Свет
Хирошима: 80 години од првата атомска бомба во светот, која уби над 100.000 луѓе

Јапонскиот град Хирошима одбележува 80 години од американскиот нуклеарен напад што го уништи градот и одзеде десетици илјади животи. Хирошима беше срамнета со земја на 6 август 1945 година. Три дена подоцна, Нагасаки ја доживеа истата судбина.
Последиците од двете бомби, што доведоа до капитулација на Јапонија на 15 август и крај на Втората светска војна во Азија и Пацификот, се проценува дека убиле повеќе од 200.000 луѓе до декември 1945 година.
Бомбата, со прекар „Мало момче“, експлодираше над Хирошима, убивајќи околу 80.000 луѓе речиси веднаш. Вкупниот број на жртви подоцна достигна околу 140.000. Три дена по Хирошима, втора бомба експлодираше над Нагасаки. Околу 40.000 луѓе починаа веднаш, а вкупниот број на жртви се проценува на повеќе од 70.000.
Хирошима сега се гледа низ целиот свет како симбол на ужасите од војната и, со нив, на напорите за мир и свет без нуклеарно оружје, а тоа се обично главните пораки на комеморативните церемонии што се одржуваат во градот на годишнините од нападите.
„Соединетите Американски Држави и Русија поседуваат 90 проценти од нуклеарните боеви глави во светот, а во контекст на руската инвазија на Украина и напнатата ситуација на Блискиот Исток, гледаме забрзан тренд на воено јакнење низ целиот свет“, рече градоначалникот Мацуи Казуми.
„Некои лидери ја прифаќаат идејата дека нуклеарното оружје е од суштинско значење за нивната национална одбрана, очигледно игнорирајќи ги лекциите што меѓународната заедница требаше да ги научи од трагедиите на историјата“.
Мацуи минатиот месец го повика Доналд Трамп да му оддаде почит на Хирошима, додека американскиот претседател ги спореди неодамнешните воздушни напади врз Иран со атомските бомбардирања од 1945 година.
На церемонијата присуствуваа претставници од 120 земји и региони, вклучувајќи ги Израел, Палестина и Украина. Рускиот претставник не присуствува на церемонијата втора година по ред, додека претставникот на Белорусија присуствува на годишнината за прв пат по четири години. Големите нуклеарни сили како Кина и Пакистан исто така беа отсутни.
Ова е прв пат Јапонија да не испрати покани до одредени земји, туку да ги информира сите земји и региони за настанот, па така на настанот присуствуваа и Палестина и Тајван, кои Јапонија не ги признава како држави.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Мерц: Русија стои зад дроновите над Германија

Германскиот канцелар Фридрих Мерц изјави дека се сомнева дека Русија стои зад серијата беспилотни летала видени над Германија во текот на викендот, вклучувајќи ги и оние што прекинаа десетици летови и оставија повеќе од 10.000 патници блокирани на аеродромот во Минхен.
Мерц нагласи дека фреквенцијата на вакви упади во европскиот воздушен простор е без преседан, дури и во споредба со Студената војна. Тој додаде дека ниту едно од беспилотните летала досега не било вооружено и дека сите летале за извидувачки цели.
Во последните недели, слични неидентификувани дронови се забележани над неколку европски земји. Во Данска, во последните недели се регистрирани бројни летови на неидентификувани дронови над воени објекти и аеродроми.
На пример, пријавени се летови над аеродромот Каруп и неколку дански аеродроми. Како резултат на тоа, властите привремено ги забранија летовите на цивилни дронови и го зголемија надзорот, а данското разузнавање потврди дека станува збор за „хибридни напади“ за кои ја обвинија Русија.
Сомнителни летови на дронови над воени бази и стратешка инфраструктура се пријавени и во Германија и Белгија. На пример, околу 15 дронови се забележани над белгиската воена база Елзенборн, а во Германија властите истакнуваат дека инцидентите стануваат сè почести, особено во близина на воени и индустриски објекти.
фото: принтскрин
Свет
Пронајдени се најмалку 50 тела по уривањето на училиште во Индонезија

Бројот на жртви од уривањето на училиште во Индонезија се искачи на најмалку 50 откако спасувачите ги отстранија речиси сите урнатини, соопштија денеска спасувачките екипи, нарекувајќи ја оваа најсмртоносната катастрофа во земјата оваа година.
Исламскиот интернат „Ал Хозини“ во индонезискиот град Сидоарџо се урна минатиот понеделник. Стотици, претежно тинејџери, беа затрупани под бетонските урнатини, при што ги изгубија животите.
Со помош на багери, спасувачите отстранија околу 80 проценти од урнатините до доцна во неделата и извлекоа тела и делови од тела на жртви, соопшти агенцијата за ублажување на катастрофи.
Буди Ираван, заменик-директор на агенцијата, рече дека бројот на извлечени тела го зголемува вкупниот број на жртви на 50, и дека се очекува спасувачите да ја завршат потрагата по уште 13 заробени жртви до крајот на понеделник.
„Ова е најголем број жртви оваа година поврзани со една зграда. Од сите катастрофи во 2025 година, природни или не, ниту една не одзела толку многу животи како онаа во Сидоарџо“, рече тој на прес-конференција.
Јуди Брамантјо, официјален претставник на агенцијата за пребарување и спасување, изјави дека се пронајдени уште пет делови од тела, што укажува дека бројот на жртви би можел да биде најмалку 54.
Пребарувањето продолжува, а агенцијата за спасување објави снимки на кои се гледаат работници како носат портокалови вреќи за тела од урнатините на училиштето. Властите соопштија дека уривањето е предизвикано од градежни активности на горните катови што темелите на училиштето не можеле да ги издржат.
фото: принтскрин
Свет
Индија и Кина воведуваат директни летови за прв пат по пет години

Индија и Кина планираат да ги обноват директните летови меѓу некои од нивните градови по петгодишна суспензија, бидејќи односите меѓу двете земји почнуваат да се стабилизираат, објавија индиските власти.
Директните летови меѓу двете земји беа суспендирани за време на пандемијата на коронавирусот во 2020 година и не се обновени бидејќи Пекинг и Њу Делхи се впуштија во долготрајни гранични тензии.
Летовите меѓу одредени градови ќе бидат обновени до крајот на октомври, во зависност од одлуките на комерцијалните авиокомпании, соопшти индиската амбасада во Кина во објава на социјалната мрежа WeChat. Обновувањето на летовите е дел од „пристапот на индиската влада кон постепена нормализација на односите меѓу Индија и Кина“, додаде амбасадата.
Најголемата индиска авиокомпанија, „ИндиГо“, во четврток најави дека ќе ги обнови летовите помеѓу Калкута, Индија, и Гуангжу, Кина, на 26 октомври.
Одлуката доаѓа откако индискиот премиер Нарендра Моди ја посети Кина минатиот месец за прв пат по седум години за да присуствува на регионален безбедносен форум, дел од напорите на двете земји за нормализирање на односите.
Односите меѓу Кина и Индија нагло се влошија во 2020 година откако безбедносните сили се судрија по спорната граница на Хималаите. Четири кинески и 20 индиски војници беа убиени во најлошото насилство во последните децении, со што се замрзнаа контактите на високо ниво на политиката.
фото: принтскрин