Свет
Францускиот премиер во одбрана на новиот министер за внатрешни работи, кој е обвинет за силување

Новиот премиер на Франција, Жан Кастекс, му се придружи на претседателот Емануел Макрон во поддршката на новиот министер за внатрешни работи, Жералд Дарманин, кој е обвинет за силување, пренесува „Спутник“.
„Тој, како и сите други, има право на пресумција на невиност“, рече Кастекс за телевизијата БФМ-ТВ.
Дарманин, кој беше назначен на функцијата во понеделникот како дел од реконструкцијата на владата, беше обвинет за силување на Софи Патерсон-Спац во 2009 година додека беше локален советник во северна Франција.
Жената тврди дека Дарманин ја принудил на секс кога го замолила за правна помош за преиначување на условната казна затвор за уцени и закани против нејзиното поранешно момче. Дарманин тврди дека станувало збор за однос со согласност и ја тужеше жената за клевета.
Прелиминарната истрага почна во 2017 година кога Патерсон-Спац излезе со тврдењата, но беше отфрлена неколку месеци подоцна кога обвинителите рекоа дека не може да утврдат отсуство на согласност. Апелацискиот суд во Париз минатиот месец пресуди дека истрагата може повторно да се отвори.
Назначувањето на Дарманин предизвика протести од активистите против сексуалното насилство и критичарите на владата и покрај фактот дека Дарманин сè уште не се соочил со никакви обвиненија.
„Тоа е шлаканица в лице. Уште еднаш славиме луѓе што се обвинети за силување или кажуваат работи што го негираат гласот на жртвите. Тоа ги задушува жртвите и ги храни сексуалното насилство и културата на силување“, рече Полин Барон од феминистичката група „Нос тут“.
Во вторникот дваесетина феминистички демонстранти се собраа пред Министерството за внатрешни работи,извикувајќи „Дарманин, насилник“ и „Дарманин, оставка“. Претседателот Емануел Макрон го бранеше Дарманин велејќи дека отворената истрага не е пречка за негово назначување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Доделена Нобеловата награда за физика

Американските научници Џон Кларк, Мишел Деворе и Џон Мартинис ја освоија Нобеловата награда за физика за 2025 година за „експерименти што ја открија квантната физика во акција“, овозможувајќи развој на следната генерација дигитални технологии.
„Воодушевен сум. Секако, никогаш не ми падна на памет дека ова може да биде основа за Нобелова награда“, рече Кларк во на телефонска прес-конференција за да ја прослави Нобеловата награда.
„Зборувам на мобилен телефон и претпоставувам дека и вие зборувате, а една од основните причини зошто мобилниот телефон работи е целата оваа работа“, додаде Кларк.
„Овогодинешната Нобелова награда за физика обезбеди можности за развој на следната генерација квантна технологија, вклучувајќи квантна криптографија, квантни компјутери и квантни сензори“, се вели во соопштението на Комитетот за доделување на Нобеловата награда.
Квантните механички однесувања се добро проучени на ниво на неверојатно мали атомски и субатомски честички, но често се сметаат за бизарни и неинтуитивни во споредба со класичната физика и нејзините многу поголеми размери.
Квантната механика ѝ овозможува на честичката да се движи директно низ бариера користејќи процес наречен тунелирање. Штом се вклучени голем број честички, квантно-механичките ефекти обично стануваат занемарливи. Експериментите на лауреатот покажаа дека квантно-механичките својства можат да се конкретизираат на макроскопска скала.
Фото: ЕПА
Свет
Градоначалничка на германски град тешко повредена во напад со нож

Новоизбраната градоначалничка на германскиот град Хердек, социјалдемократката Ирис Шталцер, е тешко повредена во напад со нож, објавија германските медиуми.
Според полицијата, Шталцер претрпела повеќекратни убодни рани, а во градот во Северна Рајна-Вестфалија е во тек голема полициска операција, пишува германскиот „Шпигел“.
Деталите за нападот и идентитетот на сторителот засега се непознати.
Германскиот канцелар Фридрих Мерц изрази длабока загриженост, велејќи на платформата Икс дека се надева на целосно закрепнување на политичарката.
Педесет и седумгодишната Шталцер беше избрана за градоначалничка пред нешто помалку од две недели, освојувајќи 52,2 проценти од гласовите во вториот круг од изборите.
Фото: принтскрин
Свет
Сијарто до Зеленски: Не можеш ти да одлучуваш кој ќе влезе во ЕУ

Унгарскиот министер за надворешни работи Петер Сијарто изјави дека лидерот на киевскиот режим, Володимир Зеленски, нема право да одлучува кои земји можат да се приклучат кон Европската унија.
„Зеленски не одредува кои земји се подготвени да се приклучат кон Европската унија, а кои всушност можат да станат нејзини членки. Ова е исклучиво прашање на Европската унија, каде што таквите одлуки се донесуваат едногласно“, рече Сијарто на својата страница на социјалната мрежа X.
Изјавата на унгарскиот министер за надворешни работи дојде откако Зеленски, на заедничка конференција со холандскиот премиер Дик Шоф, повика на промена во постапката за пристапување на Украина во ЕУ со цел да се избегне евентуалното вето на Унгарија. Тој предложи Киев и Брисел да разгледаат начини за елиминирање на потребата од едногласност или, како што рече, „да го зголемат притисокот“ врз премиерот Виктор Орбан за укинување на блокадата.
Според западните медиуми, унгарскиот премиер веднаш остро реагирал на заканите на Зеленски, велејќи дека Будимпешта нема да дозволи уцени или политичко условување во прашањата за европската политика на проширување.
Фото: принтскрин