Новиот германски министер за внатрешни работи, Александер Добриндт,  изрази денеска решителност во намерата да спроведе строга миграциска политика со цел да го намали бројот на нерегулирани влегувања во Германија.

„Оваа политика веќе започна на германските граници“, изјави Добриндт обраќајќи му се на Бундестагот, алудирајќи на новите мерки за враќање на сите лица кои не поседуваат потребни документи на германските граници, што се однесува на оние кои сакаат да поднесат барање за азил во Германија.

Добриндт рече дека можностите на германското општество кога станува збор за интеграција дошле до своите граници и затоа, како што рече, Германија мора да испрати сигнал во светот дека дошло до промена во миграциската политика.

„Затоа мора да делуваме што побрзо“, рече Добриндт и објасни дека во првата недела од примена на новите правила, при обид да влезат во Германија, биле одбиени 45 проценти повеќе лица отколку недела дена пред тоа.

Министерот од редовите на Унијата CDU/CSU најави и систематско протерување на криминалците во земји како што се Авганистан или Сирија. Онеможувањето на влез во земјата за лицата кои имаат намера да поднесат барање за политички азил во Германија наидува на критики како во Германија, така и кај соседите, особено во Полска и Швајцарија.

Германија се повикува на т.н. Даблинско правило според кое за азил е одговорна онаа земја членка на Европската унија во која подносителот влегол во ЕУ, а тоа, кога станува збор за копнена граница, не може да биде Германија. На внатрешен план, новата германска влада под раководство на канцеларот Фридрих Мерц се обвинува за тоа што онеможувањето на поднесување барање за азил е неуставно.

Истовремено, германските медиуми, повикувајќи се на извори од полицијата, јавуваат за силен пад на бројот на нерегулирани влегувања во земјата од почетокот на годината. До почетокот на мај се забележани 22.000 обиди за влез, што претставува значителен пад во споредба со 2024 година кога во истото време биле забележани 83.000, а во 2023 година 127.000 преминувања.

Стручњаците исто така укажуваат дека намалениот број на илегални мигранти е резултат на подобрени контроли на надворешните граници на Европската унија. Австрискиот министер за економија и туризам, Вилфрам Хатмансдорфер, ја пофали германската постапка на границата со Австрија.

„Среќен сум и задоволен поради тоа што во Германија дошло до промена во начинот на размислување кога станува збор за миграциската политика“, изјави Хатмансдорфер. Тој додаде дека оние кои бараат заштита во Европа се добредојдени, но не и оние кои доаѓаат од економски причини.

Претседателката на Европската комисија, Урсула фон дер Лајен, денес изјави дека Европската Унија ќе го зголеми притисокот врз Русија и дека работи на нов пакет санкции, вклучувајќи санкции против „Северен тек 1“ и „Северен тек 2“.

„Тој (рускиот претседател Владимир Путин) повика на прекин на огнот за време на годишнината од 9 мај, што самиот тој никогаш не го почитуваше. Потоа Украина повика на прекин на огнот, што беше поддржано од Европската Унија и САД, но претседателот Путин одби. И конечно, Путин предложи директна средба меѓу Украина и Русија во Турција. Претседателот Зеленски беше подготвен за средбата, но претседателот Путин никогаш не се појави“, рече фон дер Лајен во пресрет на самитот на европската политичка заедница во Тирана.

Според неа, ова ги покажува вистинските верувања на Путин. „Значи, ќе го зголемиме притисокот. Работиме на нов пакет санкции, на санкции што вклучуваат санкции против „Северен тек 1“ и „Северен тек 2“, но и намалување на горната граница на цената на нафтата. И конечно, повеќе финансиски санкции врз рускиот финансиски сектор“, истакна таа.

Таа нагласи дека ЕУ сака мир и дека мора да се зголеми притисокот врз претседателот Путин, пренесува Танјуг.

Високата претставничка на Европската Унија за надворешна политика и безбедност, Каја Калас, исто така, во Тирана изјави дека ЕУ „веќе размислува за следниот пакет санкции“.

Самитот на Европската политичка унија ги собира лидерите од цела Европа – 27 членки на ЕУ и 20 земји кои не се членки.

90-дневното примирје меѓу САД и Кина во трговската војна е прекратко, напиша кинескиот државен медиум „Глобал тајмс“, додека претставниците на двете најголеми економии во светот се прегрупираат во Кореја.

На самитот во Женева минатиот викенд, САД се согласија да ги намалат дополнителните тарифи што ги наметнаа на кинескиот увоз минатиот месец од 145 проценти на 30 проценти во текот на следните три месеци, додека Кина вети дека ќе ги намали тарифите на американскиот увоз од 125 проценти на 10 проценти.

„Просторот за меѓусебно корисна соработка треба да се прошири далеку над 90-дневниот период“, пишува „Глобал тајмс“, кој е во сопственост на државниот весник „Пиплс дејли“, и кој често е првиот што во последните години известува за чекорите што Кина има намера да ги преземе во трговските спорови.

„Се надеваме дека американската страна ќе продолжи да ги надградува резултатите од неодамнешните преговори и ќе продолжи да се сретнува со Кина на половина пат“, напиша „Глобал тајмс“.