Свет
Хакирана веб-страната на „Картие“, украдени податоци за клиентите

Веб-страната на францускиот производител на луксузен накит и часовници „Картие“, во сопственост на „Ричемонт“, е хакирана, при што се украдени некои податоци од клиентите. Клиентите се известени.
Хакирањето е најновиот во низата инциденти со сајбер криминал што ги погодија и другите познати трговци на мало, вклучувајќи ги „Маркс и Спенсер“ и „Викторијас Сикрет“, објави „Ројтерс“. „Картие“, чии часовници, ѓердани и нараквици ги носат познати личности, издаде соопштение во кое се вели дека неовластено лице добило привремен пристап до системите на компанијата.
Во пораката се вели дека се украдени ограничени податоци за клиентите, како што се имиња, е-адреси и земји на живеење. „Хакерите не беа во можност да пристапат до лозинките на нашите клиенти, деталите за кредитните картички или други банкарски информации“, се вели во соопштението, во кое се наведува дека проблемот веќе е решен.
Компанијата соопшти дека сега дополнително ја зајакнала заштитата на своите системи и податоци, ги известила надлежните органи за нападот и соработува со водечки надворешни експерти за сајбер безбедност.
Картие не одговори на барањето на Ројтерс за коментар. Јулиус Чернијаускас, извршен директор на „Оксилабс“, компанија специјализирана за proxy и online собирање податоци, рече дека нападот покажал дека ниеден бренд не е безбеден од сајбер криминал.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Макрон: Повлекувањето на Иран од договорот за нуклеарно оружје би било најлошото сценарио

Францускиот претседател Емануел Макрон денес изјави дека повлекувањето на Иран од Договорот за неширење на нуклеарно оружје, по нападите на САД врз нуклеарните постројки во таа земја, би било „најлошото можно сценарио“.
Тој рече дека во наредните денови ќе разговара со претставниците на петте постојани членки на Советот за безбедност на ОН, вклучувајќи го и американскиот претседател Доналд Трамп, со цел да се обиде да го зачува договорот, пренесува BFM.
„Се надеваме дека ќе има вистинско приближување на ставовите бидејќи целта е да се спречи Техеран да продолжи со своите активности за ширење“, рече Макрон.
Свет
Орбан: Ќе има последици за организирање на „Парадата на гордоста“ во Будимпешта

Унгарскиот премиер Виктор Орбан денес предупреди дека ќе има правни последици за организирање или присуство на парадата на гордоста во Будимпешта, која е закажана за сабота.
Тој рече дека ова ја крши полициската забрана за настанот.
„Ние сме возрасни и им препорачувам на сите сами да донесат одлука, но да ги почитуваат правилата. Ако не го сторат тоа, ќе се соочат со јасно дефинирани правни последици“, изјави Орбан за државното радио, објави Ројтерс.
Премиерот нагласи дека полицијата има овластување да го растера забранетиот настан, но додаде дека Унгарија е „цивилизирана земја“ и дека задачата на полицијата е да ги убеди луѓето да го почитуваат законот.
Свет
Мерц: Германија мора да ја води Европа напред

Германскиот канцелар Фридрих Мерц истакна дека има намера повторно да ја направи Германија движечка сила на Европската Унија, како и дека сака да даде „личен придонес за да се осигури дека Европа успешно ќе продолжи во наредните години“.
На своето прво учество на самитот на ЕУ, кој заврши во четврток во Брисел, откако ја презеде функцијата во мај, Мерц рече дека сака да види брзо решавање на трговскиот спор на Европската Унија со Соединетите Американски Држави.
„Исто така, ја поддржувам Европската комисија во сите нејзини напори за брзо постигнување трговски договор со САД“, рече Мерц, објави Танјуг.
Рокот што го постави американскиот претседател Доналд Трамп за преговори за царини со ЕУ истекува на 9 јули, а Мерц ја обвини Европската комисија дека преговорите се „премногу комплицирани“.
Кога станува збор за војната на Израел во Појасот Газа, Мерц ги отфрли казнените мерки против таа земја или суспендирањето на Договорот за асоцијација на ЕУ со Израел, што го побараа некои земји.
Ова следеше по објавувањето на ревизорскиот извештај на ЕУ, во кој се наведува дека постапките на Израел во крајбрежната зона ги кршат воспоставените принципи на тесна соработка со меѓународната заедница.
Во заедничка изјава, шефовите на држави и влади на ЕУ ги повикаа сите страни на Блискиот Исток да покажат воздржаност и да го почитуваат меѓународното право. Тие, исто така, потврдија дека Иран никогаш не смее да се здобие со нуклеарно оружје, како и дека Европската Унија ќе продолжи да учествува во сите дипломатски напори за намалување на тензиите во регионот.
Мерц учествуваше и на неформален состанок на маргините на Европскиот совет во Брисел, на кој присуствуваа лидерите на 21 од 27-те земји-членки на ЕУ, кои имаат намера да развијат предлози за построга миграциска политика, чии домаќини беа Данска, Италија и Холандија.