Францускиот суд го прогласи Доминик Пелико за виновен за повеќекратно дрогирање и силување на сопругата во текот на речиси една деценија и поканување десетици непознати да го силуваат нејзиното онесвестено тело во нивниот дом.

Судот исто така ги прогласи за виновни сите 50 обвинети во случајот отфрлајќи ги тврдењата на некои од нив дека мислеле оти учествуваат во сексуална игра или дека веруваат дека Жизел Пелико дала согласност.

Пелико доби казна од 20 години затвор, другите добија значително помалку. Покрај тоа што е прогласен за виновен за тешко силување на сопругата, тој е виновен и за тешко силување во обид на сопругата на еден од сообвинетите, Жан-Пјер Марешал, како и за несоодветно фотографирање на својата ќерка Каролин и снаите Аурора и Селин.

„Скај њуз“ пишува дека Доминик Пелико сега има 72 години, што значи дека, најверојатно, ќе умре во затвор.

За време на претходниот дел од судењето, ќерка му во судницата му рекла: „Ќе умреш сам како куче во затвор“.

„Пелико молеше за нивна прошка – што не ја доби“, пишува „Скај“.

Доминик Пелико (72) се изјасни за виновен по обвиненијата за време на тримесечното судење и му се извини на семејството. Тој исто така рекол дека сите непознати што ги поканил во неговата куќа знаеле дека неговата сега веќе поранешна сопруга не знаела што ѝ се случува.

Жизел, која исто така има 72 години, се откажа од правото на анонимност за време на судењето и побара од судот да ги види ужасните снимки од сериското малтретирање што го снимил нејзиниот поранешен сопруг велејќи дека се надева оти тоа ќе им помогне на другите жени да проговорат.

Судењето предизвика протести во Франција за поддршка на Жизел и поттикна дебата за тоа дали да се ажурира францускиот закон за силување, кој во моментот не споменува дека сексот треба да вклучува согласност.

Жизел ги гледаше своите насилници со челична одлучност во преполната судница од ден на ден.

„Решив дека нема да се срамам, не направив ништо лошо“, сведочеше таа во октомври.

Рускиот претседател Владимир Путин ја одржува својата традиционална годишна конференција. Руските гледачи веќе со денови испраќаат прашања до Путин, а темите се движат од домашни проблеми, како што се поскапувањето и здравствената заштита, до глобални прашања.

Се очекува Путин да зборува за она што Кремљ сè уште го нарекува специјална воена операција. Останува уште еден месец до враќањето на Доналд Трамп во Белата куќа, па Путин би можел да го искористи овој настан за да испрати порака до новата американска администрација. Тој може да се осврне и на падот на Башар ал-Асад, неговиот близок сојузник.

„Економијата напредува и покрај надворешните закани“

На претседателот Путин му беше поставено првото прашање – како може руската економија да опстане? Путин вели дека економската ситуација е стабилна и напредува и покрај, како што рече, надворешните закани. Тој вели дека годинава растот ќе биде 3,9 отсто.

Во однос на инфлацијата, Путин признава дека инфлацијата од 9 % е загрижувачка, но дека во целина ситуацијата е стабилна. Исто така, тврди дека Русија е рангирана на четвртото место во светот во однос на паритетот на куповната моќ – мерка за релативната цена на стоките меѓу земјите.

„Западните санкции не се клучниот фактор“

Кодомаќинот на денешната сесија на прашања и одговори го задржува фокусот на економијата порачувајќи му на Путин дека многу од прашањата што денес ги добија од јавноста се за зголемување на цените.

Путин одговара дека понудата се бори да остане во чекор со побарувачката додека платите растат. Тој го минимизира влијанието на западните санкции велејќи дека тие не се клучен фактор.

„Победата е сè поблиску“

Потоа следуваше прашање за војната на Русија во Украина или, како што ја нарекува Кремљ, специјалната воена операција. Путин беше прашан дали победата е блиску.

Путин го почна својот одговор со тоа што двајца мажи развија знаме зад него за кое рече дека е подарок од бригада на руската морнарица и го потпишале активни војници. Ова предизвика аплауз кај публиката.

Тој рече дека ситуацијата драстично се менува и дека руските војници секојдневно заземаат територии. „Војната е комплицирана, но ние сме сè поблиску до решавање на нашите примарни задачи на специјалната операција“, нагласи тој.

Путин зборуваше за бригадата чие знаме стои зад него. Тој рече дека бригадата се бори во Курската област, а нејзините членови ги нарече херои и им посака победа.

„Нема воена смисла Украина да влезе во регионот Курск“

Во дополнителните прашања од гледачите Путин рече дека не може да постави датум кога Русија ќе ја врати контролата врз регионот Курск по украинската офанзива на почетокот на оваа година.

Му беа поставени неколку прашања, меѓу кои: кога ќе се ослободи регионот, кога жителите ќе може да се вратат во своите домови, дали инфраструктурата ќе се обнови и дали граѓаните ќе бидат ставени на списокот за помош за обнова на уништените домови во борбите.

„Нема воена смисла Украина да влезе во регионот Курск“, посочи тој додавајќи дека тие мора безбедно да се отстранат. Тој предупреди дека ако се преземе јавна обврска за датум, војниците ќе се обидат да го исполнат и по цена на својот живот.

„Сè ќе се изгради. Во тоа нема дилема. Ќе се обноват и училишта, и градинки, и патната инфраструктура“, најави тој и додаде дека сите чии домови се уништени ќе добијат отштета.

„Ајде да направиме експеримент или дуел“

Запрашан за „Орешник“ – новата руска балистичка ракета употребена против Украина во ноември – Путин инсистира на тоа дека западната технологија нема шанси да ја пресретне.

„Ајде да одржиме експеримент или дуел. Изберете цел во Киев, донесете ја западната воздушна одбрана таму и видете дали ќе може да ја пресретнат. Тоа ќе биде интересно за нас“, рече тој.

Путин претходно рече дека оружјето, кога се користело во Украина минатиот месец, патувало со 2,5-3 километри во секунда (10 пати поголема од брзината на звукот) додавајќи дека „во моментот не постои начин да се спротивстави на ова оружје“.

„Не знам дали Западот ја доби пораката“

До Путин беше упатено и прашање за промена на нуклеарната доктрина. Минатиот месец Путин одобри промени што поставуваат нови услови под кои Русија ќе размисли за користење на својот нуклеарен арсенал. Доктрината сега вели дека нападот на ненуклеарна држава, доколку е поддржан од нуклеарна сила, ќе се третира како заеднички напад врз Русија.

Тој беше прашан дали Западот ја доби пораката. „Не знам, прашајте ги нив“, одговара Путин. Тој вели дека ако земјите претставуваат закана за Русија, таа верува дека има право да користи нуклеарно оружје против нив.

Претседателката на Народното собрание, Ана Брнабиќ, изјави дека може како човек да разбере ако српскиот претседател Александар Вучиќ размислува да поднесе оставка бидејќи, како што наведе, со години се случуваат обиди за дестабилизација на земјата во која тој е изложен на омраза, но тоа би било политички погубно.

„Можев да разберам дека му е доста од тоа. Но, треба да направиме неколку големи работи што им ги ветивме на граѓаните до 2027 година. Да го завршиме ЕКСПО, да достигнеме просечна плата од 1.400 евра, да продолжиме со економските реформи, да работиме на инфраструктурните проекти“, изјави Брнабиќ за ТВ „Пинк“.

За тоа, како што истакна таа, потребен е Вучиќ, кој изјави дека не знае да се одмора и се натпреварува со себеси во работата.

Според неа, обидите за дестабилизација на земјата бидејќи, како што вели, на некои во Србија и во светот им пречи нејзината независна политика, траат откако Вучиќ стана премиер на Србија, а потоа и претседател.
Таа рече и дека опозицијата сака преодна влада „што е синоним за влада без избори“, но посочи дека „нема ништо да се добие од таа работа“.

„Разбирам дека, како и секојпат, сакаат преодна влада, тоа е нивното второ име – преодна влада, а преодна влада е всушност синоним за влада без избори. Тоа значи дека не е важно како гласале граѓаните, воопшто не ни е важно кој има мнозинство во парламентот, сакаме да бидеме министри и да бараме ресори сакаме да ги водиме“, рече Брнабиќ.

Таа оцени дека формирањето преодна влада ќе биде спротивно на секоја демократска норма.

„Тоа би било шлаканица за сите граѓани на Србија“, истакна Брнабиќ.

Таа оцени и дека оставката на српскиот претседател Алексадр Вучиќ „би била политички погубна за Србија“.

„Мислам дека до 2027 година треба да ги завршиме четирите големи работи што им ги ветивме на граѓаните“, рече Брнабиќ.