Свет
Херметички сефови со шифрирани хард дискови и тајни документи: испливаа тајни од потонатата јахта во Сицилија

Смртта на британскиот технолошки магнат Мајк Линч, неговата ќерка и соработниците во трагично потонатата суперјахта кај брегот на Сицилија пред речиси еден месец предизвика огромно внимание не само поради необичниот начин на кој се случи инцидентот туку и поради низа чудни настани што му претходеа. Сега целата приказна вклучува херметички сефови со шифрирани хард дискови и тајни документи, пренесуваат светските медиуми.
Потсетуваат дека пред нешто повеќе од еден месец суперјахтата на милијардерот Мајкл Линч, долга 56 метри, ненадејно потона. Закотвена на брегот на Сицилија, каде што била по ноќна прослава, ненадејно била нападната од воден вител, кој го потопил бродот за 16 минути.
Во неа биле заробени и се удавиле Линч, неговата 18-годишна ќерка, адвокат и уште неколку соработници.
Трагичниот инцидент веднаш предизвика многу сомнежи поради чудниот момент во кој се случил. Линч организира крстарење со луксузната јахта за да ја прослави неговата неодамнешна победа и ослободителна пресуда во долготрајната тужба поврзана со продажбата на неговата компанија.
По повеќе од десет години правна битка, американскиот суд, само два месеца пред трагичниот инцидент кај Сицилија, го ослободи од сите обвиненија поврзани со случајот.
Медиумите јавуваат дека јахтата имала вградени сефови, кои не протекуваат, а во кои се чуваат шифрирани хард дискови и тајни документи.
Линч наводно носел хард дискови со себе каде и да патувал. Тие потенцијално содржат „многу чувствителни податоци поврзани со неколку западни разузнавачки служби“, пишува Си-ен-ен.
Во прилог на тоа се наведуваат врските на Линч со високи функционери на многу земји поради што тој бил поврзан со „британски, американски и други разузнавачки служби преку своите многубројни компании“.
Линч беше силно вклучен во индустријата за сајбер-безбедност, која често соработува со владини агенции, а во минатото беше советник на неколку британски премиери, меѓу кои Дејвид Камерон и Тереза Меј, пренесува медиумот.
Тој ја основал „Дарктрејс“, компанија специјализирана за развој на системи за вештачка интелигенција одговорни за заштита од сајбер-криминал. Подоцна, му ја продаде за пет милијарди долари на Орландо Браво, основач и партнер во чикашката компанија „Тома Браво“.
Тој ја основа „Дарктрејс“ во Кембриџ заедно со Стивен Хакстер, висок функционер во тимот за сајбер-безбедност на МИ5, кој стана генерален менаџер на компанијата. Хакстер го ангажирал Ендрју Франс, 30-годишен ветеран на GCHQ – британската разузнавачка и безбедносна служба, пишува РТС.
Место во одборот на „Дарктрејс“ имаше и поранешниот шеф на МИ5, Џонатан Еванс, заедно со Џим Пенроуз, кој 17 години работел во американската Агенција за национална безбедност, пренесува „Политико“.
Надлежните сега се обидуваат да дојдат до сефовите и да заштитат што има во нив. Италијанската полиција ја зголеми безбедноста околу местото на потонувањето на јахтата и внимателно го следи потонатиот брод.
Наодите за хард дисковите и потенцијално чувствителните безбедносни податоци донесоа нов пресврт во и онака комплицираната приказна за трагичниот инцидент во близина на Сицилија, стои во написите.
Стивен Чембрлен, деловниот партнер на Линч, кој го бранеше во деценискиот судски спор, почина на денот на потонувањето на јахтата.
Чембрлен беше удрен од автомобил додека џогирал на 17 август и починал од повредите два дена подоцна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.
Европа
Човек на Трамп: Предлогот на Путин е апсурден

Кит Келог, специјалниот претставник на американскиот претседател Доналд Трамп за Украина и Русија, го отфрли предлогот на рускиот претседател Владимир Путин за тридневен прекин на огнот. Келог истакна дека Вашингтон бара долгорочно примирје.
Коментирајќи го напредокот на мировните преговори во последните денови, тој изрази верување дека САД „се во прилично добра позиција кога станува збор за Украинците“. „А тридневно примирје е апсурдно“, нагласи тој, осврнувајќи се на предложеното примирје од 8 до 10 мај.
Тој додаде дека Трамп се залага за сеопфатен прекин на огнот „на море, во воздух и на копно“ што ќе трае најмалку 30 дена. „И потоа можеме да го продолжиме“, изјави тој.
„Кога ќе погледнете на сè околу што Украинците се подготвени да соработуваат, сега е до Русите, до Путин. Имаме една страна, ни треба друга страна. И мислам дека сме блиску“, продолжи тој.
Путин најави уште едно примирје кое ќе започне на полноќ на 8 мај и ќе трае до полноќ на 11 мај. Италијанската премиерка Џорџа Мелони изјави дека тридневното примирје објавено од Кремљ не е доволно, туку дека е потребен праведен и траен мир.
Британската одбранбена разузнавачка агенција верува дека тридневниот прекин на огнот што го објави Путин на Денот на победата има за цел да ја прикаже Русија како отворена за преговори и да ги ограничи украинските напади со долг дострел.
Свет
Израелски министер: Војната нема да заврши сè додека стотици илјади луѓе не ја напуштат Газа

Израелскиот министер за финансии, Безалел Смотрич, изјави денес дека Израел нема да ја заврши војната во Појасот Газа сè додека стотици илјади Палестинци не ја напуштат енклавата.
„Ќе ја завршиме оваа кампања кога Сирија ќе биде уништена, Хезболах ќе биде тешко поразен, Иран ќе биде лишен од својата нуклеарна закана, Газа ќе биде исчистена од Хамас и кога стотици илјади жители на Газа ќе избегаат во други земји, нашите заложници ќе бидат вратени, некои во своите домови, а некои во гробовите на Израел“, рече Смотрич за време на говорот во населбата Ели во централниот Западен Брег.
Тој изјави дека ова не се само цели на владата, туку и консензус на израелскиот народ и војниците. Смотрич апелираше до премиерот Бенјамин Нетанјаху да „направи сè за да ја зајакне безбедноста на Израел“ и го предупреди да не „ја пропушта оваа можност“.
Израелската војска го обнови нападот врз Газа на 18 март, прекршувајќи го договорот за прекин на огнот и размена на затвореници со палестинската милитантна група Хамас од 19 јануари.
Над 52.300 луѓе, претежно жени и деца, се убиени во Газа во израелската офанзива од октомври 2023 година, која започна по нападот на Хамас врз Израел на 7 октомври 2023 година, во кој беа убиени 1.300 луѓе.