребно.
Иран вети строга казна и побара итен состанок на Советот за безбедност на Обединетите нации.
Американскиот претседател Доналд Трамп на социјалната мрежа „Вистина“ објави дека му дал на Иран „можност за договор“ и го повика да ја искористи сега, „пред да биде предоцна“.
Оваа ескалација фрла сомнеж за иднината на нуклеарните преговори меѓу Техеран и Вашингтон, кои се водат со посредство на Оман. Шестата рунда индиректни преговори, закажана за в недела, сега најверојатно ќе биде откажана, велат извори запознаени со ситуацијата.