Свет
ХРВ: Севернокорејските власти сексуално злоупотребувале жени
Владини претставници искористувале жени во Северна Кореја како „сексуални играчки“, наведува организацијата „Хјуман рајтс воч“. Претставници во Владата на Ким Џонг-ун вршеле сексуално насилство над севернокорејските жени без никаква одговорност, според новите извештаи на невладината организација за заштита на човековите права.
Извештајот е составен од 62 интервјуа направени со граѓани од Северна Кореја кои побегнале од земјата и кои обезбедиле искази за силувања и сексуални злоуппотреби вршени од страна на владини претставници, што според нивните изјави била секојдневна рутина во нивната земја.
„Тие нè третираа како сексуални играчки. Бевме на нивна милост и немилост“, изјави Ох Џунг-хи, поранешен трговец.
Меѓу извршителите на овие дела се и партиски претставници, чувари на затвори, полицајци, како и војници. Една од интервјуираните жени рекла дека кога некој од нив ќе бил избран, тие немале друг избор туку само да се покорат.
Парк Џонг-хи рекла дека сексуално ја злоупотребил полицаец додека била во притвор бидејќи била фатена кога се обидувала да побегне од земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Макрон: Се надевам дека Французите нема да мора да се борат во Украина
Францускиот претседател Емануел Макрон уште еднаш не ја исклучи можноста за интервенција на француската армија во Украина, но истовремено изрази надеж дека неговата земја нема да мора да војува и да испраќа свои војници во војна.
Како што пренесува „Украинска правда“, Емануел Макрон рече дека во одреден момент Европејците треба да бидат подготвени да ја спречат Русија да напредува понатаму во Украина, но тој најискрено се надева дека нема да мора да се борат.
„Ако сакаме мир, мораме да го заштитиме. Затоа треба да се вооружиме и затоа треба да бидеме средство за одвраќање и убедување. Ако одите предалеку и ги загрозувате нашите интереси и нашата безбедност, тогаш јас не исклучувам интервенци во конфликтот“, рече Макрон.
Тој нагласи дека украинскиот суверенитет и територијалниот интегритет се под закана, но истовремено владеењето на правото и општите правила се под закана.
„И ако оставиме сè како што е во Украина, тогаш ќе победи правото на посилниот. И не можеме да бидеме сигурни бидејќи тоа се случува на 1.500 километри. Значи, во Украина нашата иднина и нашата безбедност се во прашање“, заклучи францускиот претседател.
Свет
Големи пропалестински протести во Малме пред евровизиското финале, се бара исклучување на Израел од натпреварот
Денеска во центарот на Малме, Шведска се одржува масовен пропалестински протест поради учеството на Израел на овогодинешното натпреварување.
Голем број луѓе почнаа да се собираат на главниот плоштад во Малме од 16 часот.
Протестот почна на главниот плоштад во Малме, а насобраните од ова место се упатија кон арената Малме, каде што се одржува Евровизија.
Во четвртокот, кога претставничката на Израел настапи во втората полуфинална вечер, на улиците на Малме протестираа повеќе од 30.000 луѓе, според проценките на шведската полиција.
Барањата се исти – бојкот на Евровизија и исклучување на Израел од натпреварувањето.
Свет
Силен земјотрес го погоди Азербејџан
Земјотрес со јачина од 5 степени според Рихтеровата скала го погоди денеска Азербејџан, соопшти Европскиот медитерански сеизмолошки институт (ЕМСЦ).
Земјотресот бил на длабочина од 10 километри, додава ЕМСЦ.
Епицентарот на земјотресот се случил на 19 километри североисточно од градот Ланкаран, кој има околу 210.000 жители.
Засега нема информации за евентуална материјална штета.