Свет
„Фајненшл тајмс“: Ова е планот на Трамп да стави крај на војната во Украина

Републиканскиот претседателски кандидат Доналд Трамп планира да стави крај на војната во Украина со „замрзнување“ на конфликтот доколку победи на претседателските избори, пишува „Фајненшл тајмс“, повикувајќи се на извори блиски до тимот на поранешниот претседател.
Трамп претходно тврдеше дека ќе ја заврши војната во Украина во рок од „24 часа“, но не објасни како ќе го постигне тоа. Некои извештаи и изјави од внатрешниот круг на Трамп сугерираат дека тоа би можело да значи притисок врз Украина да отстапи одредена територија или да се откаже од нејзините аспирации за влез во НАТО.
Републиканскиот кандидат за потпретседател Џ.Д. Венс во септември, ја изнесе идејата за замрзнување на војната со формирање автономни региони и демилитаризирани зони од двете страни на границата, но без членство во НАТО, според ФТ.
Според еден од долгогодишните советници на Трамп, новиот план повторно ќе ги разгледа договорите од Минск од 2014 и 2015 година, кои никогаш не биле спроведени. Тие договори предвидуваа создавање на автономни зони во деловите на Доњецк и Луганск окупирани од Русија, додека окупираниот Крим не беше споменат.
Европските земји треба да ја преземат улогата на гаранти и „надзорници“ на мировниот процес, додека учеството на Соединетите Американски Држави и НАТО би било минимално, пишува Фајненшл тајмс. „Има две работи на кои Америка ќе инсистира. Нема да имаме наши луѓе во механизмот за спроведување. Нема да го финансираме. Европа ќе плати за тоа“, додаде тој.
Сојузниците на Трамп тврдат дека Украина ја губи војната и затоа притисокот за договор е „морално исправно“. Трамп смета дека сегашниот американски претседател Џо Бајден треба да разговара со рускиот претседател Владимир Путин, како што американските претседатели разговараа со лидерите на Советскиот Сојуз за време на Студената војна и дека членството на Украина во НАТО во моментов не е опција.
Фред Флејц, поранешен аналитичар на ЦИА, кој работеше во Белата куќа за време на мандатот на Трамп, а сега е во Центарот за американската безбедност, во интервју за ФТ сугерираше дека членството на Украина во НАТО може да биде надвор од агендата неколку години, со цел да се принуди Русија да преговара.
„Го замрзнуваме конфликтот, Украина не отстапува територија, не се откажува од своите територијални претензии, а преговорите се во тек со разбирање дека најверојатно нема да има конечен договор додека Путин не се повлече од функцијата руски претседател“, рече Флејц. Сепак, овој пристап нема да има едногласна поддршка во Републиканската партија, објави ФТ.
Мајк Волц, еден од главните републикански говорници за национална безбедност во Претставничкиот дом, сугерираше дека Трамп треба да се закани со колапс на руската економија со намалување на цените на нафтата и гасот за да го доведе Путин на преговарачка маса.
„Извезувате поевтина, почиста американска нафта и гас низ целиот свет. Ја намалувате цената“, додаде Вoлц.
Саудиска Арабија, важен сојузник на Трамп за време на неговиот прв мандат, не би го поздравила таквиот потег. Сепак, луѓе блиски до Трамп инсистираат на тоа дека тој ќе изврши силен економски притисок врз Путин.
„Тој покажа дека знае како да ги доведе двете страни на маса“, рече Рик Гренел, поранешен амбасадор во Берлин и балкански пратеник на Трамп, потсетувајќи на Абрахамскиот договор, договорите потпишани од Израел и Обединетите Арапски Емирати, Бахреин, Мароко и Судан додека Трамп беше на власт.
„Тој го правеше тоа постојано. Арапите и Израелците, Русите и Украинците ќе бидат следни“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Министерство за внатрешни работи на Србија: Дачиќ примил плик со три куршуми во него

Српското Министерство за внатрешни работи соопшти дека вчера во зградата на Владата на Република Србија е пронајден плик адресиран до вицепремиерот и министер за внатрешни работи Ивица Дачиќ, во кој имало три куршуми.
Сомнителната пратка е откриена вчера за време на безбедносна проверка на рендгенски уред при сортирање на пошта. Истрагата утврдила дека пликот бил предаден два дена претходно во филијалата на Поштата на Србија во Пожаревац.
Полицијата го идентификувала и го пронашла лицето кое го доставило пакетот, а истрагата за сите околности на настанот е во тек.
Министерството соопшти дека ги презема сите законски пропишани мерки и дејствија со цел да се заштити безбедноста на граѓаните и институциите.
Фото: принтскрин
Свет
(Видео) Русите го снимија моментот на напад врз украински воен брод

Бројот на жртви од рускиот напад врз украински воен брод се искачи на две лица, изјави портпаролот на украинската морнарица Дмитро Плетенчук на националната телевизија.
Има повредени, а неколку морнари се водат за исчезнати. Во тек е операција за пребарување и спасување. „Но, поголемиот дел од екипажот е безбеден од вчера“, рече Плетенчук. Украинците не сакаат да разговараат за деталите за нападот, како што се времето и местото каде што се случил.
Footage shows the moment the Ukrainian Navy’s small reconnaissance ship Simferopol was struck by a Russian naval drone around midnight in southern Odesa region. The attack was coordinated by an Orion recon-strike UAV. Reports say the vessel suffered a major breach and rolled onto… pic.twitter.com/tOEmNcYNmj
— NOELREPORTS 🇪🇺 🇺🇦 (@NOELreports) August 28, 2025
Руското Министерство за одбрана вчера соопшти дека украинскиот извидувачки брод „Симферопол“ бил погоден од дрон во близина на устието на реката Дунав и потонал. Кога го прашале за потонувањето, Плетенчук рече дека „не може да ја потврди оваа информација“.
Видеоснимки од нападот врз бродот се појавија во руските медиуми.
Рускиот експерт за беспилотни летала Денис Федутинов изјави за руската државна новинска агенција „Тасс“ дека ова е првпат руските сили да потонат украински воен брод со помош на дрон.
„Ова е првиот официјално потврден случај од страна на руското Министерство за одбрана на украински воен брод погоден од руски дрон. Единствениот друг значаен инцидент со употреба на воен дрон од страна на руската војска беше експлозија во близина на еден од мостовите што ја преминуваат реката Днепар“, рече Федутинов.
„Симферопол“ е извидувачки брод од класата „Лагуна“ на украинската воена морнарица. Беше лансиран во 2019 година и официјално се приклучи на флотата две години подоцна. Бродот е дизајниран за радио, електронско, радарско и оптичко извидување и е вооружен со артилериски систем „АК-306“ од 30 мм.
Фото: принтскрин
Свет
Захарова: Зеленски го саботира процесот на мировни преговори

Украинскиот претседател Володимир Зеленски презеде чекори што водат кон саботажа на процесот на мировни преговори во Украина и продолжување на конфликтот, изјави денес портпаролката на руското Министерство за надворешни работи, Марија Захарова.
„Зеленски продолжи да презема чекори што водат кон саботажа на процесот на мировни преговори и ескалација на конфликтот. На 21 август тој разговараше со странски новинари за одбивањето на Киев правно да ги признае териториите неповратно изгубени од оваа клика повторувајќи ги своите делирични максими за нивната окупација“, рече Захарова на прес-конференција, пренесува ТАС.
Таа додаде дека Зеленски „не ја цени волјата на огромното мнозинство жители на овие региони за повторно обединување со Русија врз основа на резултатите од референдумот во 2022 година“.
„Кога беше прашан за мирно решение, Зеленски излажа, се обиде да ја обвини нашата земја дека не сака да ја заврши војната, ја отфрли можноста за давање официјален статус на рускиот јазик наместо мир, сонуваше за сили на НАТО, рече дека тие треба да бидат распоредени на копно, во воздух и на море“, истакна Захарова, пренесува „Танјуг“.
Таа додаде дека во своето видеообраќање на 24 август, по повод Денот на независноста на Украина, Зеленски „продолжил да демонстрира воинственост“.
Фото: принтскрин