Свет
(Фото) По 10 години мистерија: Малезија одобри нова потрага по исчезнатиот авион MH370

Малезиската влада објави дека одобрила продолжување на потрагата по исчезнатиот авион MH370 на Малезија ерлајнс, кој исчезна пред десет години.
И покрај долгогодишните напори да се пронајдат остатоците од Боингот 777, семејствата на многу жртви сè уште бараат одговори, наведува Би-Би-Си.
Малезискиот министер за транспорт Ентони Лок објави дека владата одобрила преговори за нов договор со американската компанија „Оушн Инфинити“, специјализирана за истражување на длабоки мориња.
Оваа компанија ќе ја спроведе потрагата по авионот, со услов плаќањето да се изврши само доколку се најдат остатоците.
Потрагата ќе опфати површина од 15.000 квадратни километри во јужниот дел на Индискиот Океан.
Претходната потрага заврши неуспешно во 2018 година. Исто така, меѓународната потрага, која траеше две години и чинеше 150 милиони долари, заврши во 2017 година без успех.
Летот MH370, со 239 патници, полета од Куала Лумпур во раните утрински часови на 8 март 2014 година, но изгуби контакт со контролата на летање помалку од еден час по полетувањето.
Радарот покажал дека авионот скршнал од планираниот курс.
Иако истрагите покажуваат дека авионот најверојатно се урнал во јужниот дел на Индискиот Океан, останува нејасно што ја предизвикало несреќата.
Делови од остатоците, за кои се верува дека се од авионот, се пронајдени на брегот на Индискиот Океан неколку години по исчезнувањето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Авион се урна покрај автопат во САД, има загинати

Има сомнежи дека две лица загинале во мал авион што се урнал во јужниот дел на американската сојузна држава Луизијана, соопштија властите.
Авионот вчера околу 20 часот и 30 минути по локално време, паднал во мочурлив простор во близина на автопатот, а причината за уривањето ја утврдуваат Националниот одбор за безбедност на транспортот и Федералната управа за авијација, пренесува АП.
До утрото, официјалните лица стигнаа до урнатините, а голем дел од авионот со двете лица бил под вода.
Официјален претставник на канцеларијата на шерифот ги потврди медиумските извештаи за Асошиетед прес дека и двете лица се претпоставува дека се мртви.
Свет
Венс за падот на берзата: Беше тоа само еден лош ден, ќе имаме бум

Американскиот потпретседател Џеј Ди Венс изјави за Newsmax дека вчерашниот пад на берзата, најголем од 2020 година, е само еден лош ден.
„Но, долго време ќе имаме бум на берзата, бидејќи повторно инвестираме во САД“, рече тој.
Потпретседателот нагласи дека владата сака Волстрит да работи успешно: „Но она што ни е најважно се американските работници и американските мали бизниси. Тие се оние кои ќе имаат најголема корист од овие политики“.
Венс, исто така, рече дека воведените царини можеле да бидат многу повисоки, но дека Трамп се обидува да испрати порака дека САД ќе бидат донекаде попустливи.
Свет
Данската премиерка за Америка: „Не можете да анектирате друга земја, дури и со аргументот за меѓународна безбедност“

Премиерката на Данска Мете Фредериксен вчера повторно ги отфрли повиците на американскиот претседател Доналд Трамп за анексија на Гренланд.
Трамп повеќе пати повторуваше дека сака големиот арктички остров да стане дел од Соединетите Американски Држави. Гренланд моментално е автономен дел од Кралството Данска.
На конференцијата со новоизбраниот премиер на Гренланд Јенс-Фредерик Нилсен и неговиот претходник Муте Егед, Фредериксен директно им се обрати на САД. „Не можете да анектирате друга земја, дури и со аргументот за меѓународна безбедност“, рече таа.
Таа рече дека САД и Данска се блиски пријатели и дека не сака ништо друго освен да го продолжи тоа пријателство.
„Ако дозволиме да бидеме поделени како сојузници, тогаш им правиме услуга на нашите непријатели“, рече таа. „Но, кога барате да преземете дел од територијата на Кралството Данска, кога се соочуваме со притисок и закани од нашиот најблизок сојузник, што да мислиме за земјата на која и се восхитуваме толку години?“
Таа рече дека не се работи само за Гренланд или Данска. „Се работи за светскиот поредок што го градиме заедно преку Атлантикот со генерации“.
Тридневната посета на данската премиерка на Гренланд дојде откако американската делегација предводена од потпретседателот Џеј Ди Венс минатата недела пристигна на островот.
Фредериксен се соочува со предизвикот да ги балансира односите со САД како важен трговски партнер, истовремено поддржувајќи го правото на Гренланд на самоопределување и одржување на кохезијата во Данска.