Свет
(Фото) Британски турист загина додека планинарел на Хималаите

Британски турист загина додека планинарел со пријател на Хималаите во северна Индија.
Двајца Британци пешачеле по „исклучително тежок терен“ во близина на селото Татри во Дарамшала, кога еден од нив се здобил со сериозни повреди, соопштија локалните служби за итни случаи.
Спасувачите го пронашле, го ставиле на носилки и почнале да го спуштаат по планината, но кога пристигнал во болница речиси 24 часа подоцна, била констатирана смрт.
Британското Министерство за надворешни работи соопшти дека „обезбедува поддршка на семејството на британски државјанин кој почина во Индија и е во контакт со локалните власти“.
Според Тајмс оф Индија, дуото планинарело по популарната патека Триунд, долга околу 7 километри, која се наоѓа во подножјето на планинскиот венец Дауладар.
Несреќата се случила за време на спуштањето, кога еден од мажите паднал, а неговиот пријател отишол да бара помош во блиското село, пишува весникот.
The SDRF rescued UK tourists Howard Thomas Harry and Robert John from challenging terrain near Thathri, Dharamshala, on February 16-17, 2025. While Robert was unharmed, Howard, in critical condition, was declared dead upon arrival at the hospital. #HpsdrfRescueOperation pic.twitter.com/iOSB7Kkgw3
— HP-SDRF (@HP_SDRF) February 18, 2025
Локалните спасувачи од Државната служба за одговор при катастрофи на Химачал Прадеш објавија на платформата Икс дека добиле повик за помош во 18:00 часот во неделата, по што десет спасувачи биле испратени на планината во потрага по двајцата мажи.
„По четири часа пешачење, тимот ги пронашол жртвите во 22:30 часот. Еден алпинист беше во критична состојба. Го обезбедија на носилки и го започнаа тешкото спуштање заедно со неговиот пријател.
Нерамниот терен и повторените премини на планински поток значително го забавија нивниот напредок, па им беа потребни речиси два часа да поминат само 100 метри“.
Во текот на ноќта спасувачката екипа побарала засилување, а изутрината пристигнале дополнителни спасувачи.
„Тие продолжија да ја транспортираат жртвата, но стрмниот терен го отежнуваше спуштањето, поради што неколку пати требаше да ја прицврстат носилката со сигурносни јажиња“.
Мажот конечно пристигнал во болница во понеделникот во 17:08 часот, но бил констатиран мртов по пристигнувањето, додале спасувачите. Неговиот пријател избегал без повреди.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Мерцедес, златни прачки, готовина: сопругата на некогаш моќниот сенатор земала мито за него

Поротата во Њујорк ја прогласи Надин Менендез, сопруга на поранешен сенатор од Њу Џерси, за виновна за нејзината улога во долгогодишниот корупциски скандал со готовина, златни прачки и луксузен Мерцедес.
Надин Менендез (58) беше прогласена за виновна по сите 15 точки од обвинението, вклучително и поткуп и попречување на правдата, бидејќи му помагала на нејзиниот сопруг Роберт Менендез да прифати подароци во замена за политички услуги. Таа беше обвинета заедно со него уште во септември 2023 година, но нејзиното судење беше одложено поради лекување од рак на дојка.
Пресудата ќе и биде изречена на 12 јуни. Нејзиниот сопруг минатата година веќе беше осуден на 11 години затвор. Канцеларијата на американското правобранителство ја опиша двојката како „партнери во криминалот“ и рече дека „владината моќ не е на продажба“.
На судењето, обвинителите тврдеа дека Надин била клучна за целата шема, често добивајќи готовина и подароци во име на нејзиниот сопруг.
Во тоа време, Менендез беше еден од највлијателните демократи во американскиот Сенат. Тој беше член на Комитетот за надворешни работи, што му даде голема моќ во обликувањето на американската надворешна политика. „Таа го информираше за сè што прави“, рече обвинителот Пол Монтелеони, според Њујорк тајмс.
Адвокатите на Надин Менендез тврдеа дека обвинителите не докажале дека златото и готовината пронајдени во нивниот дом имаат директни врски со каква било официјална постапка на нејзиниот сопруг. Нејзиниот адвокат Бери Кобурн не го криеше разочарувањето пред судот: „Се боревме со сите сили и овој исход беше тежок за нас. Денес е многу тежок ден за нас“.
За време на судењето, обвинителите презентираа докази пронајдени за време на претресот на нивниот дом во 2022 година – повеќе од 100.000 долари во златни прачки и стотици илјади долари во готовина скриени во облека и пликови. Прикажаа и пораки меѓу сопружниците и нивните соработници и пребарување на Гугл на поранешниот сенатор: „Колку вреди еден килограм злато?“
Во целата афера, покрај Надин и Роберт Менендез, биле вмешани и градежниот претприемач Фред Даибес и Ваел Хана, сопственик на компанија за сертификација на халал од Египет, кои исто така биле осудени. Осигурителот Хозе Урибе се изјасни за виновен во март оваа година за учество во корупциска шема.
Европа
Што прави папата?

Кардиналите ќе се состанат на конклава по смртта на папата Франциско за да го изберат неговиот наследник – но кои се вистинските должности и овластувања на поглаварот на Католичката црква? Зборот папа доаѓа од грчкиот „pappas“ што значи „татко, патријарх“. Поради оваа причина, верниците го нарекуваат и „Свети Отец“.
Управител на Црквата
Сметан за наследник на Свети Петар, на кого Христос му ја доверил мисијата за управување со Црквата, папата е духовен водач на повеќе од 1,4 милијарди католици ширум светот. Неговата улога е да ја зачува и поучува христијанската вера, да ги толкува евангелијата и да го обезбеди единството на Црквата.
Шефот на државата
Папата е и шеф на државата Ватикан, независна држава опкружена со Рим, која со 44 хектари е најмалата во светот. Во ова својство, папата има апсолутна власт – извршна, законодавна и судска.
Папите ги примаат шефовите на држави на „приватна аудиенција“ што овозможува размена на мислења за актуелни теми или позиции на Светата столица, која како духовна и административна власт за римокатолиците во светот има статус на суверен субјект според меѓународното право.
Доктрина и учење
Папата пишува документи како што се енциклики или апостолски опомени, со што ги одредува доктринските и моралните прашања, ги води верниците и ја реформира Црквата. Во дванаесетте години од неговиот понтификат, Франциско на тој начин го отвори патот за благослов на истополовите парови, ги ограничи латинските миси и презеде мерки за борба против сексуалното насилство во Црквата.
Папата има и учителска мисија преку своите говори. Покрај тоа што проповеда на миси, тој секоја среда наутро во Ватикан одржува јавни катехези за време на неделната општа аудиенција.
Именувања
Папата го има последниот збор во назначувањето епископи во епархиите ширум светот, од кои има приближно три илјади. Папата назначува и кардинали, а оние помлади од 80 години го избираат неговиот наследник. Неговиот збор е конечен дури и во именување на блажените и светителите. Може да свикува и синоди – собири на лаици и верски поглавари на кои ќе разговараат за одредени теми.
Патувања
Покрај тоа, тој патува низ светот за да се сретне со верниците, одговарајќи на официјалните покани од шефовите на држави. Најголем патник бил папата Јован Павле Втори кој во своите 26 години понтификат остварил 104 патувања во странство. Вториот е Франциско со 47 патувања.
Римски бискуп
Папата, покрај тоа што е поглавар на целата Католичка црква, е и водач на својата епархија, Римската епархија. Поради сите обврски, оваа должност најчесто се делегира на генералниот викар. И покрај тоа, папата учествува во животот на локалната црква, редовно појавувајќи се во црквите во главниот град на Италија за време на големите празници.
Свет
(Видео) Се запали моторот на авион пред полетување во САД, евакуирани речиси 300 луѓе

Патниците биле принудени да го напуштат авионот на Делта откако се запалил мотор додека авионот бил паркиран на асфалтот на меѓународниот аеродром Орландо во Флорида, јавува Би-би-си. На снимките објавени на социјалните мрежи се гледа чад и пламен кои доаѓаат од десниот мотор и патниците кои излегуваат од авионот на надуени тобогани за евакуација.
Летот 1213 на Делта требаше да тргне од Орландо, познат по Дизни Ворлд, за Атланта, со речиси 300 луѓе во авионот. Нема извештаи за повредени. „Патниците се евакуирани. Спасувачките и противпожарните екипи брзо реагираа“, објави аеродромот на социјалните мрежи.
Делта во изјава за Си-би-ес Њуз соопшти дека авионот бил Ербас А330 со 282 патници, 10 членови на кабинскиот екипаж и двајца пилоти во авионот. Компанијата соопшти дека членовите на екипажот ја евакуирале кабината откако бил забележан пламен на еден од двата главни мотори.