Свет
ХРВ: САД им продаваат оружје на три земји што ги кршат човековите права

Администрацијата на Џо Бајден подготвува договори за продажба на оружје на најмалку тројца кршители на човековите права, вклучувајќи го и Египет, иако вети дека ќе ги стави човековите права во центарот на својата надворешна политика, вели претставник на „Хјуман рајтс воч“ во коментар за „Вашингтон пост“.
На почетокот на годинава американската влада предизвика силни критики откога одобри продажба на ракети во вредност од 197 милиони долари на Египет и покрај сериозните кршења на човековите права од страна на владата. Продажбата на оружје беше објавена еден ден откако беа уапсени роднини на поранешниот политички затвореник и американски државјанин Мохамед Солтан.
Згора на тоа, пишува претставникот на „Хјуман рајтс воч“, САД продолжија да му даваат годишна воена помош на Египет од 1,3 милијарда долари, што предизвика жестока дебата со активистите за човекови права, кои прашуваат зошто САД ѝ даваат толку многу пари на една од најрепресивните земји во светот.
Во април годинава 14 организации за човекови права испратија писмо до американската влада со барање да не го користи дискреционото право за воена помош за Египет, како што тоа го правеа поранешните претседатели Обама и Трамп.
„Продажбата на оружје и 1,3 милијарда долари годишна безбедносна помош за Египет продолжуваат и покрај долгогодишното влошување на условите со човекови права под претседателот Абдел Фатах Ал-Сиси од веројатни воени злосторства и долготрајна воена кампања во северен Синај до илјадници произволно затворени неистомисленици подложени на тортура и друго лошо постапување“, напиша Елиса Епштајн.
Администрацијата на Бајден исто така предложи продажба на оружје во вредност од над 2,5 милиона американски долари на Филипините помалку од две недели откако обвинителот на Меѓународниот кривичен суд побара отворање формална истрага за злосторства против човештвото поврзани со бруталната војна на Филипините против дрогата, вели Епштајн.
Покрај тоа, САД му одобрија на Израел прецизно наведувано оружје во вредност од 735 милиони американски долари и покрај неодамнешното бомбардирање на Појасот Газа кога користеше прецизно водена муниција за уништување домови.
„Американската влада не може да тврди дека ги промовира човековите права додека им продава напредно оружје на владите што ги злоупотребуваат правата. Тоа не само што го поткопува кредибилитетот на Бајден, туку исто така го нарушува почитувањето на човековите права во целиот свет“, напиша Епштајн.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нуклеарните инспектори на ОН пристигнаа во Иран за прв пат по израелскиот напад

Нуклеарните инспектори на ОН се вратија во Иран за прв пат откако Иран ја прекина соработката со агенцијата по израелските напади врз нејзините нуклеарни постројки, објавија денес иранските државни медиуми.
Иранскиот министер за надворешни работи, Абас Аракчи, им рече на пратениците дека Техеран сè уште не постигнал договор за тоа како да ја продолжи целосната соработка со нуклеарното надзорно тело на ОН, објави парламентарната новинска агенција ICANA.
Тој рече дека инспекторите ќе ја следат размената на гориво во иранската нуклеарна централа Бушер, според извештајот.
Коментарите на Аракчи дојдоа еден ден откако Иран се сретна со Франција, Велика Британија и Германија за да се обиде да ги оживее разговорите за неговата нуклеарна програма, за која западните сили велат дека е насочена кон развој на бомба, додека Исламската Република вели дека е насочена кон цивилни проекти.
Иранските власти велат дека на земјата ѝ е потребен нов договор за соработка со Меѓународната агенција за атомска енергија (МААЕ) по 12-дневната воздушна војна со Израел во јуни, на која брзо ѝ се придружија и САД. Во јуни, иранскиот парламент донесе закон со кој се суспендира соработката со МААЕ и се бара сите идни инспекции да бараат зелено светло од Врховниот совет за национална безбедност на Техеран.
Советот ја одобри посетата на инспекторите, но „нацрт за нов начин на соработка со МААЕ не е финализиран ниту одобрен“, рече Аракчи, според ICANA. „Полнењето гориво на нуклеарниот реактор Бушер мора да се изврши под надзор на инспектори на меѓународната агенција“, додаде тој.
Шефот на МААЕ, Рафаел Гроси, изјави за Фокс њуз дека „првиот тим инспектори на МААЕ се врати во Иран“, но дека агенцијата сè уште дискутира за тоа како да ги продолжи инспекциите. По нападите во јуни, Иран исто така тврдеше дека објектите повеќе не се безбедни за инспекторите.
фото: принтскрин
Европа
Кремљ: Ги поддржуваме мировните напори на Трамп, но ги отфрламе гаранциите на ЕУ за Украина

Кремљ на денешниот редовен брифинг за медиумите изјави дека ги смета напорите на САД за постигнување мир во Украина за „многу важни“ и дека тие би можеле да помогнат во решавањето на долготрајниот конфликт. Сепак, портпаролот Дмитриј Песков јасно стави до знаење дека Москва има негативен став кон европските предлози за безбедносни гаранции за Украина.
Песков го повтори долгогодишниот став на Русија дека не треба да има распоредени трупи од земјите-членки на НАТО на украинска територија. На прашањето за можни мировни разговори на високо ниво, тој рече дека ваквите состаноци мора внимателно да се подготвуваат за да бидат ефикасни.
По извештаите дека руските напади во текот на ноќта биле насочени кон украинската енергетска инфраструктура, Песков рече дека Русија ги таргетирала само воените и воено поврзаните цели.
Песков, исто така, објави дека се во тек интензивни подготовки за претстојната посета на рускиот претседател Владимир Путин на Кина.
Путин ќе присуствува на самитот на Шангајската организација за соработка, кој ќе се одржи од 31 август до 1 септември во кинескиот пристанишен град Тјенџин. Според Песков, на самитот ќе учествуваат повеќе од 20 светски лидери.
Потоа, Путин ќе го посети Владивосток, голем руски пристанишен град во близина на кинеската и севернокорејската граница, на 5 септември.
фото: принтскрин
Свет
Папата апелира за траен прекин на огнот во Газа и ослободување на заложниците

Папата денес упати силен апел до глобалната заедница да го прекине речиси двегодишниот конфликт меѓу Израел и Хамас повикувајќи на траен прекин на огнот, ослободување на заложниците во Газа и обезбедување хуманитарна помош.
„Уште еднаш упатувам силен апел да се прекине конфликтот во светата земја, кој предизвика толку многу терор, уништување и смрт“, рече папата на својата неделна аудиенција во Ватикан.
„Барам ослободување на сите заложници, постигнување траен прекин на огнот, олеснување безбеден влез на хуманитарна помош и целосно почитување на меѓународното хуманитарно право“, рече тој.
Папата не ги именува Израел или палестинската милитантна група Хамас, но рече дека меѓународното право бара „обврска за заштита на цивилите, забрана за колективно казнување, неселективна употреба на сила и присилно раселување на населението“.
Фото: принтскрин