Свет
Хамас вели дека ќе се согласи со предлогот за примирје, но бара писмени гаранции од САД

Хамас сака писмени гаранции од САД за спроведување на договорот за траен прекин на огнот и повлекување на израелските сили од Појасот Газа, изјавија два египетски безбедносни извори.
Посредниците Катар и Египет соопштија дека Хамас вчера одговорил на трифазен план за примирје, без да откријат повеќе.
Каков е планот?
Планот беше претставен од американскиот претседател Џо Бајден на крајот на мај. Тој повикува на целосен и неодреден прекин на огнот за шест недели. Во овој период би била ослободена одредена група заложници. За возврат, ќе бидат ослободени и Палестинците од израелските затвори.
Во следната фаза борбите би биле трајно прекинати и преостанатите заложници би биле ослободени, а според предлог-резолуцијата, последната фаза би опфатила реконструкција на Појасот.
САД објавија дека Израел го прифатил предлогот, но Израел тоа јавно не го призна.
Египетски извори и трет извор запознаен со разговорите велат дека Хамас изразил загриженост дека сегашниот предлог не дава јасни гаранции за преминот од првата фаза на планот, кој вклучува шестнеделно примирје и ослободување на некои заложници, до втората фаза, која вклучува траен прекин на огнот и израелско повлекување.
Египќаните тврдат дека Хамас ќе се согласи само доколку предлогот содржи гаранции, а Египет е во контакт со САД во врска со ова барање.
Кога го објави планот, Бајден рече дека прекинот на огнот ќе продолжи доколку преговорите за преминување во втората фаза траат повеќе од шест недели.
Американскиот шеф на дипломатијата Ентони Блинкен денеска изјави дека Хамас предложил голем број измени на предлогот и дека некои од нив се неприменливи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Зеленски вели дека украинската армија ги продолжува операциите во рускиот регион Курск

Претседателот на Украина, Володимир Зеленски денеска изјави дека украинската армија ги продолжува операциите во рускиот регион Курск.
– Нашите сили ги продолжуваат активните одбранбени операции во одредени подрачја на (руските) области Курск и Белгородск, истакна Зеленски.
Рускиот претседател Владимир Путин вчера изјави Курск е целосно ослободен.
Русија повторно воспостави контрола над Курск. Авантурата на режимот на Киев целосно пропадна, изјави вчера Путин.
Претставници на украинската армија вчера ги демантираа тврдењата на Путин и на Генералштабот на руската армија дека Курск е ослободен.
Свет
Русија лансираше 97 беспилотни летала во неколку региони низ Украина

Во текот на ноќта, Русија лансираше 97 беспилотни летала во неколку региони низ Украина, соопштија Воздухопловните сили на вооружените сили на Украина.
Воздухопловните сили објавија на Телеграм дека украинските сили собориле 66 руски беспилотни летала во текот на ноќта.
Во голем број украински региони е прогласена воздушна опасност поради лансирање руски беспилотни летала, вклучувајќи ги Полтавската и Харковската област, Одеса, Киев, Суми, Чернигов, Днепропетровск и Запорожје
Свет
Од денеска за верниците се отвора гробницата на папата Франциско во базиликата Санта Марија Маџоре во Рим

Од денеска гробницата на папата Франциско во базиликата Санта Марија Маџоре во Рим ќе биде отворена за верниците, соопшти Ватикан.
Папата, кој почина на 88-годишна возраст на 21 април од мозочен удар, беше погребан вчера во гробница одвоена помеѓу две капели во римската базилика, по церемонија на жалост одржана во Ватикан. Церемонијата на поставување на ковчегот траеше околу половина час.
На погребот во базиликата Санта Марија Маџоре присуствуваа само најблиските, а едноставниот, дрвен ковчег на папата беше пречекан со ѕвона.
На мисата во Ватикан, според официјалните податоци од Ватикан, присуствуваа околу 250.000 луѓе, како и 170 странски делегации. Меѓу нив имаше шефови на држави и влади, монарси, поранешни државници, политичари од Италија и други земји, интелектуалци, уметници. Подоцна, италијанскиот министер за внатрешни работи Матео Пјантедози изјави дека најмалку 400.000 луѓе присуствувале на погребот на папата Франциск, собрани на плоштадот „Свети Петар“ и по улиците на Рим.
Целиот настан го следеа околу 2.700 акредитирани новинари.