Израелска безбедносна компанија соопшти дека ја контактирале крадците кои стојат зад кражбата на накитот од Лувр, нудејќи тајни преговори за продажба на украдените предмети преку „даркнет“.

Компанијата CGI Group тврди дека управата на Лувр ја игнорирала понудата, иако крадците доставиле очигледен доказ дека поседуваат дел од украдените драгоцености. Тие побарале десетици милиони евра за накитот, проценет на 88 милиони евра.

Извршниот директор на компанијата, Цвика Навех, изјави дека пет дена по кражбата (19 октомври) добиле шифрирана порака од лице кое тврдело дека ги претставува крадците: „Ни понудија преговори на даркнет за откуп на накитот, со рок од само 24 часа,“ рече Навех.

Според него, компанијата водела неколку шифрирани разговори со претставникот на крадците и добила индикации дека навистина поседуваат дел од предметите.

„Беа во бегство и морале брзо да се ослободат од пленот“, додаде тој.

Навех преку посредник се обидел да ја извести управата на Лувр, но вели дека тие шест дена не реагирале: „Го изгубивме кредибилитетот кај крадците, а Лувр ја пропушти вистинската шанса да го врати накитот. За жал, изгледа дека егоизмот и двоумењето ја одиграа својата улога.“

Тој потсетува дека уште пред неколку месеци во интервју за италијанскиот весник „Ил Темпо“ предупредил на дискусии на даркнет што упатувале на планови за грабеж во музејот.

Некои извештаи наведуваат дека CGI Group учествува во истрагата, но од Лувр негираат дека имале директен контакт со компанијата. Тие велат дека комуникацијата најверојатно се одвивала преку италијанската подружница, која можеби ја ангажирала осигурителна фирма поврзана со музејот.

Во кражбата крадците провалиле во една од најраскошните сали на Лувр и побегнале со кралски накит, меѓу кој се наоѓа смарагдно-дијамантска огрлица што Наполеон I ѝ ја подарил на својата сопруга Марија Лујза, како и тијара со 212 бисери и речиси 2.000 дијаманти што ѝ припаѓала на царицата Евгенија.

Досега се уапсени неколку лица, но украдениот накит сè уште не е пронајден.

Бугарија ја истражува можноста да побара ослободување од новите санкции на Соединетите Американски Држави против двете најголеми руски нафтени компании, Роснефт и Лукоил, објави Политико, пренесе бнр.бг.

Рафинеријата за нафта во Бургас, во сопственост на Лукоил, снабдува 80 отсто од горивото во земјата.

Според изданието, бугарската влада испратила барање до Вашингтон со цел да ја разбере можната реакција на американската администрација во случај на барање за ослободување од санкциите откако ќе стапат во сила на 21 ноември. Изданието се повикува на извори кои побарале анонимност.

Бугарските власти се загрижени за опасноста санкциите да доведат до затворање на рафинеријата во Бургас, што пак би можело да предизвика недостиг на гориво и последователни протести во земјата, коментира изданието.

Министерството за енергетика одби да даде коментар за Политико. Претседателската институција, исто така, не одговори.

Изземање од санкциите побарала Унгарија, но Трамп одбил.

На климатскиот самит што следната недела ќе се одржи во бразилскиот град Белем, досега учество потврдиле 57 шефови на држави и влади, што е значително помал број во споредба со минатогодишниот COP29 во Азербејџан, на кој присуствуваа 75 лидери, јави Хина.

САД нема да испратат претставници поради повлекувањето од Парискиот договор, додека Кина ќе ја претставува потпретседателот Динг Сјуејсианг. Присуство потврдиле францускиот претседател Емануел Макрон, германскиот канцелар Фридрих Мерц, британскиот премиер Кир Стармер, како и лидерите на Колумбија и Либерија.

Самитот, кој ќе се одржи на 6 и 7 ноември, е подготвителен настан пред конференцијата COP30 (10–21 ноември). Бразилскиот претседател Лула да Силва инсистираше конференцијата да се одржи во Амазонија, симболично нагласувајќи ја нејзината улога во борбата против климатските промени.

Организаторите наведуваат дека ограничениот хотелски капацитет и високите трошоци во Белем создаваат логистички предизвик за очекуваните 50.000 учесници.