Oбјавеното интервју на милијардерот Илон Маск со републиканскиот кандидат за претседател на САД, Доналд Трамп, на медиумската платформа „Икс“ на Маск доцнеше 42 минути во однос на планираниот почеток.

Поранешниот претседател рече дека обидот за атентат не бил пријатен.

„Тоа беше тежок удар. Беше многу, би рекле, надреално, но не беше надреално. Знаете, му кажував на некого, имате моменти кога чувствувате дека тоа е надреална ситуација. И никогаш не сум се чувствувал така. Знаев дека тоа е куршум“, рече Трамп за моментот кога куршумот му го погоди увото.

Милијардерот изјави дека одлучил да ја поддржи претседателската кандидатура на Трамп бидејќи му се допаднало однесувањето на Трамп по неуспешниот обид за атентат во Батлер, Пенсилванија, минатиот месец. Трамп потоа ја крена тупаницата во воздухот и почна да скандира „бори се, борба“, што Маск го нарече „неверојатно инспиративно“.

Трамп истакна дека неговото прво прашање било: „Колку луѓе се убиени? Тој тврди дека слушнал и други истрели, а знаел дека во публиката има илјадници луѓе.

Трамп ја нападна својата противничка Камала Харис откога таа најави дека ќе го прекине данокот на бакшиш.

„Одеднаш Харис вели дека нема да има данок за бакшишот. Тоа го ветив пред неколку месеци“, рече тој.

На митингот во Лас Вегас за време на викендот Харис вети дека ќе ги унапреди политиките од корист на работничките семејства споменувајќи го укинувањето на данокот на бакшиш. Трамп, кој прв ја предложи идејата на предизборен митинг во Лас Вегас во јуни, ја обвини Харис дека го копира.

Поранешниот претседател и милијардерот долго разговараа за имигрантите. Маск, кој рече дека САД треба да ја ограничат илегалната имиграција, го раскажа своето искуство од патувањето до јужната граница велејќи дека луѓето што ги видел „не изгледале пријателски“.

Трамп ги повтори своите познати тврдења дека другите земји испраќаат криминалци и ментално болни преку граница. За проблемите на границата тој ја обвини и потпретседателката Камала Харис велејќи дека Џо Бајден ја поставил да ја надгледува границата. Тој вети дека ќе ја изврши „најголемата депортација во историјата на земјата“.

Илон Маск понуди да преземе улога во администрацијата на Доналд Трамп помагајќи да се зауздаат ​​владините трошоци доколку поранешниот претседател биде реизбран.

„Мислам дека би било одлично само да имаме владина комисија за ефикасност да ги разгледа овие работи и само да се увериме дека парите на даночните обврзници, тешко заработените пари на даночните обврзници, се трошат на добар начин. Би бил среќен да помогнам“, истакна тој.

Трамп одговори дека би бил среќен да го има Маск на одборот.

Трамп рече дека инфлацијата, заедно со ситуацијата на границата, е она што луѓето најмногу ги загрижува.

„Луѓето сакаат да слушнат за економијата и за фактот дека не може да купат продукти. Инфлацијата ги уби“, рече тој. Трамп го обвини Бајден за инфлаторната криза, која осакати многу Американци.

Инфлацијата во САД достигна 9,1 отсто во 2022 година, што е највисока годишна стапка во повеќе од 40 години.

„Мислам дека ја имаме најлошата инфлација во последните 100 години. Тие велат дека е најлоша инфлација во последните 48 години. Не верувам во тоа“, нагласи Трамп.

Поранешниот претседател Трамп ја критикува Калифорнија и го пофали Тексас кога станува збор за бизнисот спомнувајќи ја енергетската компанија „Шеврон“, која го пресели своето седиште од Калифорнија во Хјустон.

„Видов дека ја напуштивте Калифорнија и се преселивте во Тексас. Тексас врши одлична работа”, му рекол Трамп на Маск.

Маск минатиот месец објави дека две од неговите компании, „Спајс икс“ и „Икс“, порано познати како „Твитер“, исто така ќе се преселат во Тексас.

Трамп го повтори своето тврдење дека ќе го затвори Министерството за образование доколку биде реизбран. Тој вети дека ќе го врати образованието во државите предвидувајќи дека најмалку 35 држави ќе имаат одлично управување со образованието.

За време на интервјуто Маск ја бранеше индустријата за нафта и гас тврдејќи дека значителното зголемување на јаглеродниот диоксид може да го отежни дишењето, но дека не е неопходно да се намали нивото на емисиите на стакленички гасови со децении.

Во исто време, Маск го бранеше својот бизнис со електрични возила, кој беше на удар на Трамп за време на неговата кампања. Трамп во текот на интервјуто велеше дека нуклеарното затоплување е поголема закана од глобалното затоплување. Тој објасни дека нуклеарната енергија е најголемата закана.

Маск не се согласува бранејќи го производството на нуклеарна енергија, тврдејќи дека неговата безбедност е широко погрешно разбрана.

„Тоа не е толку страшно како што мислат луѓето“, објасни Маск. Се чинеше дека Трамп го прифати тоа сугерирајќи дека нуклеарната енергија мора да се нарекува поинаку.

„Во право си. Можеби ќе треба да го сменат името. Ќе го викаме по тебе или слично. Има проблем со брендирањето“, посочи Трамп.

Поранешниот претседател предупреди дека нема смисла што САД немаат возови со голема брзина.

„Ние немаме такво нешто во оваа земја, ниту блиску“, рече тој.

Маск рече дека потпретседателката Камала Харис е екстремно лева, а Трамп ја нарече радикален левичар лудак и полоша од Берни Сандерс.

Разговорот траеше повеќе од два часа. Поранешниот претседател го пофали Маск за бројот на корисници што го слушаат разговорот на двајцата велејќи: „Се надевам дека нема да се нервирате бидејќи сега имате многу луѓе што ве слушаат“.

„Честитки“, му рекол тој на Маск пред на шега да праша: „Дали ќе земам плата за ова или не?“

Завршувајќи го разговорот, Трамп го нарече Маск неверојатен тип и голема инспирација додавајќи дека повторно ќе има сличен разговор.