Свет
ФБИ нема докази дека зад протестите во САД стојат „Антифа“ и белите супремацисти
ФБИ соопшти дека нема докази кои сугерираат дека екстремното левичарско движење „Антифа“ на каков било начин директно е вклучено во немирите што со денови траат на улиците на Соединетите Држави по смртта на Џорџ Флојд (46), Афроамериканец кој го загуби животот по бруталниот полициски третман.
Претседателот на САД, Доналд Трамп, во неделата рече дека неговата администрација ќе ја стави „Антифа“ на американскиот список на терористички организации. Министерот за правда, Вилијам Бар, исто така, ја обвини „Антифа“ за немирите што ја уништуваат Америка, пренесува „Индекс“.
Познатиот американски неделник „Нејшн“, пренесува „Бизнис инсајдер“, пишува дека извор близок до ФБИ вели дека нема потврдени податоци што директно би ја поврзале „Антифа“ со насилните протести. Во извештајот на ФБИ се наведуваат неколку примери на насилство, како што се гаѓање полицајци со цигли, ранци полни со експлозив и слично.
Сепак, нема никакви докази за поврзаноста на „Антифа“ со демонстрантите. Барем не директно, додава весникот.
Неделникот, како и магазинот „Политико“, пишуваат дека екстремните десничарски опции се поврзани со демонстрациите, повикувајќи ги нивните симпатизери да ги нападнат федералните агенти во конфликтот со демонстрантите и слободно да користат автоматско оружје.
„Политико“ напиша дека Министерството за одбрана на САД ја известило полицијата дека белите супремацисти ја користат апликацијата „Телеграм“, чии пораки биле шифрирани, со цел да поттикнат насилство меѓу нивните следбеници и да почнат војна меѓу расите на улиците.
Трамп и Бар беа поддржани од многу други републиканци кои ја обвинија „Антифа“ за насилни протести низ целата земја. Некои од нив повикаа армијата да излезе на улиците за да го задуши движењето.
Републиканецот Мет Гаец од Флорида рече дека „Антифа“ е виновна за овие протести и истакна дека треба да бидат гонети како терористи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
(Фото) Филмски грабеж во Њујорк: се маскирале како работници и украле 3 милиони долари
Најмалку тројца мажи, од кои двајца биле маскирани како градежни работници, извршиле грабеж во Њујорк и избегале со сеф и накит во вредност од повеќе од 3 милиони долари. Филмскиот грабеж се случил сред бел ден, на 16 октомври, во населбата Јамајка Хилс во Квинс, а полицијата објави детали и снимки од надзорните камери овој вторник, пишува nbcnews.com.
Според соопштението на Полициската управа на Њујорк (NYPD), крадците насилно ја отвориле задната врата од куќата околу 14:20 часот. Откако влегле на локацијата, лицата извадиле сеф и накит, чија вредност се проценува на приближно 3,2 милиони долари. По кражбата, тие избегале со сино Хјундаи Елантра, кое е снимено со камери за надзор.
Истражителите објавија детални описи на тројцата мажи со надеж дека некој ќе ги препознае. Еден од мажите што влегол во домот носел црна маица, црни панталони, црни патики, неонски елек, бела кацига, заштита за очи и бил виден како носи црн ранец.
Другиот носел црна маица, црни панталони, сиви патики, неонска јакна, бела кацига, заштита за очи, црна маска за лице и носел црн ранец, соопшти полицијата.
Третиот осомничен, кој возел, носел бела маица со качулка, црни панталони, сиви патики и црни ракавици.
За среќа, никој не е повреден во грабежот, а потрагата по сторителите е во тек.
Регион
Сирија го призна Косово
Претседателката на Косово, Вјоса Османи, објави дека Сирија ја признала независноста на Република Косово, пренесува Анадолу.
Османи, која е во официјална посета на Ријад, изјави дека со поддршка на саудискиот престолонаследник Мохамед бин Салман, е постигнат договор со кој Сириската Арапска Република ја признава Република Косово.
Османи му се заблагодари на сирискиот претседател Ахмед ал-Шарија за одлуката за признавање на Косово, како и за неговата поддршка за Косово.
„Народот на Косово и Сирија многу страдаше и жртвуваше за да постигне слобода. Затоа, ова меѓусебно признавање денес не е само признавање на државниот суверенитет, туку и признание на жртвите на многу генерации за слободен живот“, рече Османи.
Таа, исто така, му се заблагодари на саудискиот престолонаследник „што го овозможи овој историски чин меѓу двете земји“. Со признавањето од Сирија, сега 120 земји ширум светот го признаа Косово.
Свет
Боинг ја одложува испораката на авиони, се соочува со казна од 5 милијарди долари
Авиокомпанијата Боинг објави дека производството на долгоочекуваниот авион 777X се одложува до 2027 година, што ќе ја чини дури 5 милијарди долари казни за доцнење на испораките. Причината се сè построгите регулаторни пречки што мора да ги надмине, пишува Би-Би-Си.
Одложувањето доаѓа во време на растечка побарувачка за меѓународни патувања, додека Боинг се обидува да го промовира својот најнов модел како наследник на легендарните 747 и 777. И покрај проблемите со довербата на компанијата по низа инциденти, вклучувајќи го и оној во кој вратата на авионот паднала од лет, Боинг соопшти дека приходите во трите месеци што завршија во септември се зголемиле за 30 проценти на 23,27 милијарди долари во споредба со истиот период минатата година.
Главниот извршен директор Кели Ортберг изјави дека компанијата работи на „враќање на довербата кај сите наши засегнати страни“.
Тој изрази разочарување поради доцнењето на 777X, но додаде дека авионот „се покажал добро на тестирањето во летот“. Тој нагласи дека Боинг работи на „стабилизирање на нашите операции за да можат перформансите на нашата компанија целосно да се опорават“.

